മലയാറ്റൂർ വിശുദ്ധവാരാചരണം: ക്രമീകരണങ്ങൾ ഏർപ്പെടുത്തും

 മലയാറ്റൂർ അന്താരാഷ്ട്ര തീർത്ഥാടന കേന്ദ്രത്തിലെ വിശുദ്ധ വാരത്തിനോട് അനുബന്ധിച്ച്  ജനത്തിരക്ക് പരിഗണിച്ച് ആവശ്യമായ  ക്രമീകരണങ്ങൾ ഒരുക്കാൻ  റോജി.എം.ജോൺ എം.എൽ.എയുടെയും ജില്ലാ കളക്ടർ എൻ.എസ്.കെ. ഉമേഷിന്റെയും നേതൃത്വത്തിൽ നടന്ന അവലോകന യോഗത്തിൽ തിരുമാനം.

എല്ലാ വകുപ്പുകളും ഏകോപനത്തോടെ പ്രവർത്തിച്ച് തീർത്ഥാടകർക്ക് ആവശ്യമായ സൗകര്യങ്ങൾ ഒരുക്കണമെന്ന് എം.എൽ.എ യോഗത്തിൽ ആവശ്യപ്പെട്ടു.  പൂർണമായും ഗ്രീൻ പ്രോട്ടോകോൾ പാലിക്കുന്നുണ്ടെന്ന് ഉറപ്പാക്കണമെന്ന് കളക്ടർ പറഞ്ഞു.  തീർത്ഥാടകർക്ക് ആവശ്യമായ കുടിവെള്ള സൗകര്യങ്ങൾ ഉറപ്പാക്കുന്നതിന് തണ്ണീർ പന്തലുകൾ നിർമ്മിക്കുന്നതിന് മലയാറ്റൂർ - നീലീശ്വരം ഗ്രാമപഞ്ചായത്തിന് കളക്‌ടർ നിർദ്ദേശം നൽകി.

 ഏപ്രിൽ ഒന്നു മുതൽ മെയ് 15 വരെയാണ് മലയാറ്റൂർ തീർത്ഥാടന കേന്ദ്രത്തിൽ വിശുദ്ധ വാരം. ഈ ദിവസങ്ങളിൽ ക്രമസമാധാന ചുമതലയ്ക്കായി കൂടുതൽ പോലീസുകാരെ വിന്യസിക്കും. ആവശ്യമായ പാർക്കിംഗ് സൗകര്യങ്ങളും ഗതാഗത നിയന്ത്രണങ്ങളും പോലീസിന്റെ നേതൃത്വത്തിൽ ഏർപ്പെടുത്തും. തിരുനാൾ ദിനങ്ങളിൽ പോലീസ് പട്രോളിഗ് ശക്തമാക്കും. പുഴയോരത്തും തടാകത്തിന്റെ സമീപത്തും സുരക്ഷാ മുന്നൊരുക്കങ്ങൾ ഒരുക്കും.  ഭിക്ഷാടനം നിയന്ത്രിക്കുന്നതിന് നടപടികൾ സ്വീകരിക്കും.

സിവിൽ സപ്ലൈസിന്റെ നേതൃത്വത്തിൽ സ്ക്വാഡുകൾ രൂപീകരിച്ച് കടകളിൽ പരിശോധന നടത്തും. വിലവിവര പട്ടിക പ്രദർശിപ്പിക്കാൻ കടകൾക്ക് നിർദേശം നൽകും.  അനധികൃത മദ്യ വിൽപ്പനയും ലഹരിപദാർത്ഥങ്ങളുടെ വില്പനയും തടയുന്നതിന് എക്സൈസിന്റെ നേതൃത്വത്തിൽ നടപടികൾ സ്വീകരിക്കും.

വനം വകുപ്പിന്റെ നേതൃത്വത്തിൽ വന സംരക്ഷണ - ബോധവൽക്കരണ ബോർഡുകൾ സ്ഥാപിക്കും. തീർത്ഥാടന കേന്ദ്രത്തിനോട്  ചേർന്ന വനമേഖലകളിൽ പരിശോധനകളും നടക്കും.  അടിവാരത്തും കുരിശുമുടിയിലും മെഡിക്കൽ സൗകര്യങ്ങൾ ഒരുക്കും.  ആംബുലൻസുകളും, സ്ട്രക്ചറുകളും, ഡോക്ടർമാരുടെ സേവനവും ഉറപ്പാക്കും. റോഡുകളിലെ സുരക്ഷ ഉറപ്പുവരുത്താനും കുഴികളും കാനകളും അടക്കുന്നതിനും അപകടസൂചികൾ സ്ഥാപിക്കുന്നതിനും പൊതുമരാമത്ത് വകുപ്പിന് നിർദേശം നൽകി.

തീർത്ഥാടകർ പുഴയിലും തടാകത്തിൽ ഇറങ്ങി ഉണ്ടാകുന്ന അപകടങ്ങൾ ഒഴിവാക്കാൻ സുരക്ഷാ നടപടികൾ സ്വീകരിക്കും. തീപിടിത്തം തുടങ്ങിയ സാഹചര്യങ്ങൾ ഒഴിവാക്കുന്നതിന് അഗ്നി രക്ഷാ സേനയുടെ സേവനം ഉറപ്പാക്കും. തിരുനാളിനോട് അനുബന്ധിച്ച് കെ.എസ്.ആർ.ടി.സിയുടെ നേതൃത്വത്തിൽ വിവിധ ഡിപ്പോകളിൽ നിന്ന് മലയാറ്റൂരിലേക്ക് സർവീസ് ആരംഭിക്കും.

പ്ലാസ്റ്റിക് കുപ്പികളും മറ്റ് മാലിന്യങ്ങളും തൽസമയം പെറുക്കി ശേഖരിക്കുന്നതിന് അടിവാരം മുതൽ കുരിശുമുടി വരെ  പ്രത്യേകം വോളണ്ടിയേഴ്സിനെ നിയമിക്കും.  ഗ്രീൻ പ്രോട്ടോകോൾ പാലിക്കുന്നതിനെക്കുറിച്ച് തീർത്ഥാടകരെ ബോധവാന്മാരാക്കാൻ ശുചിത്വമിഷന്റെ നേതൃത്വത്തിൽ പ്രവർത്തനങ്ങൾ നടക്കും. തീർത്ഥാടകർ കുപ്പിവെള്ളം ആവശ്യപ്പെടുന്ന സാഹചര്യം ഒഴിവാക്കാൻ ശുദ്ധീകരിച്ച കുടിവെള്ള ടാപ്പുകൾ സജ്ജമാക്കും. സ്റ്റീൽ പാത്രങ്ങളും സ്റ്റീൽ ഗ്ലാസുകളും ഏർപ്പെടുത്തും. എല്ലായിടങ്ങളിലും വേസ്റ്റ് ബിന്നുകൾ സ്ഥാപിക്കും.  കടകളിലെ മാലിന്യങ്ങൾ കൃത്യമായി നിർമാർജനം ചെയ്യുന്നതിന് സംവിധാനം സജ്ജമാക്കും.

 യോഗത്തിൽ അങ്കമാലി  ബ്ലോക്ക് പഞ്ചായത്ത് പ്രസിഡൻറ് മേരി ദേവസിക്കുട്ടി, ജില്ലാ പഞ്ചായത്ത് മെമ്പർ അനുമോൾ  ബേബി, മലയാറ്റൂർ- നീലീശ്വരം പഞ്ചായത്ത് 
പ്രസിഡന്റ് വിൻസൺ കോയിക്കര, ഡിവിഷണൽ ഫോറസ്റ്റ് ഓഫീസർ രവികുമാർ മീണ, അസിസ്റ്റന്റ് സൂപ്രണ്ട് ഓഫ് പോലീസ് ജുവനാപ്പുടി മഹേഷ്‌ , ആലുവ തഹസീൽദാർ സുനിൽ മാത്യു, കാലടി പോലീസ് സ്റ്റേഷൻ സി.ഐ  എൻ.എ അനൂപ്, മലയാറ്റൂർ പള്ളി വികാരി ഫാദർ വർഗീസ് മണവാളൻ, വിവിധ വകുപ്പ് ഉദ്യോഗസ്ഥർ, വൈദികർ തുടങ്ങിയവർ പങ്കെടുത്തു.