നിയമസഭാ ലൈബ്രറിയുടെ മദ്ധ്യ മേഖലാ ജില്ലകൾ കേന്ദ്രീകരിച്ച് തൃശ്ശൂരിൽ പരിപാടി

കേരള നിയമസഭാ ലൈബ്രറിയുടെ ശതാബ്ദിയോടനുബന്ധിച്ച് എറണാകുളം, ഇടുക്കി, തൃശ്ശൂർ, പാലക്കാട്, മലപ്പുറം എന്നീ മധ്യമേഖലാ ജില്ലകൾ കേന്ദ്രീകരിച്ചുള്ള പരിപാടി മെയ് രണ്ട് ചൊവ്വാഴ്ച തൃശ്ശൂരിലെ കേരള സംഗീത നാടക അക്കാദമി റീജിയണൽ തീയേറ്ററിൽ വച്ച് സംഘടിപ്പിക്കുകയാണ്. രാവിലെ 10.30 ന് ചേരുന്ന നിയമസഭാ ഡെപ്യൂട്ടി സ്പീക്കർ ചിറ്റയം ഗോപകുമാറിന്റെ അദ്ധ്യക്ഷതയിലുള്ള ഉദ്ഘാടന ചടങ്ങിൽ നിയമസഭാ സ്പീക്കർ എ. എൻ. ഷംസീർ പരിപാടിയുടെ ഉദ്ഘാടനം നിർവ്വഹിക്കും. തദവസരത്തിൽ മേയർ, മന്ത്രി ഡോ . ആർ ബിന്ദു, പ്രതിപക്ഷ നേതാവ് വി.ഡി. സതീശൻ, തൃശ്ശൂർ നഗരസഭാ സാമാജികർ, എം. പി. തുടങ്ങിയവർ ആശംസ അറിയിച്ച് സംസാരിക്കുന്നതാണ് . പരിപാടിയോടനുബന്ധിച്ച് നിയമസഭാ മ്യൂസിയം സംഘടിപ്പിക്കുന്ന ചരിത്ര പ്രദർശനം, നിയമസഭാ സാമാജികരുടെ രചനകളുടെ പ്രദർശനം നിയമസഭാ ലൈബ്രറിയെക്കുറിച്ചുള്ള ലഘു വീഡിയോ പ്രദർശനം, പ്രഭാഷണം എന്നിവ ഉണ്ടായിരിക്കുന്നതാണ്. തൃശ്ശൂർ ജില്ലയിലെ മുൻ സാമാജികർക്കും സാഹിത്യകാരൻ സച്ചിദാനന്ദനും ആദരം നൽകുന്ന ഈ ചടങ്ങിൽ മുൻ സാമാജികർ, തദ്ദേശ സ്വയംഭരണ പ്രതിനിധികൾ, ലൈബ്രറി കൗൺസിൽ അംഗങ്ങൾ, സാംസ്കാരിക പ്രവർത്തകർ എന്നിവർ പങ്കെടുക്കും. 'കേരളം : നവോത്ഥാനവും ശേഷവും എന്ന വിഷയത്തിൽ കേരള സാഹിത്യ അക്കാദമി പ്രസിഡന്റ് ശ്രീ. കെ. സച്ചിദാനന്ദൻ പ്രഭാഷണം നടത്തുന്നതാണ്. തുടർന്ന് കലാപരിപാടിയും ഉണ്ടായിരിക്കുന്നതാണ്.