'നവകേരളം വൃത്തിയുള്ള കേരളം' ക്യാമ്പയിൻ: സിവിൽ സ്റ്റേഷനിൽ പ്രത്യേക ശുചീകരണം നടത്തി

ജില്ലാ കളക്ടർ വി.ആർ പ്രേംകുമാർ തൂമ്പയെടുത്ത് മുന്നിൽ. ജില്ലാ വികസന കമ്മീഷനർ രാജീവ് കുമാർ ചൗധരി, എ.ഡി.എം എൻ.എം മെഹറലി എന്നിവരോടൊപ്പം ഡെപ്യൂട്ടി കലക്ടർമാരും ഉദ്യോഗസ്ഥരും ഒന്നിച്ച് കൂടെ കൂടിയപ്പോൾ സിവിൽ സ്റ്റേഷനും പരിസരവും ക്ലീൻ. മാലിന്യമുക്ത സംസ്ഥാനം ലക്ഷ്യമിട്ട് നടപ്പാക്കുന്ന 'നവകേരളം വൃത്തിയുള്ള കേരളം'  ക്യാമ്പയിന്റെ ഭാഗമായാണ് പ്രത്യേക ശുചീകരണം നടത്തിയത്. രാവിലെ പത്തിന് തുടങ്ങിയ ശുചീകരണം ഉച്ചവരെ നീണ്ടു. ബ്രഹ്മപുരം തീപിടിത്തതിന്റെ പശ്ചാതലത്തിലാണ് മാലിന്യസംസ്‌കരണത്തിന് പ്രത്യേക കർമപരിപാടികൾ ആവിഷ്‌കരിച്ചത്. മാലിന്യ സംസ്‌കരണത്തിന് നടപടി സ്വീകരിക്കണമെന്ന് ഹൈക്കോടതി സർക്കാരിനോട് ആവശ്യപ്പെട്ടിരുന്നു.
ട്രോമാകെയർ, സന്നദ്ധ പ്രവർത്തകർ, താലൂക്ക് ദുരന്തനിവാരണ സേന, എൻ.എസ്.എസ് വളണ്ടിയർമാർ, ശുചിത്വമിഷൻ, സർവീസ് സംഘടനകൾ എന്നിവരുടെ നേതൃത്വത്തിലാണ് ശുചീകരണ പരിപാടികൾ നടത്തിയത്. സിവിൽ സ്റ്റേഷനിലെ മുഴുവൻ ഓഫീസുകളിലും പരിസരത്തും ഇന്നലെ ശുചീകരണം നടത്തി. സിവിൽ സ്റ്റേഷൻ റോഡും സംഘം വൃത്തിയാക്കി. മെയ് 12ന് ജില്ലയിലെ മറ്റു സർക്കാർ ഓഫീസുകളും ശുചീകരിക്കാൻ നടപടി സ്വീകരിച്ചിട്ടുണ്ട്. ഓഫീസുകളിലുണ്ടാവുന്ന മാലിന്യങ്ങൾ തരം തിരിച്ച് ഹരിതകർമസേനക്കോ മറ്റു അംഗീകൃത ഏജൻസികൾക്കോ എല്ലാ മാസവും നൽകാനും സർക്കാർ നിർദേശം നൽകിയിട്ടുണ്ട്.