വൈപ്പിൻ മണ്ഡലം തീരസദസ്സ്: വിവിധ പദ്ധതികളിലായി വിതരണം ചെയ്തത് 87 ലക്ഷം രൂപയുടെ ധനസഹായം

തീരദേശ മേഖലയിലെ ജനങ്ങളുടെ പ്രശ്നങ്ങൾക്ക് പരിഹാരം നൽകാൻ ഫിഷറീസ് വകുപ്പിന്റെ നേതൃത്വത്തിൽ വൈപ്പിൻ മണ്ഡലത്തിൽ സംഘടിപ്പിച്ച തീര സദസ്സിൽ വിതരണം ചെയ്തത് 87,14,505 രൂപയുടെ ധനസഹായം.

മത്സ്യബന്ധനത്തിനിടയിൽ മരണപ്പെട്ട മത്സ്യത്തൊഴിലാളികളായ ഏഴിക്കര   കോഴിപ്പുറത്ത് വീട്ടിൽ ബാബു, എളങ്കുന്നപ്പുഴ പാണിക്കശ്ശേരി വീട്ടിൽ പി ബി ഷാജി എന്നിവരുടെ കുടുംബങ്ങൾക്ക് അപകട ഇൻഷുറൻസ് പദ്ധതി വഴി അനുവദിച്ച 10 ലക്ഷം രൂപ വീതം ധനസഹായം ചടങ്ങിൽ മന്ത്രി കൈമാറി. ബാബുവിൻ്റെ ഭാര്യ വിനീത, ഷാജിയുടെ ഭാര്യ ഷീജ എന്നിവർ മന്ത്രിയിൽ നിന്നും ധനസഹായം ഏറ്റുവാങ്ങി.

തീരസദസ്സിന്റെ ഭാഗമായി ലഭിച്ച വിവിധ അപേക്ഷകൾ പരിശോധിച്ച് വിവാഹ ധനസഹായമായി 138 ഗുണഭോക്താക്കൾക്ക് 10,000 രൂപ വീതം 13,80,000 രൂപ വിതരണം ചെയ്തു. മരണാനന്തര ധനസഹായമായി 21 പേർക്ക് 15,000 രൂപ വീതം  3,15,000 രൂപയും നൽകി. സാഫ് വനിതാ സൂക്ഷമ തൊഴിൽ സംരംഭങ്ങൾക്കും വർക്കിംഗ് ക്യാപിറ്റലായി 8,99,505 രൂപയും നൽകി.

മത്സ്യഫെഡിൻ്റെ നേതൃത്വത്തിൽ എടവനക്കാട്, പഴങ്ങാട്, പള്ളിപ്പുറം, കുഴുപ്പള്ളി എന്നിവിടങ്ങളിലുള്ള എഫ്ഡിഡബ്ല്യുസിഎസ്  സൊസൈറ്റികൾക്കായി 41,20,000 രൂപയും വിതരണം ചെയ്തു.

മത്സ്യ തൊഴിലാളികളുടെ സുരക്ഷ മുൻനിർത്തി മത്സ്യ തൊഴിലാളികൾക്കായി കോസ്റ്റ് ഗാർഡ് നൽകുന്ന 25 ലൈഫ് ജാക്കറ്റുകളും ചടങ്ങിൽ വിതരണം ചെയ്തു.

മത്സ്യത്തൊഴിലാളി മേഖലയിൽനിന്നും വിവിധ മേഖലകളിൽ പ്രാവീണ്യം തെളിയിച്ച എട്ട് പേരെയും കലാകായിക, വിദ്യാഭ്യാസ മേഖലകളിൽ പ്രാവീണ്യം തെളിയിച്ച 15 പേരെയും ചടങ്ങിൽ  മന്ത്രി ആദരിച്ചു.