മന്ദലാംകുന്ന് കുടിവെള്ള പദ്ധതി നാടിന് സമർപ്പിച്ചു

പുന്നയൂർ ഗ്രാമപഞ്ചായത്തിലെ മന്ദലാംകുന്ന് കുടിവെള്ള പദ്ധതി എൻ കെ അക്ബർ എംഎൽഎ നാടിന് സമർപ്പിച്ചു. മുൻ എംഎൽഎ കെ വി അബ്ദുൾ ഖാദർ മുഖ്യാതിഥിയായി. പുന്നയൂർ ഗ്രാമപഞ്ചായത്ത് പ്രസിഡന്റ് ടി വി സുരേന്ദ്രൻ അധ്യക്ഷത വഹിച്ചു. ബ്ലോക്ക് പഞ്ചായത്ത് സ്ഥിരം സമിതി അധ്യക്ഷൻ കെ കമറുദ്ദീൻ,പഞ്ചായത്ത് വികസന കാര്യ സ്റ്റാൻഡിങ് കമ്മിറ്റി ചെയർമാൻ കെ എ വിശ്വനാഥൻ മാസ്റ്റർ, പഞ്ചായത്ത് അംഗങ്ങളായ അസീസ് മന്ദലാംകുന്ന്, എംകെ അറഫത്ത്, സുഹറ ബക്കർ, റസീന ഉസ്മാൻ, ഷൈബ ദിനേശൻ , ജനപ്രതിനിധികൾ തുടങ്ങിയവർ പങ്കെടുത്തു.വൈസ് പ്രസിഡന്റ് സലീന നാസർ സ്വാഗതവും സെക്രട്ടറി എൻ വി ഷീജ നന്ദിയും പറഞ്ഞു. ഭൂജല വകുപ്പ് ജില്ല ഓഫീസർ എസ് സന്തോഷ് റിപ്പോർട്ട് അവതരിപ്പിച്ചു.

എൻ കെ അക്ബർ എം എൽ എ യുടെ ആസ്തി വികസന ഫണ്ടിൽ നിന്നും 12 ലക്ഷം രൂപ വിനിയോഗിച്ചാണ് പദ്ധതി യാഥാർത്ഥ്യമാക്കിയത്.മുൻ ഗുരുവായൂർ എംഎൽഎ കെ വി അബ്ദുൾ ഖാദറാണ് പദ്ധതിയുടെ പ്രപ്പോസിൽ മുന്നോട്ട് വച്ചത്.

കനോലി കനാലിനോട് ചേർന്ന് താമസിക്കുന്ന ഇരുപത്തിയൊന്നോളം കുടുംബങ്ങളുടെ രൂക്ഷമായ കുടിവെള്ള പ്രശ്നത്തിന് ഇതോടെ പരിഹാരമാകും.

പഞ്ചായത്തിലെ 1, 20 വാർഡുകളിലെ കുടിവെള്ളം പരിഹരിക്കുന്നതിനായി, പുന്നയൂർ പഞ്ചായത്ത് ആസൂത്രണ സമിതി ഉപാധ്യക്ഷൻ എം പി ഇക്ബാൽ മാസ്റ്റർ സൗജന്യമായി നൽകിയ ഒന്നര സെന്റ് ഭൂമിയിലാണ് പദ്ധതി പ്രാവർത്തികമാക്കിയത്. കുഴൽ കിണർ, ജലസംഭരണി, മോട്ടോർ പുര, എന്നിവ തയ്യാറാക്കിയിട്ടുണ്ട്. നാല്പതോളം വീടുകളിലേക്ക് പൈപ്പ് കണക്ഷൻ വഴി കുടിവെള്ളമെത്തിക്കാൻ പദ്ധതിയിലൂടെ കഴിയും.