ശുചിത്വ മിഷനിൽ അസിസ്റ്റന്റ് ജില്ലാ കോ ഓർഡിനേറ്റർ നിയമനം

തദ്ദേശസ്വയംഭരണ വകുപ്പിന്റെ കീഴിലുള്ള ജില്ലാ ശുചിത്വമിഷനുകളിൽ അസിസ്റ്റന്റ് ജില്ലാ കോ ഓർഡിനേറ്റർ തസ്തികയിലേക്ക് സംസ്ഥാന സർക്കാറിന്റെ വിവിധ വകുപ്പുകളിൽ ജോലി നോക്കുന്നവരിൽ നിന്നും ഡെപ്യൂട്ടേഷൻ വ്യവസ്ഥയിൽ അപേക്ഷ ക്ഷണിച്ചു. പത്തനംതിട്ട, ഇടുക്കി, എറണാകുളം, തൃശൂർ, മലപ്പുറം, കോഴിക്കോട്, കണ്ണൂർ, കാസർക്കോട് എന്നീ ജില്ലകളിൽ അസിസ്റ്റന്റ് ജില്ലാ കോ ഓർഡിനേറ്റർ (ഐ.ഇ.സി) ഒഴിവിലേക്കും പത്തനംതിട്ട, ആലപ്പുഴ, എറണാകുളം, തൃശൂർ, മലപ്പുറം, വയനാട് എന്നീ ജില്ലകളിൽ അസിസ്റ്റന്റ് ജില്ലാ കോ ഓർഡിനേറ്റർ (സോളിഡ് വേസ്റ്റ് മാനേജ്മെന്റ്) ഒഴിവിലേക്കുമാണ് അപേക്ഷ ക്ഷണിച്ചത്. അസിസ്റ്റന്റ് കോ-ഓര്‍ഡിനേറ്റർ തസ്തികയിലേക്ക് (ഐ.ഇ.സി) അപേക്ഷിക്കുന്നവർ 39300-83000 എന്ന ശമ്പള സ്‌കെയിലിൽ സർക്കാർ മേഖലകളിൽ ജോലി ചെയ്യുന്നവരും വിവര വിജ്ഞാന വ്യാപന പ്രവർത്തന മേഖലയിൽ താത്പര്യമുള്ളവരുമായിരിക്കണം. സർക്കാർ അംഗീകൃത സ്ഥാപനത്തിൽ നിന്നും ജേർണലിസത്തിൽ ബിരുദം/ബിരുദാനന്ത ബിരുദം, ജേർണലിസം ആൻഡ് മാസ് കമ്മ്യൂണിക്കേഷനിൽ ബിരുദം, എം.എസ്.ഡബ്ല്യൂ എന്നിവയിൽ ഏതെങ്കിലും യോഗ്യതയും ബന്ധപ്പെട്ട മേഖലയിൽ ചുരുങ്ങിയത് രണ്ട് വർഷത്തെ പ്രവൃത്തി പരിചയവും ഉള്ളവർക്ക് മുൻഗണനയുണ്ട്.
അസിസ്റ്റന്റ് ജില്ലാ കോ-ഓഡിനേറ്റേർ (സോളിഡ് വേസ്റ്റ് മാനേജ്മെന്റ്)തസ്തികയിൽ അപേക്ഷിക്കുന്നവർ 43400-91200 ശമ്പള സ്‌കെയിലിൽ സംസ്ഥാന സർക്കാർ സർവീസിൽ ജോലി ചെയ്യുന്നവരും സയൻസ് വിഷയത്തിൽ ബിരുദം/സിവിൽ എൻജിനീയറിങ് ഡിപ്ലോമ/ബിരുദം ഉള്ളവരും എൻജിനീയറിങ് യോഗ്യത നേടിയ ശേഷം ബന്ധപ്പെട്ട മേഖലയിൽ പ്രവൃത്തി പരിചയമുള്ളവർക്ക് മുൻഗണനയുമുണ്ട്. താത്പര്യമുള്ളവർ അപേക്ഷകൾ കെ.എസ്.ആർ പാർട്ട് (1) റൂൾ 144 പ്രകാരമുള്ള അപേക്ഷ, നിലവിലെ വകുപ്പ് മേധാവിയുടെ നിരാക്ഷേപ പത്രം സഹിതം ജൂൺ 15 വൈകീട്ട് മൂന്നിന് മുമ്പായി എക്സിക്യൂട്ടീവ് ഡയറക്ടർ,സംസ്ഥാന ശുചിത്വ മിഷൻ, റവന്യൂ കോംപ്ലക്സ് നാലാം ഫ്ളോർ, പബിക് ഓഫീസ് കോമ്പൗണ്ട്, തിരുവനന്തപുരം-695033 എന്ന വിലാസത്തിൽ ലഭ്യമാകും വിധം നേരിട്ടോ, തപാൽ വഴിയോ സമർപ്പിക്കണം. വിശദ വിവരങ്ങൾ: www.suchitwamission.org എന്ന വെബ് സൈറ്റിൽ ലഭിക്കും.