നടുവട്ടം ജനത സ്‌കൂളില്‍ ഹയര്‍ സെക്കന്‍ഡറി കെട്ടിടത്തിന്റെ ശിലാസ്ഥാപനം നടന്നു മുഹമ്മദ് മുഹ്‌സിന്‍ എം.എല്‍.എ നിര്‍വഹിച്ചു
പട്ടാമ്പി മണ്ഡലത്തില്‍ മികവിന്റെ കേന്ദ്രമായി തെരഞ്ഞെടുത്ത നടുവട്ടം ജനതാ സ്‌കൂളിലെ ഹയര്‍ സെക്കന്‍ഡറി വിഭാഗത്തിനായുള്ള കെട്ടിടത്തിന്റെ ശിലാസ്ഥാപനം മുഹമ്മദ് മുഹ്‌സിന്‍ എം.എല്‍.എ നിര്‍വഹിച്ചു. പൊതു വിദ്യാഭ്യാസ വകുപ്പിന്റെ 2022-23 വര്‍ഷത്തെ ഫണ്ടില്‍ നിന്ന് രണ്ട് കോടിയിലാണ് കെട്ടിടം നിര്‍മിക്കുന്നത്. രണ്ട് നിലകളിലായി നിര്‍മിക്കുന്ന കെട്ടിടത്തില്‍ ക്ലാസ് മുറികള്‍, ലാബുകള്‍, ഓഫീസ് റൂം, സ്റ്റാഫ് റൂം, സ്റ്റോര്‍ റൂം, ശുചിമുറികള്‍ എന്നിവയുണ്ടാകും. സ്‌കൂളിന് ആവശ്യമായ ഭൗതിക സാഹചര്യങ്ങള്‍ ഒരുക്കി മികവിന്റെ കേന്ദ്രമാക്കി മാറ്റുകയാണ് ലക്ഷ്യം. ഹയര്‍ സെക്കന്‍ഡറി വിഭാഗത്തിനായി എംഎല്‍.എയുടെ ആസ്തിവികസന ഫണ്ടില്‍ നിന്നും അനുവദിച്ചിട്ടുള്ള കെട്ടിടത്തിന്റെ നിര്‍മ്മാണ പ്രവര്‍ത്തിയും പുരോഗമിക്കുകയാണ്.
ശിലാസ്ഥാപന പരിപാടിയില്‍ ജില്ലാ പഞ്ചായത്ത് പ്രസിഡന്റ് കെ. ബിനുമോള്‍, ജില്ലാ പഞ്ചായത്ത് വിദ്യാഭ്യാസ സ്റ്റാന്‍ഡിങ് കമ്മിറ്റി ചെയര്‍പേഴ്‌സണ്‍ എ. ഷാബിറ, പി.ടി.എ പ്രസിഡന്റ് കരീം, പ്രിന്‍സിപ്പാള്‍ ജൂഡ് ലൂയിസ്, പ്രാധാനധ്യാപിക ഡോ. രാധാമണി അയങ്കലത്ത്, വിവിധ രാഷ്ട്രീയ പാര്‍ട്ടി പ്രതിനിധികള്‍ തുടങ്ങിയവര്‍ പങ്കെടുത്തു.
- Log in to post comments