നവകേരള സദസ്സിലെ നിവേദനങ്ങളിൽ തുടർനടപടി: കുന്ദമംഗലം മണ്ഡല അദാലത്ത് നടന്നു

നവകേരള സദസ്സിൽ കുന്ദമംഗലം നിയോജക മണ്ഡലത്തിൽ നിന്നും തദ്ദേശസ്വയംഭരണ വകുപ്പിന് ലഭിച്ച 1559 നിവേദനങ്ങളിൽ സ്വീകരിച്ച തുടർനടപടികൾ പരിശോധിക്കുന്നതിനും മറുപടികളും നടപടികളും കുറ്റമറ്റതാക്കുന്നതിനുമായി ഉദ്യോഗസ്ഥരുടെ നേതൃത്വത്തിൽ കുന്ദമംഗലം ബ്ലോക്ക് പഞ്ചായത്ത് ഹാളിൽ അദാലത്ത് സംഘടിപ്പിച്ചു.

കുന്ദമംഗലം ഗ്രാമപഞ്ചായത്തിന്റെ 370 നിവേദനങ്ങളും, മാവൂർ 179, പെരുമണ്ണ 122, പെരുവയൽ 285, മടവൂർ 147, ഒളവണ്ണ 229, ചാത്തമംഗലം  206, ബ്ലോക്ക് പഞ്ചായത്ത് 21 എന്നിങ്ങനെ ലഭിച്ച നിവേദനങ്ങളുടെ സൂക്ഷ്മ പരിശോധനയാണ് അദാലത്തിൽ നടന്നത്. 

നാളിതുവരെ മറുപടി നൽകാത്ത നിവേദനങ്ങളിൽ 22-ാം തിയ്യതിക്കുള്ളിൽ മറുപടി നൽകി നവകേരള പോർട്ടലിൽ പ്രസ്തുത വിവരം രേഖപ്പെടുത്താൻ തീരുമാനമായി. ഇരുപതോളം അപേക്ഷകൾ ജില്ലാതല അദാലത്തിന്റെ പരിഗണനക്കായി നൽകി. വീട് നിർമ്മാണം, തീരദേശ പരിപാലന നിയമത്തിലെ ഇളവുകൾ, ബിൽഡിംഗ് നിർമ്മാണം, വിവിധ വികസന പ്രശ്നങ്ങൾ, പൊതു പ്രശ്നങ്ങൾ എന്നിവയാണ് നിവേദനങ്ങളായി ലഭിച്ചത്.

വിവിധ തദ്ദേശ സ്വയംഭരണ സ്ഥാപനങ്ങളിൽ നിന്നായി 32 ഉദ്യോഗസ്ഥർ അദാലത്തിൽ പങ്കെടുത്തു. അദാലത്തിന് ഇന്റേണൽ വിജിലൻസ് ഓഫീസർ ടി  ഷാഹുൽ ഹമീദ്, ജൂനിയർ സൂപ്രണ്ടുമാരായ കെ കെ സാവിത്രി, ബി ഗീത, ഉദ്യോഗസ്ഥൻമാരായ പി എ സുലൈഖ, വി ജെ  ജിജിൻ, കെ സ്മൃതി, സി ബി  ദിനചന്ദ്രൻ , ബി ഡി ഒ(ഇൻ ചാർജ്) എം വി സുധീർ, ആർ ജി എസ് എ ബ്ലോക്ക് കോർഡിനേറ്റർ നീതു പി സോമൻ എന്നിവർ നേതൃത്വം നൽകി.