രസകരം ഈ റെസിഡൻഷ്യൽ പാർക്ക്

സിഎസ്എംഎൽ സഹകരണത്തോടെ ജിസിഡിഎ നവീകരിച്ച ഗാന്ധിനഗർ റെസിഡൻഷ്യൽ പാർക്കിന്റെ ഉദ്ഘാടനം കൊച്ചി മേയർ അഡ്വ. എം അനിൽകുമാർ നിർവഹിച്ചു. ജിസിഡിഎ ചെയർമാൻ കെ. ചന്ദ്രൻ പിള്ള അധ്യക്ഷത വഹിച്ച ചടങ്ങിൽ എറണാകുളം എംഎൽഎ ടി. ജെ. വിനോദ് മുഖ്യപ്രഭാഷണം നടത്തി.

ഉല്ലാസവും മനോഹാരിതയും സമന്വയിപ്പിക്കും വിധമുള്ള ആധുനിക സൗകര്യങ്ങളോടെയാണ് റെസിഡൻഷ്യൽ പാർക്ക് നവീകരിച്ചിട്ടുള്ളത്. ആളുകൾക്ക് ഒത്തുകൂടുന്നതിനും വിനോദങ്ങളിൽ ഏർപ്പെടുന്നതിനും മറ്റുമായി വിശാലമായൊരു ഓപ്പൺ ഗ്രൗണ്ടും പരിപാടികൾ അവതരിപ്പിക്കുന്നതിനായി സ്റ്റേജും കുട്ടികൾക്കായുള്ള പ്ലേ ഏരിയ യും പാർക്കിന്റെ വിവിധ ഇടങ്ങളിൽ ഇരിപ്പിടങ്ങളും, ഓപ്പൺ ജിം സൗകര്യവും, ഓപ്പൺ ഗ്രൗണ്ട് ഒരു ഭാഗത്തായി ഫീച്ചർ വാളും നൽകിയിട്ടുണ്ട് .കൂടാതെ നടപ്പാതയും ശുചിമുറികളോടുകൂടിയ ഒരു ബിൽഡിംഗും ഉൾപ്പെടുത്തിയിട്ടുള്ളതാണ്. ഗാന്ധിനഗർ, പനമ്പിള്ളി നഗർ എന്നിവിടങ്ങളിലായി 9 പാർക്കുകളുടെ നവീകരണമാണ് 2.87 കോടി രൂപ ചിലവിൽ പൂർത്തീകരിക്കുന്നത്. 37 ലക്ഷം രൂപ ചിലവിലാണ് റെസിഡൻഷ്യൽ പാർക്കിന്റെ നവീകരണം പൂർത്തീകരിച്ചിട്ടുള്ളത്. 1980 കാലഘട്ടത്തിന്റെ തുടക്കത്തിൽ ജിസിഡിഎ തന്നെ സ്ഥലം ഏറ്റെടുത്തു വികസിപ്പിച്ചെടുത്തതാണ് ഈ പാർക്കുകൾ.

സിഎസ്എംഎൽ സിഇഒ ഷാജി വി നായർ ഐഎഎസ്, ഗാന്ധിനഗർ ഡിവിഷൻ കൗൺസിലർ ബിന്ദു ശിവൻ, ജിസിഡിഎ എക്സിക്യൂട്ടീവ് കമ്മിറ്റി അംഗം എ ബി സാബു, ജിസിഡിഎ സെക്രട്ടറി രാജേഷ് ടി എൻ, സൂപ്രണ്ടിംഗ് എഞ്ചിനീയർ ശ്രീലത പി ആർ, സീനിയർ ടൗൺ പ്ലാനർ എം എം ഷീബ, റെസിഡന്റ്സ് അസോസിയേഷൻ പ്രതിനിധികൾ എന്നിവർ ആശംസകൾ അറിയിച്ച്‌ സംസാരിച്ചു. ബാംഗ്ലൂരു ആസ്ഥാനമായ സോൾ സിറ്റീസ് അർബൻ ഇൻഫ്രാസ്ട്രക്ചർ എന്ന സ്ഥാപനമാണ് പാർക്കുകളുടെ രൂപകല്പന തയ്യാറാക്കിയിട്ടുള്ളത്.