വയനാട് ഉപതിരഞ്ഞെടുപ്പ്: ജില്ല അതിർത്തികളിൽ നിരീക്ഷണം ശക്തമാക്കണം: ചെലവ് നിരീക്ഷകൻ

വയനാട് ഉപതെരഞ്ഞെടുപ്പിൻ്റെ പശ്ചാത്തലത്തിൽ അനധികൃത പണക്കടത്തും മറ്റും തടയുന്നതിനായി ജില്ല അതിർത്തികളിൽ വിവിധ സ്ക്വാഡുകളുടെ നേതൃത്വത്തിൽ  ശക്തമായ നിരീക്ഷണം നടക്കുന്നുണ്ടെന്ന് ഉറപ്പുവരുത്തണമെന്ന് എക്സ്പെൻഡീച്ചർ പരിശോധനാ വിഭാഗത്തിന് കേന്ദ്ര ചെലവ് നിരീക്ഷകൻ സീതാറാം മീണ നിർദ്ദേശം നൽകി. ചൊവ്വാഴ്ച കളക്ടറേറ്റിൽ എത്തിയ അദ്ദേഹം ജില്ലാ തിരഞ്ഞെടുപ്പ് ഓഫീസറായ ജില്ലാ കളക്ടർ സ്നേഹിൽ കുമാർ സിംഗ്, സബ് കളക്ടർ ഹർഷിൽ ആർ മീണ, തിരഞ്ഞെടുപ്പ് ഡെപ്യൂട്ടി കളക്ടർ ശീതൾ ജി മോഹൻ എന്നിവരുമായി കൂടിക്കാഴ്ച നടത്തി. 

തിരഞ്ഞെടുപ്പുമായി ബന്ധപ്പെട്ട് തിരുവമ്പാടി മണ്ഡലത്തിൽ പ്രവർത്തിക്കുന്ന വിവിധ സ്ക്വാഡുകളുടെ പ്രവർത്തനം അദ്ദേഹം വിലയിരുത്തി. ഒമ്പത് സ്റ്റാറ്റിക് സർവൈലൻസ് ടീം, മൂന്നു ഫ്ലയിംഗ് സ്ക്വാഡ്, നാല് ആൻറി ഡീഫെയിസ്മെൻ്റ് സ്ക്വാഡ്, ഒരു വീഡിയോ സർവൈലൻസ് ടീം എന്നിവയാണ് മണ്ഡലത്തിൽ പ്രവർത്തിക്കുന്നത്. 

തിരഞ്ഞെടുപ്പ് നിരീക്ഷണത്തിന്റെ ഭാഗമായി വയനാട് പിഡബ്ല്യുഡി റസ്റ്റ് ഹൗസിലാണ് അദ്ദേഹം താമസം. ബന്ധപ്പെടേണ്ട നമ്പർ: 9408791788.

യോഗത്തിൽ എക്സ്പെൻഡീച്ചർ നോഡൽ ഓഫീസർ കെ പി മനോജൻ, അസിസ്റ്റൻറ് എക്സ്പെൻഡിച്ചർ ഓഫീസർ പ്രീത സ്കറിയ, താമരശ്ശേരി ഡിവൈഎസ്പി എ പി ചന്ദ്രൻ തുടങ്ങിയവർ പങ്കെടുത്തു.