v

മഴ തുടരുന്ന സാഹചര്യത്തില്‍ എലിപ്പനിമടക്കമുള്ള പകര്‍ച്ചവ്യാധികള്‍ക്കെതിരേ മുന്‍കരുതല്‍ എടുക്കണമെന്ന് ജില്ലാ മെഡിക്കല്‍ ഓഫീസര്‍ (ആരോഗ്യം) അറിയിച്ചു. 
മലിനജലവുമായി സമ്പര്‍ക്കത്തിലേര്‍പ്പെടുന്നവരും ശുചീകരണ പ്രവര്‍ത്തനങ്ങളില്‍ ഏര്‍പ്പെടുന്നവരും ഓടകളിലും തോടുകളിലും വയലുകളിലും കുളങ്ങളിലും (ഗര്‍ഭിണികളും 12 വയസ്സിനു താഴെയുളള കുട്ടികളും ഒഴികെ) നിര്‍ബന്ധമായും ആഴ്ചയിലൊരിക്കല്‍ എലിപ്പനി പ്രതിരോധ ഗുളികയായ ഡോക്സി സൈക്ലിന്‍ 200 മിലി ഗ്രാം (100 മിലിഗ്രാമിന്റെ 2 ഗുളികകള്‍) കഴിച്ചിരിക്കണം. കൂടാതെ കട്ടി കൂടിയ റബ്ബര്‍ കാലുറകള്‍, കയ്യുറകള്‍ എന്നിവ ധരിക്കണം. മലിനജലവുമായി സമ്പര്‍ക്കം വരുന്ന കാലമത്രയും ആഴ്ചയില്‍ 200 മിലി ഗ്രാം വീതം ഇതു തുടരണം. ഡോക്സി സൈക്ലിന്‍ ഗുളികകള്‍ സൗജന്യമായി എല്ലാ സര്‍ക്കാര്‍ ആശുപത്രികളിലും ലഭ്യമാണ്. ഗര്‍ഭിണികളും 12 വയസ്സിനു താഴെ ഉളള കുട്ടികളും ഡോക്ടറെ സമീപിച്ച് നിര്‍ദേസമനുസരിച്ച പ്രതിരോധ മരുന്നുകള്‍ കഴിക്കേണ്ടതാണ്.

എലിപ്പനി രോഗാണു വാഹകരായ ജീവികളുടെ മൂത്രം കലര്‍ന്ന ജലമോ, മണ്ണോ, മറ്റു വസ്തുക്കളുമായോ ഉളള സമ്പര്‍ക്കത്തില്‍ കൂടിയാണ് എലിപ്പനി പകരുന്നത്. അതിനാല്‍ രോഗ പകര്‍ച്ചയ്ക്കു സാധ്യതയുളള സാഹചര്യങ്ങളില്‍ ജോലി ചെയ്യുന്നവര്‍ പ്രത്യേകം ശ്രദ്ധിക്കണം. കൈകാലുകളില്‍ മുറിവുളളവര്‍ അവ ഉണങ്ങുന്നത് വരെ ഇത്തരം ജോലികള്‍ കഴിവതും ചെയ്യാതിരിക്കാന്‍  ശ്രമിക്കുക. ജോലിക്ക് പോകുന്നതിനു മുന്‍പും ജോലി കഴിഞ്ഞു വന്നതിനു ശേഷവും മുറിവുകള്‍ ആന്റിസെപ്റ്റിക് ലേപനങ്ങള്‍ ഉപയോഗിച്ച് ഡ്രസ്സ് ചെയ്യേണ്ടതാണ്. 

ലക്ഷണങ്ങള്‍
 

• വിറയലോടുകൂടിയ പനി
• കഠിനമായ തലവേദന
• ശരീരവേദന
• കണ്ണില്‍ ചുവപ്പ്
• തൊലിപ്പുറത്ത് ചുവന്ന തടിപ്പ്

രോഗലക്ഷണങ്ങള്‍ കണ്ടാല്‍ ഉടനെ അടുത്തുള്ള സര്‍ക്കാര്‍ ആശുപത്രിയില്‍ വിദഗ്ധ ചികിത്സ തേടേണ്ടതാണ്. സ്വയം ചികിത്സ യാതൊരു കാരണവശാലും പാടില്ല. ചികിത്സ തേടുന്നതിനുളള കാലതാമസം രോഗം ഗുരുതരമാക്കാന്‍ ഇടയാക്കുമെന്നും അധികൃതര്‍ അറിയിച്ചു.