പുത്തൂർ സുവോളജിക്കൽ പാർക്കിൽ അതിജീവന പാർക്കും സജ്ജമാക്കും : ഗവ. ചീഫ് വിപ്പ് കെ രാജൻ

പുത്തൂർ സുവോളജിക്കൽ പാർക്കിൽ അതിജീവനപാർക്കും സജ്ജമാക്കുമെന്ന് ഗവ. ചീഫ് വിപ് അഡ്വ. കെ രാജൻ പറഞ്ഞു. ലോക പരിസ്ഥിതി ദിനത്തോടനുബന്ധിച്ച് സുവോളജിക്കൽ പാർക്കിൽ വൃക്ഷത്തൈ നട്ടു പിടിപ്പിക്കുന്നതിന്റെ ഉദ്ഘാടനം നിർവഹിച്ച് സംസാരിക്കുകയായിരുന്നു അദ്ദേഹം. വരും തലമുറക്ക് കൊറോണ പ്രതിരോധത്തിന്റെ അനുഭവങ്ങൾ ബോധ്യപ്പെടുത്തുകയാണ് ലക്ഷ്യം. രോഗ പ്രതിരോധത്തിനുതകുന്ന വിവിധ ഔഷധസസ്യങ്ങളും വൃക്ഷങ്ങളുമാണ് അതിജീവന പാർക്കിൽ നടുകയെന്നും അദ്ദേഹം വ്യക്തമാക്കി.
സുവോളജിക്കൽ പാർക്കിനെ 10 വ്യത്യസ്ത മേഖലകളായി തിരിച്ച് ഓരോ മേഖലയ്ക്കും അനുയോജ്യമായ വൃക്ഷങ്ങൾ, മുള, പന, വിവിധയിനം പുഷ്പലതാദികൾ എന്നിവയുടെ പത്തുലക്ഷത്തോളം തൈകൾ നട്ടു പിടിപ്പിക്കുന്നതിനുള്ള പദ്ധതിയാണ് ആവിഷ്‌കരിച്ചിട്ടുള്ളത്. ചാലക്കുടിയിലെ വനം വകുപ്പിന്റെ നഴ്‌സറിയിൽ നിന്നാണ് ഇതിനായി തൈകൾ കൊണ്ടുവരിക. 15000 ത്തോളം വിവിധ വൃക്ഷത്തൈകളും അത്രത്തന്നെ വിവിധയിനം മുള, പന എന്നിവയുടെ തൈകളുമാണ് ലോക പരിസ്ഥിതി ദിനത്തോടനുബന്ധിച്ച് വച്ചുപിടിപ്പിച്ചത്. വിവിധ ജീവികളുടെ ആവാസ വ്യവസ്ഥയ്ക്ക് അനുയോജ്യമായ ഒരു ലാൻഡ്‌സ്‌കേപ്പ് പ്ലാൻ ആണ് പാർക്കിനായി വിഭാവനം ചെയ്തിട്ടുള്ളത്.

338 ഏക്കർ വനഭൂമിയിൽ വന്യജീവികളെ പരിപാലിക്കുന്നതിനായി വിശാലമായ സൗകര്യങ്ങളോടുകൂടിയ സുവോളജിക്കൽ പാർക്കാണ് രൂപകൽപ്പന ചെയ്തിട്ടുള്ളത്. 2020 അവസാനത്തോടെ തൃശൂർ മൃഗശാലയിലുള്ള മൃഗങ്ങളെ പുത്തൂരിലേക്ക് മാറ്റുവാനാണ് ലക്ഷ്യമിടുന്നതെന്നും ചീഫ് വിപ്പ് കെ രാജൻ പറഞ്ഞു.
ചടങ്ങിൽ ഡെപ്യൂട്ടി കൺസർവേറ്റർ ഓഫ് ഫോറസ്റ്റ് ആൻഡ് സ്‌പെഷ്യൽ ഓഫീസർ കെ എസ് ദീപ, പുത്തൂർ ഗ്രാമ പഞ്ചായത്ത് പ്രസിഡണ്ട് മിനി ഉണ്ണികൃഷ്ണൻ, ക്ഷേമകാര്യ സ്റ്റാൻഡിങ് കമ്മിറ്റി ചെയർമാൻ ആൻഡ്രൂസ് കൊഴുക്കുള്ളിക്കാരൻ, ഗ്രാമപഞ്ചായത്ത് മെമ്പർമാരായ വി ആർ രമേശ്, ഗോപി കുറ്റിക്കൽ, പ്രേമ മണി, അസിസ്റ്റൻറ് ഫോറസ്റ്റ് കൺസർവേറ്റർ ആൻഡ് സ്‌പെഷ്യൽ ഓഫീസർ നിബു കിരൺ സി ഒ തുടങ്ങിയവർ പങ്കെടുത്തു.