കയര്‍ റൂട്ട് ട്രെയിനര്‍ പദ്ധതിയുടെ സംസ്ഥാനതല ഉദ്ഘാടനം മന്ത്രി അഡ്വ.കെ രാജു നിര്‍വഹിച്ചു
സംസ്ഥാന വനംവകുപ്പ് വികസിപ്പിച്ചെടുത്ത കയര്‍ റൂട്ട് ട്രെയിനര്‍ പദ്ധതിയുടെ സംസ്ഥാനതല ഉദ്ഘാടനം വനം-വന്യജീവി വകുപ്പ് മന്ത്രി അഡ്വ.കെ രാജു നിര്‍വഹിച്ചു. നിലമ്പൂര്‍ വനം ഡിവിഷന്‍ ഓഫീസില്‍ നഗര വനത്തിനായി ഒരുക്കിയ അഞ്ച് സെന്റ് സ്ഥലത്ത് നെല്ലി നട്ടുകൊണ്ടാണ് പദ്ധതിയുടെ ഉദ്ഘാടനം മന്ത്രി നിര്‍വഹിച്ചത്. വനങ്ങളുടെ ചെറുമാതൃകകള്‍ നഗരങ്ങളില്‍ പുനസൃഷ്ടിക്കുന്ന നഗരവനം പദ്ധതിയുടെ ഉദ്ഘാടനവും കേരള വനം കായിക മേള സ്മരണിക പ്രകാശനവും മന്ത്രി ചടങ്ങില്‍ നിര്‍വഹിച്ചു. പരിപാടിയില്‍ പി.വി അന്‍വര്‍ എം.എല്‍.എ അധ്യക്ഷനായി. പി.വി അബ്ദുല്‍ വഹാബ് എം.പി മുഖ്യാതിഥിയായി.
മനുഷ്യന്റെയും ജീവജാലങ്ങളുടെയും നിലനില്‍പ്പാണ് വനസംരക്ഷണത്തിലൂടെ ലക്ഷ്യമിടുന്നതെന്നും ഇതിനായി നിരവധി പദ്ധതികള്‍ സര്‍ക്കാര്‍ രൂപവത്കരിച്ചിട്ടുണ്ടെന്നും മന്ത്രി പറഞ്ഞു. അടച്ചുപൂട്ടിയ നിലമ്പൂര്‍ വുഡ് ഇന്‍ഡസ്ട്രീസ് ഹാളും കെട്ടിടവും ടൂറിസവുമായി ബന്ധപ്പെടുത്തി പ്രവര്‍ത്തനം ആരംഭിക്കുമെന്നും മന്ത്രി അറിയിച്ചു. വേദിയില്‍ പി.വി അന്‍വര്‍ എം.എല്‍.എ ആവശ്യപ്പെട്ട കുടുംബവനം പദ്ധതിക്ക് മന്ത്രി അനുമതി നല്‍കി. ഇതിനായി വനംവകുപ്പില്‍ നിന്ന് സൗജന്യമായി തൈകള്‍ നല്‍കുമെന്നും അദ്ദേഹം പറഞ്ഞു.
സംസ്ഥാനത്ത് ഓരോ വര്‍ഷവും കോടിക്കണക്കിന് തൈകളാണ് വിതരണം ചെയ്യുന്നത്. ഇതിനായി ഉപയോഗിക്കുന്ന പ്ലാസ്റ്റിക് കവറുകള്‍ ഉണ്ടാക്കുന്ന പാരിസ്ഥിതിക പ്രശ്നങ്ങള്‍ ഒഴിവാക്കുന്നതിനാണ് ചകിരിച്ചോറില്‍ നിന്ന് പരിസ്ഥിതി സൗഹൃദമായ തൈക്കൂടകള്‍ നിര്‍മിച്ചത്. മരം വളരുന്നതിനൊപ്പം തൈക്കൂടകള്‍ മണ്ണില്‍ ലയിക്കുമെന്നതാണ് ഇതിന്റെ പ്രത്യേകതയെന്നും മന്ത്രി വിശദീകരിച്ചു. കുറഞ്ഞത് അഞ്ച് സെന്റ് സ്ഥലം ലഭ്യമായാല്‍ നഗരമധ്യത്തില്‍ പോലും വനത്തിന്റെ എല്ലാ സവിശേഷതകളോടെയും കൂടിയ നഗരവനങ്ങള്‍ ഒരുക്കാനാകുമെന്നും അദ്ദേഹം പറഞ്ഞു. കയര്‍ക്കൂട നിര്‍മാണത്തില്‍ പ്രത്യേക പങ്ക് വഹിച്ച മുന്‍ കിഴക്കന്‍ മേഖലാ വനമേധാവി ഷേയ്ഖ് ഹൈദര്‍ ഹുസൈന്‍ ഐ.എഫ്.എസിനെ മൊമന്റൊ നല്‍കി ആദരിച്ചു.
പരിപാടിയില്‍ നിലമ്പൂര്‍ നഗരസഭ ചെയര്‍പേഴ്‌സണ്‍ പത്മിനി ഗോപിനാഥ്, കൗണ്‍സിലര്‍ പി.ഗോപാലകൃഷ്ണന്‍, വനം-വന്യജീവി വകുപ്പ് അഡീഷനല്‍ ചീഫ് സെക്രട്ടറി ഡോ.ആഷാ തോമസ്, പ്രിന്‍സിപ്പല്‍ ചീഫ് ഫോറസ്റ്റ് കണ്‍സര്‍വേറ്റര്‍ (വൈല്‍ഡ് ലൈഫ്) സുരേന്ദ്രകുമാര്‍, പാലക്കാട് ഈസ്റ്റേണ്‍ സര്‍ക്കിള്‍ ചീഫ് ഫോറസ്റ്റ് കണ്‍സര്‍വേറ്റര്‍ പി.പി പ്രമോദ്, പാലക്കാട് ചീഫ് കണ്‍സര്‍വേറ്റര്‍ ഓഫ് ഫോറസ്റ്റ്‌സ്(വൈല്‍ഡ് ലൈഫ്) കെ.വിജയാനന്ദന്‍, നിലമ്പൂര്‍ നോര്‍ത്ത് ഡിവിഷനല്‍ ഫോറസ്റ്റ് ഓഫീസര്‍ വര്‍ക്കഡ് യോഗേഷ് നീലകണ്ഠ,് സൗത്ത് ഡിവിഷന്‍ ഫോറസ്റ്റ് ഓഫീസര്‍ സജികുമാര്‍ തുടങ്ങിയവര്‍ പങ്കെടുത്തു.
- Log in to post comments