വി.എച്ച്.എസ്.ഇ. പാഠ്യപദ്ധതി എന്‍.എസ്.ക്യു.എഫിലേക്ക് മാറുന്നു

    കേരളത്തില്‍ ഹയര്‍ സെക്കന്ററി മേഖലയില്‍ എന്‍.എസ്.ക്യു.എഫ്. (National Skill Qualification Framework) നടപ്പിലാക്കുന്നതു സംബന്ധിച്ച് വിദ്യാഭ്യാസ മന്ത്രി പ്രൊഫ. സി.രവീന്ദ്രനാഥ്, അദ്ധ്യാപക-സര്‍വ്വീസ് സംഘടനാ പ്രതിനിധികളുമായി ചര്‍ച്ച നടത്തി. കേന്ദ്ര സര്‍ക്കാരിന്റെ മാര്‍ഗ്ഗ നിര്‍ദ്ദേശമനുസരിച്ച് വി.എച്ച്.എസ്.ഇ. പാഠ്യപദ്ധതി എന്‍.എസ്.ക്യു.എഫി. ലേക്ക് മാറ്റേണ്ടി വരുന്ന സാഹചര്യത്തില്‍, അദ്ധ്യാപക-അനദ്ധ്യാപക മേഖലയിലും അക്കാദമിക് തലത്തിലും ഉണ്ടാകുന്ന പ്രശ്‌നങ്ങള്‍ ചര്‍ച്ചയില്‍ സംഘടനാ പ്രതിനിധികള്‍ ചൂണ്ടിക്കാട്ടി. ഈ പദ്ധതി നടപ്പിലാക്കുന്നതിന്റെ ഭാഗമായി ആരുടെയും തൊഴില്‍ നഷ്ടപ്പെടില്ലെന്നും വേതനം സംരക്ഷിക്കപ്പെടുമെന്നും മന്ത്രി ഉറപ്പ് നല്കി. ഈ പദ്ധതി രണ്ട് ഘട്ടങ്ങളിലായാണ് നടപ്പാക്കുന്നത്. ഒന്നാംഘട്ടം 2018-19 അദ്ധ്യയനവര്‍ഷം 66 സര്‍ക്കാര്‍ വി.എച്ച്.എസ്.ഇ. സ്‌കൂളുകളിലെ 147 കോഴ്‌സുകളിലായി നടപ്പാക്കാന്‍ തീരുമാനിച്ചു.  മന്ത്രിയെ കൂടാതെ പൊതുവിദ്യാഭ്യാസ സെക്രട്ടറി എ.ഷാജഹാന്‍, വി.എച്ച്.എസ്.ഇ. ഡയറക്ടര്‍ ഡോ: എ. ഫറൂക്ക്, പൊതുവിദ്യാഭ്യാസ ഡയറക്ടര്‍ കെ.വി.മോഹന്‍ കുമാര്‍ എന്നിവരും ചര്‍ച്ചയില്‍ പങ്കെടുത്തു.
പി.എന്‍.എക്‌സ്.1708/18