കുട്ടികള്‍ക്കായി കാശ്മീരില്‍ നിന്നും അല്‍ അമീന്‍ സൈക്കിള്‍ ചവിട്ടി മലപ്പുറത്ത്

കുട്ടികള്‍ക്കെതിരെയുള്ള ലൈംഗികാതിക്രമങ്ങള്‍ തടയുന്നതിന് പൊതുജനങ്ങളെയും കുട്ടികളെയും ബോധവത്കരിക്കുന്ന സന്ദേശവുമായി ദല്‍ഹി ജാമിഅ മില്ലിയ്യ സെന്‍ട്രല്‍ യൂനിവേഴ്‌സിറ്റിയിലെ വിദ്യാര്‍ത്ഥി അല്‍ -അമീന്‍ ഇന്നും നാളെയും മലപ്പുറത്ത്. ശ്രീനഗറില്‍ നിന്നും സൈക്കിള്‍ ചവിട്ടിയാണ് അല്‍ - അമീന്‍ മലപ്പുറത്തെത്തുന്നത്. കന്യാകുമാരി വരെയുള്ള പ്രചരണ യാത്രയുടെ ഭാഗമായാണ് മലപ്പുറത്തെ വിവിധ കോളേജുകളിലും സ്‌കൂളുകളിലും അല്‍ - അമീന്‍ സന്ദര്‍ശിക്കുന്നത്. ജമ്മുവില്‍ നിന്നും കേരളം ഉള്‍പ്പെടെ 11 സംസ്ഥാനങ്ങളിലൂടെയാണ് അല്‍ - അമീന്റെ യാത്ര.
യാത്ര ഇന്ന് രാവിലെ (ജുലൈ അഞ്ച്) രാവിലെ 9.30 പെരുവള്ളൂര്‍ ഗവണ്‍മെന്റ് സ്‌കൂളിലും  2.30ന് മലപ്പുറം ഗവണ്‍മെന്റ് കോളേജിലും, 3.45ന് മലപ്പുറം സെന്റ്‌ജെമ്മാസ് സ്‌കൂളിലും എത്തും. ജൂലൈ ആറിന് രാവിലെ 10ന് ഇരുമ്പുഴി ഗവ. സ്‌കൂളിലും ഉച്ചയ്ക്ക് 2.30ന് മഞ്ചേരി ബോയ്‌സ് സ്‌കൂളിലും പ്രചരണം നടത്തും. ഓരോ സ്‌കൂളിലും പോക്‌സോ നിയമത്തെകുറിച്ചും കുട്ടികളുടെ അവകാശ സംരക്ഷണവുമായി ബന്ധപ്പെട്ട ചര്‍ച്ചയും നടത്തും. ജില്ലാ ചൈല്‍ഡ് പ്രൊട്ടക്ഷന്‍ യൂണിറ്റിന്റെ നേതൃത്വത്തിലാണ് ജില്ലയില്‍ ക്യാമ്പയിന്‍ സംഘടിപ്പിക്കുന്നത്.