ലോക പരിസ്ഥിതി ദിനാചരണം: നവകേരളം പച്ചത്തുരുത്തിന്റെ ജില്ലാതല നടീൽ ഉദ്ഘാടനം ഇന്ന്

ഹരിതകേരളം മിഷൻ പരിസ്ഥിതി ദിനാചരണവും നവകേരളം പച്ചത്തുരുത്തിന്റെ ജില്ലാതല നടീൽ ഉദ്ഘാടനവും ഇന്ന് (ജൂൺ അഞ്ച്) തുറമുഖം- മ്യൂസിയം- പുരാവസ്തു വകുപ്പ് മന്ത്രി അഹമ്മദ് ദേവർകോവിൽ നിർവഹിക്കും. വൈകിട്ട് നാലിന് ഗുരുവായൂരപ്പൻ കോളേജിൽ നടക്കുന്ന ചടങ്ങിൽ മേയർ ബീന ഫിലിപ്പ് അധ്യക്ഷത വഹിക്കും. തോട്ടത്തിൽ രവീന്ദ്രൻ എം.എൽ.എ മുഖ്യാതിഥിയാകും. 
 
കാലാവസ്ഥാ വ്യതിയാനത്തെ നേരിടുന്നതിനുള്ള പ്രാദേശിക പ്രതിരോധ മാതൃക സൃഷ്ടിക്കുന്നതിനുള്ള പ്രവർത്തനങ്ങളുടെ ഭാ​ഗമായി ഹരിതകേരളം മിഷൻ, സംസ്ഥാന വനം വകുപ്പ്, തൊഴിലുറപ്പ് പദ്ധതി, തദ്ദേശഭരണ സ്ഥാപനങ്ങൾ, മറ്റു ഇതര വകുപ്പുകൾ, ഏജൻസികൾ, വിദ്യഭ്യാസ സ്ഥാപനങ്ങൾ, ഗവേഷണ സ്ഥാപനങ്ങൾ എന്നിവയുമായി ചേർന്ന് നടപ്പിലാക്കി വരുന്ന പദ്ധതിയാണ് പച്ചത്തുരുത്ത്. ആഗോളതാപനത്തിന് മരമാണ് പ്രതിവിധി എന്നതിലൂന്നിക്കൊണ്ട് തരിശിട്ടിരിക്കുന്നതും ഉപയോഗരഹിതമായി ഒഴിച്ചിട്ടിരിക്കുന്നതും മറ്റു അനുയോജ്യമായ പൊതു- സ്യകാര്യ സ്ഥലങ്ങളിൽ പ്രദേശത്തിന്റെ സവിശേഷതകൾക്കിണങ്ങുന്ന വൃക്ഷങ്ങൾ നട്ടുവളർത്തി രൂപപ്പെടുത്തി എടുക്കുന്ന ചെറുവനങ്ങളാണ് പച്ചത്തുരുത്തുകൾ. 2050 ഓടുകൂടി നെറ്റ്സിറോ എമിഷൻ കൈവരിക്കുന്നതിനാണ് സർക്കാർ ലക്ഷ്യമിടുന്നത്. ഇതിനായുള്ള വിവിധ പ്രവർത്തനങ്ങളിൽ പ്രധാനപ്പെട്ടതാണ് പച്ചത്തുരുത്തുകളുടെ നിർമാണം. ജില്ലയിൽ ഇതിനോടകം വിവിധ തദ്ദേശഭരണ സ്ഥാപനങ്ങളിലായി 160 പച്ചത്തുരുത്തുകൾ നിർമിച്ച് പരിപാലിച്ച് വരുന്നു.

ഗുരുവായൂരപ്പൻ കോളേജിലെ എൻ.എസ്.എസ് യൂണിറ്റിന്റെ പങ്കാളിത്തത്തോടെയാണ് ക്യാമ്പസിൽ പച്ചത്തുരുത്ത് ഒരുക്കുന്നത്. പ്ലാവ്, മാവ്, പേര, സീതപ്പഴം, നെല്ലി, മാംഗോസ്റ്റിൻ, മുട്ടപ്പഴം, മുള്ളാത്ത, മുന്തിരി പേര, റംബൂട്ടാൻ, പനീർ ചാമ്പ, സപ്പോട്ട, ചാമ്പ,  മാതളം, ചെറുനാരകം, ബദാം, കൂവളം, മുള, ഇത്തി, വട്ടകുമ്പിൾ, അശോകം, വാതംകൊല്ലി, കറുവപ്പട്ട, മന്ദാരം തുടങ്ങിയ വ്യത്യസ്തമായ സസ്യങ്ങൾ വെച്ചുപിടിപ്പിച്ചാണ് ഈ പച്ചത്തുരുത്ത് ഒരുക്കുന്നത്.