ജല്‍ജീവന്‍ മിഷന്‍: നാറാണംമൂഴിയില്‍ സംയുക്ത പരിശോധന 21ന്
നാറാണംമൂഴി പഞ്ചായത്തില്‍ ജല്‍ജീവന്‍ മിഷനുമായി ബന്ധപ്പെട്ടുള്ള സംയുക്ത പരിശോധന 21ന് ഉച്ചകഴിഞ്ഞ് രണ്ടിന് നടത്താന്‍ തീരുമാനിച്ചു. ജല്‍ജീവന്‍ മിഷന്‍ പ്രവര്‍ത്തനങ്ങള്‍ അവലോകനം ചെയ്യാന്‍ അഡ്വ. പ്രമോദ് നാരായണ്‍ എംഎല്‍എ നാറാണംമൂഴി പഞ്ചായത്തില്‍ വിളിച്ചുചേര്‍ത്ത ജനപ്രതിനിധികളുടെയും ഉദ്യോഗസ്ഥരുടെയും യോഗത്തിലാണ് തീരുമാനം. ഉയര്‍ന്ന പ്രദേശങ്ങളില്‍ ജലം എത്തിക്കാനുള്ള സാധ്യത പരിശോധിച്ച് നടപടി സ്വീകരിക്കുന്നതിനും എല്ലാ വീടുകളിലും കുടിവെള്ള കണക്ഷന്‍ ലഭിക്കുന്നതിനും വേണ്ടി നടപടി സ്വീകരിക്കുന്നതിനാണ് സംയുക്ത പരിശോധന നടത്തുന്നത്.
ജല്‍ജീവന്‍ മിഷന്‍ പദ്ധതി നടപ്പാക്കുന്നതിന് നാറാണംമൂഴി പഞ്ചായത്തില്‍ 54. 52 കോടി രൂപയുടെ പ്രവൃത്തികളാണ് നടപ്പാക്കുന്നത്. വാട്ടര്‍ അതോറിറ്റി പ്രോജക്ട് ഡിവിഷന്‍ നിര്‍മിച്ചുകൊണ്ടിരിക്കുന്ന പെരുനാട് അത്തിക്കയം കുടിവെള്ള പദ്ധതി, അടിച്ചിപ്പുഴ കുടിവെള്ള പദ്ധതി, പെരുന്തേനരുവി കുടിവെള്ള പദ്ധതി, തോണിക്കടവ് കുടിവെള്ള പദ്ധതി എന്നിവിടങ്ങളില്‍ നിന്നാണ് പഞ്ചായത്തിന്റെ വിവിധ ഭാഗങ്ങളില്‍ കുടിവെള്ളം എത്തിക്കുക.
നിലവില്‍ കരികുളം, കുടമുരുട്ടി ഭാഗങ്ങളില്‍ ഭാഗികമായേ കുടിവെള്ള വിതരണം നടക്കുന്നുള്ളു. വെച്ചൂച്ചിറ യില്‍ നിന്നും വരുന്ന കുടിവെള്ള വിതരണം പൂര്‍ണമായും നിലച്ചിരിക്കുന്നു. ഇതിനൊക്കെ പരിഹാരം കാണേണ്ടതുണ്ട്. പെരുനാട് അത്തിക്കയം കുടിവെള്ളപദ്ധതിയുടെ ഡിസ്ട്രിബ്യൂഷന്‍ ലൈനുകള്‍ ഇട്ടു കഴിഞ്ഞു. പഞ്ചാരമുക്ക് ടാങ്കില്‍ നിന്നും വെള്ളം പമ്പ് ചെയ്ത് ചെമ്പന്‍മുടിയില്‍ എത്തിച്ചാണ് വിതരണം നടത്തുന്നത്.
ഇരു വിഭാഗങ്ങളിലുമായി 3508 കണക്ഷനുകളാണ് ജല്‍ജീവന്‍ മിഷന്‍ വഴി നല്‍കുന്നത്.
പഞ്ചായത്ത് പ്രസിഡന്റ് ബീനാ ജോബി യോഗത്തില്‍ അധ്യക്ഷയായി. വാട്ടര്‍ അതോറിറ്റി പ്രോജക്ട് വിഭാഗം എക്‌സി. എന്‍ജിനീയര്‍ പി.ആര്‍. സുനില്‍, ജലവിഭവ വകുപ്പ് എക്‌സി എന്‍ജിനീയര്‍ ടി. തുളസീധരന്‍, അസി.എക്‌സി എന്‍ജിനീയര്‍മാരായ ബാബുരാജ്, അഞ്ജു, അസി. എന്‍ജിനീയര്‍മാരായ ആര്‍.ഡി. അനില്‍കുമാര്‍, അശ്വിന്‍ എന്നിവര്‍ യോഗത്തില്‍ സംസാരിച്ചു.
- Log in to post comments