സൗജന്യ കമ്പ്യൂട്ടര്‍ കോഴ്‌സ് പരിശീലനം

പട്ടികജാതി വികസന വകുപ്പിന്റെ കീഴില്‍ എറണാകുളം ആലുവ സബ് ജയില്‍ റോഡില്‍ പ്രവര്‍ത്തിക്കുന്ന ഗവണ്‍മെന്റ് പ്രീ എക്സാമിനേഷന്‍ ട്രെയിനിങ് സെന്ററില്‍ മൂന്നു മാസം ദൈര്‍ഘ്യമുള്ള ഡാറ്റ എന്‍ട്രി, ഡി.ടി.പി എന്നീ കമ്പ്യൂട്ടര്‍ കോഴ്‌സുകളുടെ സൗജന്യ പരിശീലനം മെയ് 17 ന് രാവിലെ 10 മണിക്ക് ആരംഭിക്കുന്നു. എറണാകുളം, കോട്ടയം, ഇടുക്കി, ആലപ്പുഴ എന്നീ ജില്ലകളിലുള്ള പട്ടികജാതി പട്ടികവര്‍ഗ്ഗ വിഭാഗത്തിലെ 18 നും 25 നും ഇടയില്‍ പ്രായമുള്ള വിദ്യാർഥികൾക്ക് അപേക്ഷിക്കാം.

അടിസ്ഥാന യോഗ്യത പത്താം ക്ലാസ്.  ഡി.റ്റി.പി കോഴ്സിന് ഡാറ്റാ എന്‍ട്രിയോ ഇംഗ്ലീഷ് ടൈപ്പ് റൈറ്റിങ് ലോവറോ തത്തുല്യ യോഗ്യതയോ ഉണ്ടായിരിക്കണം. പരിശീലനത്തിന് തെരഞ്ഞെടുക്കുന്ന വിദ്യാര്‍ഥികള്‍ക്ക് നിയമാനുസൃതം സ്‌റ്റൈപ്പന്റ് ലഭിക്കുന്നതാണ്. താല്പര്യമുള്ളവര്‍ ജാതി, വിദ്യാഭ്യാസയോഗ്യത എന്നിവ തെളിയിക്കുന്ന സര്‍ട്ടിഫിക്കറ്റുകളുടെ സ്വയം സാക്ഷ്യപ്പെടുത്തിയ പകര്‍പ്പുകള്‍ സഹിതം  മെയ്  15 ന് വൈകിട്ട്  4.30 ന് മുമ്പായി  അപേക്ഷ സമര്‍പ്പിക്കേണ്ടതാണ്.അപേക്ഷ ഫോറത്തിന്റെ മാതൃക ബന്ധപ്പെട്ട ജില്ലാ പട്ടികജാതി വികസന ഓഫീസുകളിലും ബ്ലോക്ക് പട്ടികജാതി വികസന ഓഫിസുകളിലും ലഭ്യമാണ്.ഫോണ്‍: 0484-2623304