ഇ ഓട്ടോറിക്ഷ വിതരണം ചെയ്തു
മാലിന്യ മുക്തം നവ കേരളത്തിന്റെ ഭാഗമായി ജില്ലാ പഞ്ചായത്ത് ഹരിത കര്‍മ സേനാംഗങ്ങള്‍ക്കായി നല്‍കിയ ഇലക്ട്രിക് ഓട്ടോറിക്ഷകളുടെ വിതരണോദ്ഘാടനം പ്രസിഡന്റ് ജോര്‍ജ് എബ്രഹാം നിര്‍വഹിച്ചു. ജില്ലയിലെ 16 ഗ്രാമ പഞ്ചായത്തുകള്‍ക്കാണ് ഇ ഓട്ടോറിക്ഷ നല്‍കിയത് . 2024-25 വാര്‍ഷിക പദ്ധതിയില്‍ ഉള്‍പ്പെടുത്തി 65.2 ലക്ഷം രൂപ വിനിയോഗിച്ചു. ആദ്യഘട്ടത്തില്‍ 20 പഞ്ചായത്തുകള്‍ക്ക് ഇ ഓട്ടോറിക്ഷ നല്‍കിയിരുന്നു.
ഹരിതകര്‍മ സേനയുടെ പ്രവര്‍ത്തനം മികച്ച രീതിയില്‍ ജില്ലയില്‍ നടക്കുന്നതായി പ്രസിഡന്റ് ജോര്‍ജ് എബ്രഹാം പറഞ്ഞു. ശേഖരിക്കുന്ന അജൈവ മാലിന്യങ്ങള്‍ എം സി എഫുകളിലേക്ക് വേഗതയില്‍ എത്തിക്കാനാകുന്നു. ഹരിതകര്‍മ സേനയുടെ തുടര്‍ പ്രവര്‍ത്തനങ്ങളില്‍ ജില്ലാ പഞ്ചായത്തിന്റെ പൂര്‍ണ പിന്തുണ പ്രസിഡന്റ് വാഗ്ദാനം ചെയ്തു.
കലക്ടറേറ്റ് അങ്കണത്തില്‍ ജില്ലാ പഞ്ചായത്ത് ആരോഗ്യ വിദ്യാഭ്യാസ സ്ഥിരം സമിതി ചെയര്‍മാന്‍ ആര്‍ അജയകുമാര്‍ അധ്യക്ഷനായി. ജില്ലാ പഞ്ചായത്ത് ക്ഷേമ കാര്യ സ്ഥിരം സമിതി അധ്യക്ഷന്‍ ജിജി മാത്യു, അംഗം ജെസ്സി അലക്സ് , ഗ്രാമ പഞ്ചായത്ത് പ്രസിഡന്റുമാരായ പി എസ് മോഹനന്‍, ആര്‍ മോഹനന്‍ നായര്‍, ലതാ മോഹന്‍, ബിനു ജോസഫ് , മിനി ജിജു ജോസഫ്, വി എസ് ആശ, അഡ്വ കൃഷ്ണകുമാര്‍, മിനി സോമരാജന്‍, അനുരാധ സുരേഷ്, ഷാജി കെ സാമുവേല്‍, ബിന്ദു റെജി, ജില്ലാ -ഗ്രാമ പഞ്ചായത്ത് ഉദ്യോഗസ്ഥര്‍, ഹരിതകര്‍മ സേനാംഗങ്ങള്‍ തുടങ്ങിയവര്‍ പങ്കെടുത്തു.
- Log in to post comments