വെച്ചൂച്ചിറ സാമൂഹിക ആരോഗ്യ കേന്ദ്രത്തിന് 5.75 കോടിയുടെ പദ്ധതി : മന്ത്രി വീണാ ജോർജ്

വെച്ചൂച്ചിറ സാമൂഹിക ആരോഗ്യ കേന്ദ്രത്തിൽ ആധുനിക നിലവാരത്തിൽ കെട്ടിടനിർമ്മാണത്തിന് 5.75 കോടിയുടെ പദ്ധതി തയ്യാറാകുന്നുവെന്ന് ആരോഗ്യ വനിതാ ശിശു വികസന വകുപ്പ് മന്ത്രി വീണാ ജോർജ് . റാന്നി എംഎല്‍എയുടെ മണ്ഡല ആസ്തി വികസന ഫണ്ട് 95 ലക്ഷം രൂപ ചെലവഴിച്ച്  വെച്ചൂച്ചിറ സാമൂഹിക ആരോഗ്യ കേന്ദ്രത്തിൽ നിർമിക്കുന്ന  കെട്ടിടത്തിന്റെ നിര്‍മാണോദ്ഘാടനം നിർവഹിക്കുകയായിയുന്നു മന്ത്രി. ജില്ലയിൽ ആരോഗ്യ മേഖലയ്ക്ക് മികച്ച നേട്ടങ്ങൾ സാധ്യമായി. റാന്നി താലൂക്ക് ആശുപത്രിയിൽ കിഫ്‌ബി ഫണ്ട്‌ ഉപയോഗിച്ച് അത്യാധുനിക
സൗകര്യങ്ങളോടെയുള്ള കെട്ടിട നിർമാണം ആരംഭിച്ചു. ലക്ഷ്യ നിലവാരത്തിൽ മാതൃ ശിശു സംരക്ഷണവും സാധ്യമാകും. ശബരിമല ഉൾപെടുന്ന റാന്നി പെരുനാട് സാമൂഹിക ആരോഗ്യ കേന്ദ്രത്തിൽ  2.5 കോടിയുടെ  ആശുപത്രി കെട്ടിടം
നിർമ്മാണം ഉടൻ ആരംഭിക്കും. ഇവിടെ കിടത്തി ചികിത്സയും സാധ്യമാക്കി.  ആയിരൂരിൽ നഴ്സിംഗ് കോളജ് അനുവദിക്കുന്നതിനുള്ള നടപടി അവസാനഘട്ടത്തിലാണ് . ജില്ലയിൽ സംയോജിത ചികിത്സ സൗകര്യങ്ങളുടെ അടിസ്ഥാന വികസനത്തിൽ  ചരിത്രം സൃഷ്ടിച്ചുവെന്നും മന്ത്രി പറഞ്ഞു. മഴക്കാലമായതിനാൽ ജല-ജന്യ രോഗ പ്രതിരോധം ശക്തമാക്കണമെന്നും മന്ത്രി കൂട്ടിചേർത്തു.

മണ്ഡലത്തിൽ  സമഗ്ര ആരോഗ്യ വികസനം സാധ്യമായതായി ചടങ്ങിൽ അധ്യക്ഷനായ റാന്നി എംഎൽഎ പ്രമോദ് നാരായണൻ പറഞ്ഞു . മഠത്തും ചാൽ- മുക്കൂട്ടു തറ റോഡ് നിർമാണ പ്രവർത്തനങ്ങൾ ആതിവേഗതയിൽ പുരോഗമിക്കുന്നുവെന്നും എംഎൽഎ  അറിയിച്ചു.

പൊതുമേഖല സ്‌ഥാപനമായ സിൽക്കിനാണ് നിർമാണ ചുമതല.  
ജില്ലാ മെഡിക്കല്‍ ഓഫീസര്‍ ഡോ. എല്‍ അനിതകുമാരി റിപ്പോര്‍ട്ട്  അവതരിപ്പിച്ചു.  

ജില്ലാ പഞ്ചായത്ത് പ്രസിഡന്റ് ജോര്‍ജ് എബ്രഹാം, മല്ലപ്പളളി ബ്ലോക്ക് പഞ്ചായത്ത് പ്രസിഡന്റ് മാത്യു എന്നിവർ  മുഖ്യാതിഥികളായി. വെച്ചൂച്ചിറ ഗ്രാമപഞ്ചായത്ത് പ്രസിഡന്റ്‌ ഇ വി വർക്കി, ജനപ്രതിനിധികൾ,  തുടങ്ങിയവർ പങ്കെടുത്തു.