പള്ളുരുത്തിയിൽ വനിതകളുടെ നേതൃത്വത്തിൽ കയാക്കിങ് സെൻ്റർ പ്രവർത്തനമാരംഭിച്ചു

പള്ളുരുത്തി ബ്ലോക്ക് പഞ്ചായത്തിൻ്റെ സാമ്പത്തിക സഹായത്തോടെ വനിതകളുടെ നേതൃത്വത്തിൽ കയാക്കിങ് സെൻ്റർ പ്രവർത്തനമാരംഭിച്ചു. ബ്ലോക്ക് പഞ്ചായത്ത് പ്രസിഡൻ്റ് ബേബി തമ്പി ഉദ്ഘാടനം നിർവഹിച്ചു. വനിത ഗ്രൂപ്പുകൾക്ക് വ്യവസായം ആരംഭിക്കാൻ സഹായം നൽകുന്ന പദ്ധതിയുടെ ഭാഗമായി എ എം ശ്രീലക്ഷമി , കുമാരി എന്നിവരുടെ നേതൃത്വത്തിലുള്ള കോസ്റ്റൽ ക്രൂയിസ് ഗ്രൂപ്പാണ് സെന്റർ ആരംഭിച്ചത്.

75% സബ്സിഡിയോടെ ലഭിച്ച ലോൺ ഉപയോഗിച്ചാണ് കയാക്കിങ് സെന്റർ ആരംഭിച്ചത്. ആറ് ലക്ഷം രൂപയുടെ പദ്ധതിയാണിത്. 12 കയാക്കുകൾ, തുഴകൾ, ലൈഫ് ജാക്കറ്റ്, കയാക്ക് ജെട്ടി എന്നിവയാണ് സെന്ററിലുള്ളത്.

ചടങ്ങിൽ വൈസ് പ്രസിഡൻ്റ് ജോബി പനക്കൽ അധ്യക്ഷത വഹിച്ചു. കുമ്പളം ഗ്രാമപഞ്ചായത്ത് പ്രസിഡൻ്റ് കെ എസ് രാധാകൃഷ്ണൻ, സ്റ്റാൻഡിംഗ് കമ്മിറ്റി ചെയർ പേഴ്സൺ ജെംസി ബിജു, ടി ആർ രാഹുൽ , ബ്ലോക്ക് പഞ്ചായത്ത് മെമ്പർമാരായ ജോളി പൗവ്വത്തിൽ, കെ കെ സെൽവരാജൻ, നിത സുനിൽ, സിന്ധു ജോഷി, ഷീബ ജേക്കബ്, ജോസ് വർക്കി, അഫ്‌സൽ നമ്പ്യാരത്ത്, മിനി അജയഘോഷ്,കെ. ടി സത്യൻ ,ടി എസ്‌ സജിത് എന്നിവർ പങ്കെടുത്തു.