ജില്ല ആസൂത്രണസമിതി  : വാര്‍ഷിക പദ്ധതിക്ക് അംഗീകാരം

ആറ് തദ്ദേശ സ്ഥാപനങ്ങളുടെ 2026-27 വാര്‍ഷിക പദ്ധതികള്‍ക്ക് ജില്ലാ അസൂത്രണ സമിതി അംഗീകാരം.  ജില്ല ആസൂത്രണസമിതി സെക്രട്ടറിയേറ്റ് കോണ്‍ഫറന്‍സ് ഹാളില്‍ ചേര്‍ന്ന ജില്ലാ ആസൂത്രണ സമിതി യോഗത്തില്‍ റാന്നി, കോയിപ്രം, നാരാങ്ങാനം, മലയാലപ്പുഴ, കുളനട ഗ്രാമപഞ്ചായത്ത്, കോന്നി ബ്ലോക്ക് പഞ്ചായത്ത് എന്നിവയുടെ 2026-2027 വാര്‍ഷിക പദ്ധതിക്ക് അംഗീകാരം നല്‍കി. സംസ്ഥാന തലത്തില്‍ സുലേഖ സോഫ്റ്റ് വെയറിലൂടെ 2026-27 ലെ വാര്‍ഷിക പദ്ധതി ആദ്യം ഓണ്‍ലൈനായി സമര്‍പ്പിച്ച് ഗ്രാമപഞ്ചായത്ത് തലത്തില്‍ റാന്നിയും ബ്ലോക്ക് പഞ്ചായത്തില്‍ കോന്നിയും അംഗീകാരം നേടി. പദ്ധതികള്‍ സമയബന്ധിതമായി നടപ്പാക്കണമെന്ന് അധ്യക്ഷയായ ജില്ലാ പഞ്ചായത്ത് പ്രസിഡന്റ് ദീനമ്മാ റോയി പറഞ്ഞു. ജില്ലാ പഞ്ചായത്തിന്റെയും കോന്നി, പുളിക്കീഴ്, മല്ലപ്പള്ളി, പറക്കോട് ബ്ലോക്ക് പഞ്ചായത്തുകളുടെയും മൈലപ്ര, കോന്നി, ഇലന്തൂര്‍, മല്ലപ്പള്ളി, ഏഴംകുളം ഗ്രാമപഞ്ചായത്തുകളുടെയും 2025-26 വാര്‍ഷിക പദ്ധതി ഭേദഗതി പ്രൊജക്ടുകള്‍ക്കും യോഗത്തില്‍ അംഗീകാരം ലഭിച്ചു.
എഡിഎം ബി. ജ്യോതി, അസിസ്റ്റന്റ് ജില്ലാ പ്ലാനിംഗ് ഓഫീസര്‍ സുനില്‍ സേവ്യര്‍, തദ്ദേശസ്ഥാപന പ്രതിനിധികള്‍, ഉദ്യോഗസ്ഥര്‍ തുടങ്ങിയവര്‍ പങ്കെടുത്തു.