ശുചിത്വമിഷന് ബിന്വിന് ഗോള് ചലഞ്ചിന് തുടക്കം
ഫുട്ബോള് ലോകകപ്പിന്റെ പശ്ചാത്തലത്തില് പൊതുജനങ്ങളിലും യുവാക്കളിലും പുതിയ ഖരമാലിന്യ ചട്ടങ്ങളെക്കുറിച്ച് അവബോധം സൃഷ്ടിക്കാന് ജില്ല ശുചിത്വമിഷന് സംഘടിപ്പിക്കുന്ന ബിന്വിന് ഗോള് ചലഞ്ചിന്റെ ഉദ്ഘാടനം പത്തനംതിട്ട കാതോലിക്കേറ്റ് കോളജില് ജില്ല കലക്ടര് എ നിസാമുദ്ദീന് നിര്വഹിച്ചു.
ഫുട്ബോള് ലഹരിപോലെ പോലെ സമൂഹത്തിലെയും വീടുകളിലെയും ശുചിത്വത്തിനും മാലിന്യസംസ്കരണത്തിനും വിദ്യാര്ഥികള് പ്രാധാന്യം നല്കണമെന്ന് ജില്ല കലക്ടര് പറഞ്ഞു. തദ്ദേശസ്വയംഭരണ വകുപ്പ് ജോയിന്റ് ഡയറക്ടര് പി രാജേഷ് കുമാര്, ശുചിത്വമിഷന് ജില്ല കോര്ഡിനേറ്റര് കെ എം വിനീത്, ശുചിത്വമിഷന് അസിസ്റ്റന്റ് കോര്ഡിനേറ്റര് ജി പ്രദീപ്, പ്രോഗ്രാം ഓഫീസര് കെ ആര് അജയ്, കാതോലിക്കേറ്റ് കോളജ് പ്രിന്സിപ്പല് ഡോ. റെന്നി പി വര്ഗീസ്, ഫാദര് തോംസണ് റോബി, എന് എസ് എസ് പ്രോഗ്രാം ഓഫീസര്മാരായ ഡോ. തോമസ് എബ്രഹാം, ഡോ.സൂസന് സാമുവല്, എന് സി സി ഓഫീസര് ക്യാപ്റ്റന് ജിജോ കെ ജോസഫ്, അസോസിയേറ്റ് പ്രൊഫസര് ഡോ. എ എസ് ദീപ്തി, എന് എസ് എസ് വോളന്റിയേഴ്സ്, എന് സി സി കേഡറ്റുകള്, അധ്യാപകര്, വിദ്യാര്ഥികള് തുടങ്ങിയവര് പങ്കെടുത്തു. സോളിഡ് വേസ്റ്റ് മാനേജ്മെന്റ് റൂള് പ്രകാരം ജൈവം, അജൈവം, സാനിറ്ററി, സ്പെഷ്യല് കെയര് എന്നീ മാലിന്യങ്ങളെ സൂചിപ്പിക്കുന്ന രീതിയില് പച്ച, നീല, ചുവപ്പ്, കറുപ്പ് നിറത്തിലുള്ള ഗോള് പോസ്റ്റുകളാണ് തയ്യാറാക്കിയിരുന്നത്.
ഈ പോസ്റ്റുകളിലേക്ക് ഗോളടിച്ച ജില്ല കലക്ടര് വിദ്യാര്ഥികളോട് ലോകകപ്പ് ഫുട്ബോള്, മാലിന്യസംസ്കരണം തുടങ്ങിയ മേഖലയിലെ ചോദ്യങ്ങള് ചോദിച്ചു. ഉത്തരം നല്കിയവര്ക്ക് ഗോള് അടിക്കാന് അവസരം നല്കി. ശരിയായ നിറത്തിലുള്ള പോസ്റ്റിലേക്ക് ഗോളടിച്ചവര്ക്ക് ശുചിത്വമിഷന്റെ നേതൃത്വത്തില് സമ്മാനം നല്കി. വരും ദിവസങ്ങളില് ജില്ലയുടെ വിവിധ കേന്ദ്രങ്ങളില് കാമ്പയിന് നടക്കും.
ചിത്രം:
ശുചിത്വ മിഷന് ബിന്വിന് ചലഞ്ചിന്റെ ഭാഗമായി ജില്ല കലക്ടര് എ നിസാമുദ്ദീന് ഗോളടിക്കുന്നു
- Log in to post comments