സാധാരണക്കാര്‍ക്ക് മികച്ച ചികിത്സാ സൗകര്യമൊരുക്കുക സര്‍ക്കാര്‍ ലക്ഷ്യം : അബിന്‍ വര്‍ക്കി എംഎല്‍എ
സാധാരണക്കാര്‍ക്ക് ഏറ്റവും മികച്ച ചികിത്സാ സൗകര്യങ്ങള്‍ ഒരുക്കുകയെന്നതാണ് സര്‍ക്കാര്‍ ലക്ഷ്യമെന്ന് അബിന്‍ വര്‍ക്കി എംഎല്‍എ പറഞ്ഞു. കുളനട ജനകീയ ആരോഗ്യ കേന്ദ്രം മെയിന്‍ സെന്റര്‍ പുതിയ കെട്ടിടത്തിന്റെ നിര്‍മ്മാണ ഉദ്ഘാടനം നിര്‍വഹിച്ച് സംസാരിക്കുകയായിരുന്നു എംഎല്‍എ. കൂടുതല്‍ അടിസ്ഥാന സൗകര്യങ്ങള്‍ ഒരുക്കി ആശുപത്രികളുടെ ഗുണനിലവാരം മെച്ചപ്പെടുത്തും. സര്‍ക്കാര്‍ ആശുപത്രികളില്‍ പൊതുജനങ്ങള്‍ക്ക് ഏറ്റവും മികച്ച ചികിത്സാ സൗകര്യങ്ങള്‍ ലഭ്യമാകും. ആറന്മുള മണ്ഡലത്തില്‍ ആറ് ജനകീയ ആരോഗ്യ കേന്ദ്രങ്ങളുടെ നിര്‍മ്മാണ പ്രവര്‍ത്തനം ഉടന്‍ ആരംഭിക്കും. കുളനട കുടുംബാരോഗ്യ കേന്ദ്രത്തിനും കുടുംബാരോഗ്യ കേന്ദ്രത്തിന്റെ പരിധിയില്‍ വരുന്ന മാന്തുക, പാണില്‍ എന്നീ ജനകീയ ആരോഗ്യ കേന്ദ്രങ്ങള്‍ക്കും ദേശീയ ഗുണനിലവാര അംഗീകാരം നേടാനായത് ആരോഗ്യ പ്രവര്‍ത്തകരുടെ കൂട്ടായ പരിശ്രമം കൊണ്ടാണന്നും എംഎല്‍എ പറഞ്ഞു. യോഗത്തില്‍ കുളനട ഗ്രാമപഞ്ചായത്ത് പ്രസിഡന്റ് പോള്‍ രാജന്‍ അധ്യക്ഷത വഹിച്ചു. ജില്ലാ മെഡിക്കല്‍ ഓഫീസര്‍ (ആരോഗ്യം) ഡോ. ജെ മണികണ്ഠന്‍ മുഖ്യപ്രഭാഷണം നടത്തി. ആരോഗ്യ കേരളം ജില്ലാ പ്രോഗ്രാം മാനേജര്‍ ഡോ. ജിനു ജി തോമസ് പദ്ധതി വിശദീകരണം നടത്തി.
പതിനഞ്ചാം ധനകാര്യ കമ്മീഷന്‍ ഗ്രാന്റ് മുഖേന 55.50 ലക്ഷം രൂപ മുതല്‍മുടക്കിലാണ് കുളനട ജനകീയ ആരോഗ്യ കേന്ദ്രം മെയിന്‍ സെന്ററിനായി പുതിയ കെട്ടിടം നിര്‍മ്മിക്കുന്നത്. 1200 ചതുരശ്ര അടി വിസ്തീര്‍ണ്ണമുള്ള കെട്ടിടത്തില്‍ രോഗികള്‍ക്കുള്ള കാത്തിരിപ്പ് സ്ഥലം, പരിശോധന മുറി, ഫാര്‍മസി, ലാബോറട്ടറി സൗകര്യം, പ്രതിരോധ കുത്തിവെയ്പ്പ് മുറി, സ്റ്റോര്‍, ജീവനക്കാര്‍ക്കുള്ള മുറി, ഐ യു സി ഡി മുറി, ശുചിമുറികള്‍ എന്നിവ ഉള്‍പ്പെടുത്തിയിരിക്കുന്നു.
കുളനട ഗ്രാമപഞ്ചായത്ത് വൈസ് പ്രസിഡന്റ് സാവിത്രി ഭദ്രന്‍, പന്തളം ബ്ലോക്ക് പഞ്ചായത്ത് അംഗങ്ങളായ ഷീജ മോനച്ചന്‍, പ്രതിഭ കുമാരി, കുളനട ഗ്രാമപഞ്ചായത്ത് അംഗങ്ങളായ സുജിത്ത് കളീയ്ക്കല്‍, വിലാസിനിയമ്മ, രാജന്‍ മത്തായി, സുജ സന്തോഷ്, സൂസന്‍ റ്റി ജോര്‍ജ്, റ്റി അമ്പിളി, എം കെ ശോഭന കുമാരിയമ്മ, ഷീബ വര്‍ഗീസ്, പി പി രാജു, എലിസബത്ത്, പി റ്റി സുരേഷ്, ജി രഘുനാഥ്, ജെനി ആനന്ദ്, കുളനട കുടുംബാരോഗ്യ കേന്ദ്രം മെഡിക്കല്‍ ഓഫീസര്‍ ഡോ. ഹിദായത്ത് അന്‍സാരി വിവിധ കക്ഷിരാഷ്ട്രീയ പ്രതിനിധികള്‍, ആരോഗ്യ പ്രവര്‍ത്തകര്‍ എന്നിവര്‍ പങ്കെടുത്തു.
- Log in to post comments