Skip to main content

വ്യവസായ സംരംഭങ്ങൾക്ക് അനുമതിയും ലൈസൻസും  നൽകൽ: ജനപ്രതിനിധികൾക്കായി ശില്പശാല

ആലപ്പുഴ: വ്യവസായം ആരംഭിക്കുന്നതിന് വിവിധ അനുമതികൾക്കായി സംരംഭകർ ഓഫീസുകൾ കയറിയിറങ്ങി മടുക്കുന്ന സ്ഥിതിക്കു മാറ്റംവരുത്താനുള്ള സർക്കാരിന്റെ ശ്രമങ്ങൾക്ക് തദ്ദേശസ്വയംഭരണസ്ഥാപനങ്ങളും ഉദ്യോഗസ്ഥരും പിന്തുണ നൽകണമെന്ന് ജില്ലാ പഞ്ചായത്ത് പ്രസിഡന്റ് ജി. വേണുഗോപാൽ പറഞ്ഞു. കേരളത്തെ സംരംഭക സൗഹൃദ സംസ്ഥാനമാക്കാനുള്ള ലഘൂകരിച്ച നടപടിക്രമങ്ങൾ പരിചയപ്പെടുത്തുന്നതിനായി ഗ്രാമപഞ്ചായത്ത് പ്രസിഡന്റുമാർക്കും സെക്രട്ടറിമാർക്കുമായി വ്യവസായ വാണിജ്യ വകുപ്പ് നടത്തിയ ഏകദിന ശില്പശാല ആലപ്പുഴയിൽ ഉദ്ഘാടനം ചെയ്യുകയായിരുന്നു അദ്ദേഹം. വ്യവസായസംരംഭങ്ങൾക്ക് സമയബന്ധിതമായി ലൈസൻസുകളും അനുമതിയും നൽകുന്നതിനുള്ള നടപടിക്രമങ്ങൾ പരിചയപ്പെടുത്തി.

 

വ്യവസായ സൗഹൃദ അന്തരീക്ഷം സൃഷ്ടിക്കാൻ സമൂഹത്തിന്റെ കൂട്ടായ പരിശ്രമം വേണമെന്നും തദ്ദേശസ്വയംഭരണ സ്ഥാപനങ്ങളുടെ സജീവമായ ഇടപെടൽ വേണമെന്നും അദ്ദേഹം പറഞ്ഞു. ഏതെങ്കിലും ഒരു മേഖലയ്ക്കു മാത്രം പ്രാധാന്യം നൽകിക്കൊണ്ടുള്ള വ്യവസായ-സാമ്പത്തിക വളർച്ച ഇനി സാധ്യമല്ലെന്നും വിവിധ മേഖലകളുടെ വളർച്ചയ്ക്കാണ് ശ്രമം വേണ്ടതെന്നും മുഖ്യപ്രഭാഷണം നടത്തിയ ജില്ലാ കളക്ടർ ടി.വി. അനുപമ പറഞ്ഞു. ഒരു വ്യക്തി വിചാരിച്ചാൽ അനുമതികൾക്കുള്ള നടപടികൾ അനന്തമായി നീളുന്ന സ്ഥിതിക്ക് മാറ്റമുണ്ടാകണമെന്നും കളക്ടർ പറഞ്ഞു. 

 

നഗരസഭ ഉപാധ്യക്ഷ ബീന കൊച്ചുബാവ ആധ്യക്ഷ്യം വഹിച്ചു. നഗരസഭാംഗം എം. ശ്രീജിത്ര, ജില്ലാ വ്യവസായ കേന്ദ്രം ജനറൽ മാനേജർ എം.വി. ലൗലി, മാനേജർമാരായ സി. വിജയൻ, കെ.എസ്. അജിമോൻ, ആർ. സനിൽകുമാർ, കെ.എസ്.എസ്.ഐ.എ. ജില്ലാ സെക്രട്ടറി ഹരിലാൽ എന്നിവർ പ്രസംഗിച്ചു. പഞ്ചായത്ത് ഡെപ്യൂട്ടി ഡയറക്ടർ എസ്. ശ്രീകുമാർ, കെ.എസ്.ഐ.ഡി.സി. മാനേജർ സിനി കെ. തോപ്പിൽ എന്നിവർ ക്ലാസെടുത്തു. ചേർത്തല, അമ്പലപ്പുഴ, കുട്ടനാട് താലൂക്കുകളിലെ പ്രസിഡന്റുമാർക്കും സെക്രട്ടറിമാർക്കുമായാണ് ശില്പശാല നടന്നത്.

 

(പി.എൻ.എ. 70/2018)

നിരക്ഷരത നിർമ്മാർജ്ജനത്തിനായി

അക്ഷരലക്ഷം പരിപാടി

 

ജനുവരി 14ന് സാക്ഷരതാ സർവേ

ആലപ്പുഴ: അവശേഷിക്കുന്ന നിരക്ഷരരെയും സാക്ഷരരാക്കുക എന്ന ലക്ഷ്യവുമായി സാക്ഷരതാ മിഷൻ അക്ഷരലക്ഷം പരിപാടിക്ക് തുടക്കം കുറിച്ചു. സാക്ഷരതാ മിഷന്റെ തുടർ വിദ്യാകേന്ദ്രങ്ങൾ സ്ഥിതി ചെയ്യുന്ന വാർഡുകളിൽ മാത്രമാണ് ആദ്യഘട്ടത്തിൽ പരിപാടി നടത്തുക. നിരക്ഷരരെ കണ്ടെത്താൻ ജനുവരി 14ന് സാക്ഷരതാ സർവേ നടത്തും. സർവേയിലൂടെ കണ്ടെത്തുന്ന നിരക്ഷരർക്കായി പ്രത്യേകം ക്ലാസുകൾ ക്രമീകരിക്കും. നൂറു മണിക്കൂറാണ് ക്ലാസിന്റെ ദൈർഘ്യം. ഏപ്രിൽ 18ന് ഒന്നാംഘട്ട പരിപാടി അവസാനിക്കും.

സാക്ഷരതാ മിഷന്റെ തുടർവിദ്യാകേന്ദ്രങ്ങൾ നിൽക്കുന്ന വാർഡുകളിൽ നിരക്ഷരത നിർമ്മാർജ്ജന സമിതികൾ രൂപീകരിച്ചിട്ടുണ്ട്. വാർഡ് മെമ്പർ ചെയർമാനായ സമിതിയുടെ നേതൃത്വത്തിലാണ് പരിപാടികൾ നടത്തുക. ഓരോ വാർഡിലും കുറഞ്ഞത് എട്ടു സ്‌ക്വാഡുകൾ സർവേയ്ക്കായി രൂപീകരിച്ചിട്ടുണ്ട്. സർവേ വോളന്റിയർമാർക്ക് പ്രേരക്മാരുടെ നേതൃത്വത്തിൽ പരിശീലനം നൽകിയിരുന്നു. പത്താംതരം, ഹയർ സെക്കൻഡറി തുല്യതാ പഠിതാക്കളും സർവേയിൽ പങ്കെടുക്കും.  നിരക്ഷരർക്കായുള്ള ക്ലാസുകൾ ജനുവരി 26ന് ആരംഭിക്കും.(പി.എൻ.എ. 80/2018)

 

// അവസാനിച്ചു //

date