കോവിഡ് 19 പ്രതിരോധം: പട്ടികജാതി/പട്ടികവർഗ വകുപ്പുകൾ നടപടി ആരംഭിച്ചു

പട്ടികജാതി, പട്ടികവർഗ മേഖലകളിൽ കോവിഡ് 19 പ്രതിരോധത്തിനും അടിയന്തിര സഹായത്തിനും സർക്കാർ നടപടി ആരംഭിച്ചു. പട്ടികജാതി സങ്കേതങ്ങളിലും പട്ടികവർഗ ഊരുകളിലും പനി, ജലദോഷം തുടങ്ങിയ രോഗലക്ഷണങ്ങൾ ഉള്ളവരെ കണ്ടെത്തുന്നതിനും അവരെ ആരോഗ്യവകുപ്പിന്റെ നിരീക്ഷണത്തിൽ കൊണ്ടുവരുന്നതിനും രണ്ട് വകുപ്പുകളിലെയും പ്രമോട്ടർമാരെ ചുമതലപ്പെടുത്തി. മാർച്ച് 31ന് സേവന കാലാവധി അവസാനിക്കുന്ന പ്രമോട്ടർമാർക്ക് നിലവിലെ സാഹചര്യം കണക്കിലെടുത്ത് മേയ് 31വരെ സേവന കാലാവധി നീട്ടി നൽകാൻ സർക്കാർ തീരുമാനിച്ചു.
ആരോഗ്യവകുപ്പിന്റെ സഹകരണത്തോടെ പട്ടികജാതി സങ്കേതങ്ങളിലും പട്ടികവർഗ ഊരുകളിലും കോവിഡ് പ്രതിരോധ പ്രചരണ പ്രവർത്തനങ്ങൾ നടത്തും.  സങ്കേതങ്ങളും ഊരുകളും സന്ദർശിച്ച് പ്രമോട്ടർമാർ രോഗലക്ഷണങ്ങൾ ഉള്ളവർ ഉണ്ടോയെന്ന് കണ്ടെത്തും. യാത്രാവിവരങ്ങൾ ശേഖരിക്കുകയും അത് ബന്ധപ്പെട്ട ആരോഗ്യവകുപ്പ് അധികൃതരെ അറിയിക്കുകയും ചെയ്യും. പ്രമോട്ടർമാരുടെ പ്രവർത്തനങ്ങളും മറ്റ് പ്രതിരോധ, പ്രചരണ പ്രവർത്തനങ്ങളും ജില്ലാ തലത്തിൽ ഏകോപിപ്പിക്കുന്നതിനും പുരോഗതി വിലയിരുത്തുന്നതിനും റിപ്പോർട്ട് ലഭ്യമാക്കുന്നതിനും ജില്ലാ പട്ടികജാതി വികസന ഓഫീസർമാരെയും പ്രൊജക്ട് ഓഫീസർമാരെയും ചുമതലപ്പെടുത്തിയിട്ടുണ്ട്.
ഐസൊലേഷനിലോ നിരീക്ഷണത്തിലോ കഴിയുന്ന പട്ടികവിഭാഗം കുടുംബങ്ങൾക്ക് അതിജീവനത്തിന് സഹായം ആവശ്യമുണ്ടെങ്കിൽ ജില്ലാ ഭരണകൂടത്തിന്റെയോ തദ്ദേശസ്ഥാപനങ്ങളുടെയോ സഹകരണത്തോടെ ക്രമീകരണം ഏർപ്പെടുത്തും. പട്ടികവർഗ ഊരുകളിലെ 60 വയസിന് മുകളിൽ പ്രായമുള്ളവർക്ക് പ്രത്യേക പോഷകാഹാര കിറ്റ് നൽകും. 500 ഗ്രാം ചെറുപയർ, 500 ഗ്രാം വൻപയർ, 500 ഗ്രാം കടല, 500 ഗ്രാം ശർക്കര, 500 ഗ്രാം വെളിച്ചെണ്ണ, രണ്ട് കിലോ നുറുക്ക് ഗോതമ്പ് എന്നിവയാകും ഒരു കിറ്റിൽ ഉണ്ടാവുക. ഇതിന് പുറമെ പട്ടികവർഗ വികസന വകുപ്പ് നടപ്പാക്കുന്ന ഫുഡ് സപ്പോർട്ട് പ്രോഗ്രാം പ്രകാരം ആവശ്യമുള്ള എല്ലാ ഊരുകളിലും ഭക്ഷണ സാധനങ്ങൾ നൽകും. ഏതെങ്കിലും തൊഴിൽ ചെയ്തിരുന്നവർക്ക് തൊഴിൽ നഷ്ടപ്പെടുന്ന സാഹചര്യം ഉണ്ടെങ്കിൽ അവരെ തൊഴിലുറപ്പ് പദ്ധതിയുമായി ബന്ധപ്പെടുത്തി തൊഴിൽ ലഭ്യത ഉറപ്പുവരുത്തും.
രണ്ട് വകുപ്പിന്റെയും കീഴിലുള്ള ഹോസ്റ്റലുകളുടെയും മോഡൽ റസിഡൻഷ്യൽ സ്‌കൂളുകളുടെയും പ്രവർത്തനം നിലവിൽ നിർത്തിവച്ചു. ഈ സ്ഥാപനങ്ങളിലെ കുട്ടികൾക്കായി കരുതിയിരുന്ന ഭക്ഷ്യധാന്യങ്ങൾ അവർക്ക് വിതരണം ചെയ്യുന്നതിന് നടപടി സ്വീകരിച്ചിട്ടുണ്ട്. ഊരുകളിൽ ഞായർ വൈകിട്ട് 5ന് അവരവരുടെ വീടുകളിൽ പാരമ്പര്യ വാദ്യോപകരണങ്ങൾ വായിച്ച് പ്രതിരോധ പ്രവർത്തനങ്ങൾക്ക് നേതൃത്വം നൽകുന്ന ആരോഗ്യ സന്നദ്ധ പ്രവർത്തകരെ അനുമോദിക്കും.
ഇരു വകുപ്പിന്റെയും എല്ലാ ഓഫീസുകളിലും പ്രമോട്ടർമാർ മുഖേന സങ്കേതങ്ങളിലും, ഊരുകളിലും ബ്രേക്ക് ദി ചെയിൻ നടപ്പാക്കും.
പി.എൻ.എക്സ്.1166/2020