തദ്ദേശ വോട്ടർപട്ടിക 27ന്; പേര് ചേർക്കാൻ രണ്ടവസരം കൂടി

കാസർഗോഡ് ഒഴികെയുളള മറ്റ് ജില്ലകളിലെ തദ്ദേശസ്വയംഭരണ സ്ഥാപനങ്ങളുടെ വോട്ടർ പട്ടിക ഈ മാസം 27ന് പ്രസിദ്ധീകരിക്കുമെന്ന് സംസ്ഥാന തെരഞ്ഞെടുപ്പ് കമ്മീഷണർ വി.ഭാസ്‌കരൻ അറിയിച്ചു.  പൊതു തെരഞ്ഞെടുപ്പിന് മുമ്പ് പേര് ചേർക്കുന്നതിന് രണ്ട് അവസരങ്ങൾ കൂടി നൽകും.
മട്ടന്നൂർ നഗരസഭ ഒഴികെയുളള സംസ്ഥാനത്തെ എല്ലാ തദ്ദേശസ്ഥാപനങ്ങളിലെയും നിലവിലെ വോട്ടർപട്ടിക ജനുവരി 20ന് കരടായി പ്രസിദ്ധീകരിച്ച്  പേര് ചേർക്കുന്നതിനും മറ്റുമുളള അപേക്ഷകൾ മാർച്ച് 16 വരെ സ്വീകരിച്ചിരുന്നു.  അവ സംബന്ധിച്ച തുടർനടപടികൾ ഇലക്ടറൽ രജിസ്‌ട്രേഷൻ ഓഫീസർമാർ 25ന് പൂർത്തീകരിക്കും. അന്തിമ വോട്ടർപട്ടിക ഈ മാസം 27ന് പ്രസിദ്ധീകരിക്കും.  കോവിഡ്-19 വൈറസ് ബാധയുമായി ബന്ധപ്പെട്ട സർക്കാരിന്റെ ജാഗ്രത നിർദ്ദേശത്തിന്റെ പശ്ചാത്തലത്തിൽ കാസർഗോഡ് ജില്ലയിൽ തുടർ നടപടികൾ ഏപ്രിൽ മൂന്നിന് പൂർത്തിയാക്കി ആറിന് പട്ടിക പ്രസിദ്ധീകരിക്കും.
തദ്ദേശ സ്ഥാപനങ്ങളിലെ വാർഡ് പുനർവിഭജന നടപടികൾ ആരംഭിച്ചിട്ടുണ്ട്.  അവ പൂർത്തിയായാൽ ഉടൻ പുതിയ വാർഡുകളെ അടിസ്ഥാനമാക്കി ഇപ്പോൾ പ്രസിദ്ധീകരിക്കുന്ന വോട്ടർപട്ടിക കരടായി വീണ്ടും പ്രസിദ്ധീകരിക്കും.  വോട്ടർ പട്ടികയിൽ പേര് ഉൾപ്പെട്ടിട്ടില്ലാത്തവർക്ക് പേര് ചേർക്കുന്നതിന് അപ്പോഴും അപേക്ഷ സമർപ്പിക്കാം.  കരട്പട്ടികയിലെ മറ്റ് ആക്ഷേപങ്ങൾ പരിഹരിക്കുന്നതിനും അവസരം ഉണ്ടാകും.
2020-ലെ പൊതു തെരഞ്ഞെടുപ്പിന്റെ വിജ്ഞാപനം പുറപ്പെടുവിക്കുന്നതിന് മുമ്പ് പേര് ചേർക്കുന്നതിന് ഒരവസരം കൂടി നൽകും.  അപ്പോൾ ലഭിക്കുന്ന അപേക്ഷകളും ആക്ഷേപങ്ങളും പരിശോധിച്ചുകൊണ്ടായിരിക്കും കമ്മീഷൻ അന്തിമ വോട്ടർപട്ടിക പ്രസിദ്ധീകരിക്കുക.  അത്തരത്തിൽ തയ്യാറാക്കുന്ന വോട്ടർപട്ടികയാണ് തദ്ദേശ പൊതു തെരഞ്ഞെടുപ്പിൽ ഉപയോഗിക്കുക.
പി.എൻ.എക്സ്.1167/2020