കോവിഡ് 19: സർക്കാർ ഓഫീസുകളിൽ ജോലി ക്രമീകരണം

കോവിഡ് 19 രോഗവ്യാപനം തടയുന്നതുമായി ബന്ധപ്പെട്ട് സംസ്ഥാനത്തെ സർക്കാർ ഓഫീസുകളിലെ ജോലി സമയം ജീവനക്കാരുടെ ഹാജർ എന്നിവ സംബന്ധിച്ച് താത്കാലിക ക്രമീകരണങ്ങൾ ഏർപ്പെടുത്തി. സംസഥാനത്തെ ഗ്രൂപ്പ് ബി, സി, ഡി വിഭാഗം ജീവനക്കാർ സാധാരണ ഓഫീസ് ജോലികൾക്ക് തടസ്സം വരാത്തരീതിയിൽ 50 ശതമാനം പേർ വീതം ഒന്നിടവിട്ട ദിവസങ്ങളിൽ ജോലിക്ക് ഹാജരാകേണ്ടതാണ്. ജോലിക്ക് ഓഫീസിൽ ഹാജരാവാൻ കഴിയാത്ത ജീവനക്കാർ ഈ ദിവസങ്ങളിൽ ടെലിഫോൺ വഴിയോ മറ്റ് ഇലക്ട്രോണിക് മാധ്യമങ്ങൾ വഴിയോ ഓഫീസ് മേധാവിയുമായി ബന്ധപ്പെടേണ്ടതാണ്. അത്യാവശ്യ ഘട്ടങ്ങളിൽ ഓഫീസിൽ ഹാജരാകുവാൻ തയ്യാറാകേണ്ടതാണ്. ഓഫീസുകളിൽ ഹാജരാകാത്ത ദിവസങ്ങളിൽ ജീവനക്കാർക്ക് വീട്ടിലിരുന്നു ജോലി ചെയ്യുവാൻ ആവശ്യമായ വിപിഎൻ അടക്കമുള്ള സൗകര്യങ്ങൾ ഏർപ്പെടുത്തുവാൻ ബന്ധപ്പെട്ട വകുപ്പ് തലവന്മാർ പ്രത്യേക ശ്രദ്ധ പുലർത്തേണ്ടതാണ്. ശനിയാഴ്ചകൾ സംസ്ഥാനത്തെ എല്ലാ സർക്കാർ ഓഫീസുകൾക്കും അവധിയായിരിക്കും. ഏതെങ്കിലും ജീവനക്കാരുടെ വീടുകളിൽ ഹോം കോറന്റൈൻ നിർദ്ദേശിക്കപ്പെട്ടിട്ടുള്ളവർ ഉണ്ടെങ്കിൽ അത്തരം ജീവനക്കാർക്ക് സർക്കാർ മെഡിക്കൽ ഓഫീസറുടെ സർട്ടിഫിക്കറ്റിന്റെ അടിസ്ഥാനത്തിൽ പതിനാല് ദിവസത്തെ സ്പെഷ്യൽ കാഷ്വൽ ലീവ് ബന്ധപ്പെട്ട മേലധികാരികൾക്ക് അനുവദിക്കാവുന്നതാണ്. കോവിഡ് 19 ന്റെ വ്യാപനം തടയൽ, അത്യാവശ്യ ചികിത്സ സൗകര്യങ്ങൾ ഒരുക്കൽ, രോഗികളെയും നിരീക്ഷണത്തിലുള്ളവരെയും പാർപ്പിക്കുന്നതിനാവശ്യമായ ക്രമീകരണങ്ങൾ, കുടിവെള്ള വിതരണം, വാർത്താവിതരണം തുടങ്ങിയ അടിയന്തര സാഹചര്യങ്ങളിൽ പ്രവർത്തിയെടുക്കുന്ന ജീവനക്കാർ, മറ്റ് അത്യാവശ്യ സേവനങ്ങൾ എന്നീ വിഭാഗങ്ങളിൽ ഉൾപ്പെട്ട ജീവനക്കാർക്ക് തീരുമാനം ബാധകമായിരിക്കുകയില്ല. ഈ ക്രമീകരണങ്ങളെല്ലാം രണ്ടാഴ്ച കാലയളവിലേക്കായിരിക്കുമെന്ന് പ്രിൻസിപ്പൽ സെക്രട്ടറി കെ ആർ ജ്യോതിലാൽ അറിയിച്ചു.