കോവിഡ് 19 : പാവറട്ടി പഞ്ചായത്ത് അണുവിമുക്തമാക്കി ഫയർ ആന്റ് റെസ്‌ക്യു ടീം

പാവറട്ടിയിൽ കോവിഡ് 19 സ്ഥിരീകരിച്ച സാഹചര്യത്തിൽ വൈറസ് വ്യാപനം തടയുന്നതിന്റെ ഭാഗമായി ഗുരുവായൂർ ഫയർ ആൻഡ് റെസ്‌ക്യൂ ടീം അണുവിമുക്ത ശുചീകരണ പ്രവർത്തനങ്ങൾ നടത്തി. ഗുരുവായൂർ ഫയർസ്റ്റേഷനിൽ നിന്നും വകുപ്പിന്റെ 4500 ലിറ്റർ എം.ടി.യു വാഹനത്തിൽ 1000 ലിറ്റർ വെള്ളത്തിൽ 500 മില്ലി ലിറ്റർ ഹൈപ്പോ ക്ലോറൈറ്റ് ലായിനി എന്ന അനുപാതത്തിൽ കലർത്തി തയ്യാറാക്കിയ മിശ്രിതം ഉപയോഗിച്ചാണ് ശുചീകരണ പ്രവർത്തനങ്ങൾ നടത്തിയത്.
പാവറട്ടി ബസ് സ്റ്റാൻഡ് പരിസരത്ത് നിന്ന് ആരംഭിച്ച അണുവിമുക്ത ശുചീകരണ പ്രവർത്തനം പാവറട്ടി പഞ്ചായത്ത് ഓഫീസ് പരിസരം, പാവാട്ടി സെന്റർ, മാർക്കറ്റ് പരിസരം, ഷോപ്പിംഗ് കോംപ്ലക്സ്, എടിഎം സെന്റർ എന്നിവിടങ്ങളിലും പഞ്ചായത്തിലെ തീരമേഖല പ്രദേശങ്ങളോട് ചേർന്ന് കിടക്കുന്ന മരുതയൂർ, വെന്മേനാട്, ചുക്കു ബസാർ, കൈതമുക്ക് തുടങ്ങിയ സെന്ററുകളിലും അണുവിമുക്ത ശുചീകരണ പ്രവർത്തനങ്ങൾ നടത്തി. എസ്.ടി.ഒ. സുൽഫീസ് ഇബ്രാഹിമിന്റെ നേതൃത്വത്തിൽ എ.എസ്.ടി.ഒ. ഷാജി പി.കെ, ഫയർ ആന്റ് റെസ്‌ക്യു ഓഫീസർമാരായ എസ്. റെജി കുമാർ, എ. മൻസൂർ, എസ്. സനിൽകുമാർ, ബിജോയ് ഈനാശു എന്നിവരും സിവിൽ ഡിഫൻസ് പ്രവർത്തകരായ ഷാബിർ അലി, ബാലൻ, ആർ.എച്ച്. യൂസഫ്, രെഞ്ചിനി അനിലൻ എന്നിവരടങ്ങുന്ന ടീമാണ് പാവറട്ടിയിൽ അണുവിമുക്ത പ്രവർത്തനങ്ങൾ നടത്തിയത്. പ്രവർത്തനത്തിൽ എം.എൽ.എ മുരളി പെരുനെല്ലി, പഞ്ചായത്ത് പ്രസിഡന്റ് സി.പി. വത്സല, വാർഡ് മെമ്പർമാർ എന്നിവർ മേൽനോട്ടം വഹിച്ചു.