മാലിന്യനീക്കം പുനരാരംഭിച്ചു
കോവിഡ്-19 സാഹചര്യത്തില്‍ ലോക്ഡൗണ്‍ പ്രഖ്യാപിച്ചതിനെ തുടര്‍ന്ന് ബ്ലോക്ക് പഞ്ചായത്ത് നിര്‍ത്തി വെച്ചിരുന്ന മാലിന്യം ശേഖരണം പുനരാരംഭിച്ചു. ഗ്രാമ പഞ്ചായത്തുകളിലെ എംസിഎഫുകളില്‍ ശേഖരിച്ചിരിക്കുന്ന പ്ലാസ്റ്റിക് അടിയന്തിരമായി നീക്കം ചെയ്യേണ്ടതിനാലാണ് നടപടി. വീടുകളില്‍ നിന്നും ഗ്രാമപഞ്ചായത്ത് ശേഖരിച്ച്‌സൂക്ഷിച്ചിരിയ്ക്കുന്നത് എംസിഎഫുകളിലാണ്. ഇവിടെ നിന്നും പ്ലാസ്റ്റിക് മാലിന്യങ്ങള്‍ നീക്കം ചെയ്താല്‍ വീടുകളില്‍ സൂക്ഷിച്ചിരിയ്ക്കുന്ന പ്ലാസ്റ്റിക് ഗ്രാമ പഞ്ചായത്തുകള്‍ക്ക് എംസിഎഫുകളി എത്തിക്കുവാന്‍ സാധിക്കും. ഇതോടെ മാലിന്യനീക്കം സുഗമമാകും. ഇവിടെ നിന്നും ശേഖരിക്കുന്ന വൃത്തിയുള്ള പ്ലാസ്റ്റിക് വസ്തുക്കള്‍ ബ്ലോക്ക് പഞ്ചായത്ത് നെടിയശാലയില്‍ പ്രവര്‍ത്തിക്കുന്ന പ്ലാസ്റ്റിക് ഷ്രെഡ്ഡിംഗ് യൂണിറ്റില്‍ എത്തിക്കും. അവിടെനിന്നും ബെയില്‍ ചെയ്‌തെടുക്കുന്ന പ്ലാസ്റ്റിക് റീസൈക്കിള്‍ ചെയ്ത് പുതിയ ഉല്‍പന്നമാക്കിമാറ്റും. പൊടിച്ചെടുക്കുന്ന പ്ലാസ്റ്റിക് റോഡ് നിര്‍മ്മാണത്തിനായാണ് ഉപയോഗിക്കുന്നത്. ഇതിനോടകംതന്നെ വിവിധ പഞ്ചായത്തുകളില്‍ നിന്നും ശേഖരിച്ച പതിനായിരം കിലോ പ്ലാസ്റ്റിക് റോഡ്‌നിര്‍മ്മാണത്തിന് ഉപയോഗിച്ചു. ബ്ലോക്ക് പഞ്ചായത്ത് ക്ലീന്‍ കേരള കമ്പനിയുമായി സഹകരിച്ചാണ് പ്രവര്‍ത്തനങ്ങള്‍ നടപ്പാക്കുന്നത്. മഴക്കാല പൂര്‍വ്വ ശുചീകരണ പ്രവര്‍ത്തനവുമായി ബന്ധപ്പെട്ടാണ് ലോക്ഡൗണ്‍ കാലത്തും അടിയന്തിരമായി മാലിന്യനീക്കം പുനരാരംഭിക്കാന്‍ ബ്ലോക്ക് പഞ്ചായത്ത് തീരുമാനിച്ചതെന്ന് തൊടുപുഴ ബ്ലോക്ക് പഞ്ചായത്ത് പ്രസിഡണ്ട് അറിയിച്ചു.
- Log in to post comments