നെഹ്‌റു യുവ കേന്ദ്ര നാഷണല്‍ യൂത്ത് വോളന്റിയര്‍മാരെ തിരഞ്ഞെടുക്കുന്നു

കേന്ദ്ര യുവജന കാര്യ - കായിക മന്ത്രാലയത്തിന്റെ പദ്ധതി പ്രകാരം നെഹ്‌റു യുവ കേന്ദ്രയ്ക്ക് കീഴില്‍ നാഷണല്‍ യൂത്ത് വോളന്റിയര്‍മാരായി നിയമിക്കപ്പെടുന്നതിന് സേവന തല്‍പരരായ യുവതീ യുവാക്കളില്‍ നിന്ന് അപേക്ഷ ക്ഷണിച്ചു. നെഹ്‌റു യുവകേന്ദ്ര നടപ്പാക്കുന്ന യുവജന ക്ഷേമ പരിപാടികള്‍ സംഘടിപ്പിക്കുന്നതിന് നേതൃത്വം നല്‍കുകയും യൂത്ത് ക്ലബ്ബുകളുടെ പ്രവര്‍ത്തനങ്ങള്‍ ഏകോപിപ്പിക്കുകയുമാണ് വോളന്റിയര്‍മാരുടെ പ്രധാന ചുമതല. പരിശീലനത്തിനു ശേഷം ബ്ലോക്ക് തലത്തില്‍ നിയോഗിക്കപ്പെടുന്ന വോളന്റിയര്‍മാക്ക് പ്രതിമാസം 5000 രൂപ ഓണറേറിയം ലഭിക്കും. പരമാവധി രണ്ടു വര്‍ഷമാണ് നിയമന കാലാവധി.

എസ്.എസ്.എല്‍.സി വിജയമാണ് അടിസ്ഥാന യോഗ്യത. ഉയര്‍ന്ന വിദ്യാഭ്യാസ യോഗ്യതയുള്ളവര്‍, കമ്പ്യൂട്ടര്‍ പരിജ്ഞാനമുള്ളവര്‍, നെഹ്‌റു യുവകേന്ദ്രയില്‍ അഫിലിയേറ്റ് ചെയ്ത യൂത്ത് ക്ലബ്ബുകളിലെ അംഗങ്ങള്‍ തുടങ്ങിയവര്‍ക്ക് മുന്‍ഗണനയുണ്ട്. 2018 ഏപ്രില്‍ ഒന്നിന് 18 നും 29 നും ഇടയില്‍ പ്രായമുള്ളവരും ജില്ലയില്‍ സ്ഥിര താമസക്കാരുമായിരിക്കണം. റഗുലര്‍ കോഴ്‌സിനു  പഠിക്കുന്നവര്‍ അപേക്ഷിക്കാന്‍ അര്‍ഹരല്ല.

www.nyks.org എന്ന ഔദ്യോഗിക വെബ്‌സൈറ്റിലൂടെ ഓണ്‍ലൈനായോ മലപ്പുറം സിവില്‍ സ്റ്റേഷനിലെ നെഹ്‌റു യുവകേന്ദ്ര ഓഫീസില്‍ നേരിട്ടോ മാര്‍ച്ച് 13 നകം അപേക്ഷ സമര്‍പ്പിക്കണം. ഫോണ്‍ 0483-2734848.