മുള്ളരിങ്ങാട് : ആരോപണങ്ങള് വസ്തുതകള്ക്കു നിരക്കാത്തതെന്ന് ജില്ലാ കളക്ടര്
മുള്ളരിങ്ങാട് ഓര്ത്തഡോക്സ് പള്ളിയുടെ കൈമാറ്റത്തിന്റെ പേരില് കോവിഡ് വ്യാപനവുമായി ബന്ധപ്പെടുത്തി ജില്ലാ ഭരണകൂടത്തിനെതിരെയുള്ള ആരോപണങ്ങളില് ഒരുതരത്തിലുമുള്ള അടിസ്ഥാനമില്ലെന്നും ആക്ഷേപങ്ങള് വസ്തുതകള്ക്കു നിരക്കാത്തതാണെന്നും ജില്ലാ കളക്ടര് എച്ച്. ദിനേശന് വ്യക്തമാക്കി. കഴിഞ്ഞ പത്തിനാണ് പള്ളി കൈമാറ്റം ചെയ്യന്നതിനായി ജില്ലാ കളക്ടറുടെ നേതൃത്വത്തില് നടപടികള് സ്വീകരിച്ചത്. ഇക്കാര്യത്തില് ഹൈക്കോടതി ഉത്തരവ് നടപ്പാക്കാനാണ് ശ്രമിച്ചതെന്ന് ജില്ലാ കളക്ടര് പറഞ്ഞു.
കോടതി ഉത്തരവ് അനുസരിച്ച് കൈമാറ്റ നടപടികള്ക്കായുള്ള തയാറെടുപ്പിനു വേണ്ടി ജൂണ് 16 ന് ഉന്നതതല യോഗം ചേര്ന്നു. പ്രദേശത്ത് ക്രമസമാധാന പ്രശ്നം ഉണ്ടാകാന് സാധ്യതയുള്ളതിനാലും പൊലീസിന്റെ കുറവുള്ളതിനാലും വിധി നടപ്പിലാക്കുന്നതിനായി സമയം നീട്ടി ചോദിക്കാന് ഈ യോഗത്തില് തീരുമാനിക്കുകയായിരുന്നു. ഇക്കാര്യം കോടതിയെ അറിയിച്ചുവെങ്കിലും എത്രയും പെട്ടെന്ന് വിധി നടപ്പിലാക്കണമെന്നും ഇക്കാര്യത്തില് ഒരുതരത്തിലുമുള്ള കാലതാമസം അനുവദിക്കുകയില്ലെന്നും വ്യക്തമാക്കിയ കോടതി സമയം നീട്ടി ചോദിച്ചതിന് ജില്ലാ ഭരണകൂടത്തെ വിമര്ശിക്കുകയും ചെയ്തു.
പള്ളിക്കുള്ളിലെ ആരാധനയുടെ കാര്യത്തിലും സെമിത്തേരിയില് സംസ്കാരച്ചടങ്ങിന്റെ കാര്യത്തിലും ഹര്ജിക്കാരന് എല്ലാവിധ അവകാശങ്ങളുമുണ്ടെന്നു വ്യക്തമാക്കിയ കോടതി ഇതു തടസപ്പെടുത്താന് ശ്രമിച്ചാല് കര്ശന നടപടികള് സ്വീകരിക്കാനും നിര്ദേശം നല്കിയിരുന്നു. മാത്രമല്ല ഹര്ജിക്കാര്ക്ക് പെലീസ് സംരക്ഷണവും ഉറപ്പാക്കണമെന്ന് ഉത്തരവില് വ്യക്തമാക്കി. ഇതനുസരിച്ച് ജൂലായ് 15 വരെ പള്ളി കൈമാറ്റ നടപടികള്ക്ക് കോടതി അന്തിമസമയം അനുവദിച്ചു. പ്രദേശത്ത് ക്രമസമാധാന ഭംഗം ഉണ്ടാകാതെ കോടതി ഉത്തരവു നടപ്പാക്കുക എന്ന ലക്ഷ്യമാണ് ജില്ലാ ഭരണകൂടത്തിനു മുന്നിലുണ്ടായിരുന്നത്. ജനങ്ങള് കൂടുന്നത് ഒഴിവാക്കണമെന്നു പള്ളി അധികാരികളോടും നിര്ദ്ദേശിച്ചിരുന്നു. സഹകരണത്തിനായി ബന്ധപ്പെട്ട വ്യക്തിയുമായി ഫോണില് സംസാരിച്ചു. ഹൈക്കോടതി ഉത്തരവ് അനുസരിച്ചു ജില്ലാ ഭരണകൂടം സ്വീകരിച്ച നടപടികളെ ഇപ്പോള് കോവിഡ് വ്യാപനവുമായി ബന്ധിപ്പിക്കാന് നടത്തുന്ന ശ്രമങ്ങള് അപലപനീയമാണെന്നു ജില്ലാ കളക്ടര് വ്യക്തമാക്കി.
- Log in to post comments