മുനമ്പം ഹാർബർ സെപ്റ്റംബർ 21 ന് തുറക്കും 

മുനമ്പം ഹാർബർ സെപ്റ്റംബർ 21 ന് തുറക്കും 

എറണാകുളം : കോവിഡ് വ്യാപനം മൂലം തത്കാലികമായി അടച്ചിട്ടിരുന്ന മുനമ്പം ഹാർബർ സെപ്റ്റംബർ 21 മുതൽ പ്രവർത്തനം പുനഃരാരംഭിക്കുമെന്ന് ഫിഷറീസ് വകുപ്പ് ജോയിന്റ് ഡയറക്ടർ അറിയിച്ചു. കോവിഡ് മാനദണ്ഡങ്ങൾ പാലിച്ചു കൊണ്ടായിരിക്കും ഹാർബറിലെ പ്രവർത്തനങ്ങൾ. ബോട്ടുകൾ ഒന്നിടവട്ട ദിവസങ്ങളിൽ മാത്രമേ മത്സ്യ ബന്ധനത്തിൽ ഏർപ്പെടാൻ പാടുള്ളു. രജിസ്റ്റർ നമ്പർ ഒറ്റയക്കത്തിൽ അവസാനിക്കുന്ന ബോട്ടുകൾ തിങ്കൾ, ബുധൻ, വെള്ളി ദിവസങ്ങളിലും ഇരട്ടയക്കത്തിൽ അവസാനിക്കുന്ന ബോട്ടുകൾ ചൊവ്വ, വ്യാഴം, ശനി ദിവസങ്ങളിലും മത്സ്യ ബന്ധനത്തിന് പോവാൻ അനുവദിക്കും. മത്സ്യ ബന്ധനത്തിന് പോകുന്ന ബോട്ടുകൾ നിർബന്ധമായും പാസ്സ് എടുക്കണം. മത്സ്യ ബന്ധനത്തിന് ശേഷം ഹാർബറിൽ എത്തുന്ന വള്ളങ്ങൾ യഥാക്രമം ടോക്കൺ എടുക്കുകയും ടോക്കൺ അനുസരിച്ച് മത്സ്യം ഇറക്കുകയും ചെയ്യണം. ദിവസേന പരമാവധി 30 ബോട്ടുകൾക്ക് മാത്രമേ ടോക്കൺ അനുവദിക്കൂ. ഹാർബറിനകത്തു തിരക്ക് നിയന്ത്രിക്കുന്നതിനുള്ള നിർദേശങ്ങളും സർക്കാർ ഉത്തരവുകളും മത്സ്യ തൊഴിലാളികളും അനുബന്ധ ജോലികളിൽ ഏർപ്പെടുന്നവരും കർശനമായി പാലിക്കണം.