സ്ത്രീകള്‍ക്കു നേരേയുള്ള അതിക്രമങ്ങള്‍ തടയാന്‍ വ്യാപകമായ ബോധവത്കരണം ആവശ്യമാണെന്നും സമൂഹത്തില്‍ നിന്ന് സ്ത്രീകള്‍ക്ക് ആദരവ് ലഭിക്കേണ്ടതുണ്ടെന്നും ആരോഗ്യ സാമൂഹ്യനീതി വകുപ്പ് മന്ത്രി കെ. കെ. ശൈലജ ടീച്ചര്‍ പറഞ്ഞു. സാമൂഹ്യനീതി വകുപ്പ് തൈക്കാട് ഗസ്റ്റ് ഹൗസില്‍ സംഘടിപ്പിച്ച മാതാപിതാക്കളുടെയും മുതിര്‍ന്ന പൗരന്‍മാരുടെയും ക്ഷേമവും സംരക്ഷണവും പഠനക്ലാസ് ഉദ്ഘാടനം ചെയ്യുകയായിരുന്നു മന്ത്രി. സ്ത്രീകള്‍ക്ക് നേരേയുണ്ടാകുന്ന അതിക്രമങ്ങള്‍ക്കുള്ള ശിക്ഷകളെക്കുറിച്ചും നിയമങ്ങളെക്കുറിച്ചും അവബോധമുണ്ടാക്കണം. ഇതിനാവശ്യമായ നടപടി സാമൂഹ്യനീതി വകുപ്പ് സ്വീകരിക്കുമ്പോള്‍ ആഭ്യന്തര വകുപ്പിന്റെ എല്ലാ പിന്തുണയുമുണ്ട്.

ഒന്‍പത്, പത്ത്, 11, 12 ക്ലാസുകളില്‍ പഠിക്കുന്ന മത്സ്യത്തൊഴിലാളി ക്ഷേമനിധി ബോര്‍ഡില്‍ അംഗമായതും ആംആദ്മി ബീമയോജന ലിസ്റ്റില്‍ ഉള്‍പ്പെട്ടിട്ടുളളതുമായ മത്സ്യത്തൊഴിലാളികളുടെ മക്കളായ വിദ്യാര്‍ത്ഥികള്‍ക്ക് ആം ആദ്മി ബീമ യോജന പദ്ധതി 2017 -18 പ്രകാരം സ്‌കോളര്‍ഷിപ്പിന് അപേക്ഷിക്കാം. പ്രതിവര്‍ഷം പരമാവധി രണ്ടു മക്കള്‍ക്ക് ലഭിക്കും. 2017 മാര്‍ച്ചില്‍ പ്ലസ്ടു പൂര്‍ത്തിയാക്കുന്ന വിദ്യാര്‍ത്ഥികള്‍ക്കും സ്‌കോളര്‍ഷിപ്പിന് അപേക്ഷിക്കാം. അനുബന്ധരേഖകള്‍ സഹിതം ആഗസ്റ്റ് 15നകം ഫിഷറീസ് ഓഫീസുകളില്‍ അപേക്ഷിക്കണം.

പി.എന്‍.എക്‌സ്.3382/17

സംസ്ഥാന വ്യവസായ വകുപ്പിന് കീഴിലുള്ള പൊതുമേഖല വ്യവസായ പുനസംഘടനാ ബോര്‍ഡ് (റിയാബ്) പൊതുമേഖല സഥാപനങ്ങളില്‍ ജി.എസ്.റ്റി നടപ്പാക്കുമ്പോള്‍ എന്ന വിഷയത്തില്‍ ശില്പശാല സംഘടിപ്പിക്കുന്നു. ഇന്ന് (ആഗസ്റ്റ് നാല്) രാവിലെ 10 ന് എറണാകുളം ഗസ്റ്റ് ഹൗസിലാണ് ശില്പശാല. വിദഗ്ധര്‍ വിവിധ വിഷയങ്ങളില്‍ ക്ലാസ്സുകളെടുക്കും. വകുപ്പിന് കീഴിലുള്ള പൊതുമേഖലാ സ്ഥാപനങ്ങളിലെ മാനേജിങ് ഡയറക്ടര്‍ക്കും ഉന്നത ഉദേ്യാഗസ്ഥര്‍ക്കും ജി.എസ്.റ്റിയെക്കുറിച്ച് കൂടുതല്‍ അവബോധം വരുത്തുന്നതിനാണ് ശില്പശാല.

പി.എന്‍.എക്‌സ്.3381/17

സംസ്ഥാന വൈദ്യുതി ഉപദേശക സമിതി യോഗം ആറുമാസത്തിലൊരിക്കല്‍ ചേരണം എന്ന ഭേദഗതി സംബന്ധിച്ച് അഭിപ്രായങ്ങളും നിര്‍ദ്ദേശങ്ങളും 25 ന് മുമ്പ് സമര്‍പ്പിക്കണമെന്ന് റഗുലേറ്ററി കമ്മീഷന്‍ സെക്രട്ടറി അറിയിച്ചു. ഭേദഗതിയുടെ കരട് വിജ്ഞാപനം erckerala.orgയില്‍ പ്രസിദ്ധീകരിച്ചിട്ടുണ്ട്.

പി.എന്‍.എക്‌സ്.3380/17

കേരള ഹൈക്കോടതിയുടെ ഇ കോര്‍ട്ട് പദ്ധതിയില്‍ സെന്‍ട്രല്‍ പ്രോജക്ട് കോ ഓര്‍ഡിനേറ്റര്‍ വിഭാഗത്തില്‍ വിവിധ ഒഴിവുകളില്‍ കരാര്‍ നിയമനത്തിന് ഓണ്‍ലൈനില്‍ അപേക്ഷിക്കാം. ഡെവലപ്പറുടെ അഞ്ചും സീനിയര്‍ ടെക്‌നിക്കല്‍ ഓഫീസറുടെ ഒന്നും സീനിയര്‍ ഓഫീസര്‍/ടെക്‌നിക്കല്‍ അസിസ്റ്റന്റിന്റെയും സീനിയര്‍ ഡെവലപ്പറുടെയും രണ്ടു വീതവും ഒഴിവുകളുണ്ട്. വിശദവിവരം www.hckrecruitment.nic.in ല്‍ ലഭിക്കും. 1982 ജനുവരി രണ്ടിനും അതിനു ശേഷവും ജനിച്ചവര്‍ക്ക് അപേക്ഷിക്കാം.

പി.എന്‍.എക്‌സ്..3379/17

മട്ടന്നൂര്‍ നഗരസഭാ തിരഞ്ഞെടുപ്പ് നടക്കുന്ന സാഹചര്യത്തില്‍ മട്ടന്നൂര്‍ നഗരസഭ, തലശേരി നഗരസഭ, ഇരിട്ടി ബ്ലോക്ക് പഞ്ചായത്ത്, തലശ്ശേരി ബ്ലോക്ക് പഞ്ചായത്ത് എന്നിവയുടെ പരിധിയിലെ സര്‍ക്കാര്‍, അര്‍ദ്ധ സര്‍ക്കാര്‍, പൊതുമേഖലാ സ്ഥാപനങ്ങള്‍ എന്നിവയിലെ പോളിംഗ് ഡ്യൂട്ടിക്ക് നിയോഗിച്ചിട്ടുളള ജീവനക്കാരെയും അധ്യാപകരെയും തിരഞ്ഞെടുപ്പ് കഴിയുന്നതുവരെ സ്ഥലം മാറ്റരുതെന്ന് സര്‍ക്കാര്‍ ഉത്തരവായി. ഏതെങ്കിലും ഉദേ്യാഗസ്ഥനെ സ്ഥലം മാറ്റണമെങ്കില്‍ ഉത്തരവിറക്കുന്നതിന് മുമ്പ് സംസ്ഥാന തിരഞ്ഞെടുപ്പ് കമ്മീഷന്റെ അനുമതി വാങ്ങണം.

പി.എന്‍.എക്‌സ്.3378/17

സ്‌കോള്‍-കേരള മുഖേനയുള്ള 2017 - 19 ബാച്ച് ഒന്നാംവര്‍ഷ ഹയര്‍സെക്കന്‍ഡറി കോഴ്‌സുകളുടെ പ്രവേശന തീയതികള്‍ ദീര്‍ഘിപ്പിച്ചു. അന്‍പത് രൂപ പിഴയോടെ ആഗസ്റ്റ് 16 വരെയും ഇരുനൂറ്റിയന്‍പത് രൂപ അധിക പിഴയോടെ ആഗസ്റ്റ് 19 വരെയും ഫീസ് അടച്ച് രജിസ്റ്റര്‍ ചെയ്യാം. രജിസ്റ്റര്‍ ചെയ്ത അപേക്ഷകള്‍ ആഗസ്റ്റ് 21 നകം ലഭിക്കുംവിധം ബന്ധപ്പെട്ട ജില്ലാ കേന്ദ്രങ്ങളില്‍/സംസ്ഥാന കേന്ദ്രത്തില്‍ നേരിട്ടോ സ്പീഡ്/രജിസ്റ്റേര്‍ഡ് തപാല്‍ മാര്‍ഗമോ എത്തിക്കണമെന്ന് എക്‌സിക്യൂട്ടീവ് ഡയറക്ടര്‍ അറിയിച്ചു.

പി.എന്‍.എക്‌സ്.3377/17

തിരു-കൊച്ചി മെഡിക്കല്‍ കൗണ്‍സിലില്‍ 2016 ഡിസംബര്‍ 31 വരെ ഇന്ത്യന്‍ സിസ്റ്റംസ് ഓഫ് മെഡിസിനില്‍ (ആയുര്‍വേദ, സിദ്ധ, യുനാനി) രജിസ്റ്റര്‍ ചെയ്തിട്ടുള്ളവരില്‍ നിന്നും കേന്ദ്ര കൗണ്‍സിലിലേക്ക് കേരളത്തില്‍ നിന്ന് പ്രതിനിധികളെ തെരഞ്ഞെടുക്കുന്നതിനുള്ള കരട് ലിസ്റ്റ് പ്രസിദ്ധീകരിച്ചു. ഗവ. സെക്രട്ടേറിയറ്റിലെ അനക്‌സ്-2 അഞ്ചാംനിലയിലെ റൂം നമ്പര്‍ 450 ലെ റിട്ടേണിംഗ് ഓഫീസറുടെ കാര്യാലയത്തില്‍ പ്രവൃത്തിദിവസങ്ങളില്‍ ഓഫീസ് സമയത്ത് പരിശോധിക്കാം. സര്‍ക്കാര്‍ വെബ്‌സൈറ്റായ www.kerala.gov.in ലും ലിസ്റ്റ് പ്രസിദ്ധീകരിച്ചിട്ടുണ്ട്. ആക്ഷേപങ്ങളും അഭിപ്രായങ്ങളും വിജ്ഞാപന തീയതി മുതല്‍ 30 ദിവസത്തിനകം ആര്‍.

പത്തനംതിട്ട ജില്ലയില്‍ വിവിധ വകുപ്പുകളില്‍ ലോവര്‍ ഡിവിഷന്‍ ക്ലാര്‍ക്ക് (കാറ്റഗറി നം. 414/16) തസ്തികയിലേക്കുള്ള ഒ.എം.ആര്‍. പരീക്ഷ നാളെ (ആഗസ്റ്റ് അഞ്ച്) ഉച്ചയ്ക്ക് 1.30 മുതല്‍ 3.15 വരെ കൊല്ലം, പത്തനംതിട്ട, ആലപ്പുഴ, കോട്ടയം ജില്ലകളില്‍ ഏര്‍പ്പെടുത്തിയിട്ടുള്ള പരീക്ഷാ കേന്ദ്രങ്ങളില്‍ നടക്കും. പത്തനംതിട്ട ജില്ലയില്‍ മാത്രം 25,399 ഉദ്യോഗാര്‍ത്ഥികള്‍ക്കായി 120 പരീക്ഷാ കേന്ദ്രങ്ങള്‍ ഏര്‍പ്പെടുത്തിയിട്ടുണ്ട്.

2016 - 17 വിദ്യാഭ്യാസ വര്‍ഷത്തെ നാഷണല്‍ സര്‍വീസ് സ്‌കീം പ്രവര്‍ത്തനങ്ങള്‍ക്ക് സംസ്ഥാന സര്‍ക്കാര്‍ ഏര്‍പ്പെടുത്തിയ അവാര്‍ഡുകള്‍ പ്രഖ്യാപിച്ചു. ഉന്നത വിദ്യാഭ്യാസ വകുപ്പ് സെക്രട്ടറി ചെയര്‍മാനും സ്റ്റേറ്റ് എന്‍.എസ്.എസ് ഓഫീസര്‍ കണ്‍വീനറുമായ സമിതിയാണ് അവാര്‍ഡിന് അര്‍ഹരായവരെ തെരഞ്ഞെടുത്തത്. മികച്ച എന്‍.എസ്.എസ് പ്രവര്‍ത്തനത്തിന് യൂണിവേഴ്‌സിറ്റി തലത്തിലുള്ള അവാര്‍ഡിന് കാലിക്കറ്റ് സര്‍വകലാശാലയും, മികച്ച ഡയറക്ടറേറ്റ് തലത്തിലുള്ള അവാര്‍ഡിന് ഇന്‍സ്റ്റിറ്റ്യൂട്ട് ഓഫ് ഹ്യൂമന്‍ റിസോഴ്‌സസ് ഡെവലപ്‌മെന്റ് ഡയറക്ടറേറ്റും, ഹയര്‍ സെക്കന്‍ഡറി എജ്യുക്കേഷന്‍ ഡയറക്ടറേറ്റും തെരഞ്ഞെടുക്കപ്പെട്ടു.