ചക്കയുടെ ഉത്പാദനവും മൂല്യവര്‍ധനവും വിപണനവും എന്ന വിഷയത്തെ ആസ്പദമാക്കി സംഘടിപ്പിക്കുന്ന അന്താരാഷ്ട്ര ശില്പശാലയും ചക്ക മഹോത്സവവും അമ്പലവയല്‍ മേഖലാ കാര്‍ഷിക ഗവേഷണ കേന്ദ്രത്തില്‍ ആഗസ്റ്റ് ഒമ്പതിന് ആരംഭിക്കുമെന്ന് കൃഷി മന്ത്രി വി.എസ്. സുനില്‍കുമാര്‍ പത്രസമ്മേളനത്തില്‍ അറിയിച്ചു. ശില്പശാലയുടെ ഔപചാരിക ഉദ്ഘാടനം 12ന് സ്പീക്കര്‍ പി. ശ്രീരാമകൃഷ്ണന്‍ നിര്‍വഹിക്കും. ചക്കയുടെ പോഷകമൂല്യങ്ങളേയും ഉപയോഗരീതികളേയും മൂല്യവര്‍ധിത ഉത്പന്നങ്ങളേയും വിപണനസാധ്യതകളേയും കുറിച്ച് പൊതുജനങ്ങളെ ബോധവാന്മാരാക്കുകയും ഇത് ഉപയോഗപ്പെടുത്താന്‍ കര്‍ഷകരേയും സംരംഭകരേയും പ്രാപ്തരാക്കുകയുമാണ് ശില്പശാലയുടെ ലക്ഷ്യം.

വിവിധപദ്ധതികളില്‍ നിര്‍മാണം തുടങ്ങി പൂര്‍ത്തിയാക്കാനാവാത്ത 70,000 ഓളം വീടുകള്‍ അടുത്ത മാര്‍ച്ച് 31ന് മുമ്പ് പൂര്‍ത്തിയാക്കാന്‍ ലൈഫ് മിഷനിലൂടെ കഴിയണമെന്ന് മുഖ്യമന്ത്രി പിണറായി വിജയന്‍ പറഞ്ഞു. അര്‍ഹരായവര്‍ പട്ടികയ്ക്ക് പുറത്തുപോകാതിരിക്കാനും അനര്‍ഹര്‍ കടന്നുകൂടാതിരിക്കാനും തദ്ദേശസ്ഥാപനങ്ങള്‍ പ്രത്യേക ജാഗ്രത പുലര്‍ത്തണം. ഭവന നിര്‍മാണ മിഷനായ 'ലൈഫി'ന്റെ തുടര്‍പ്രവര്‍ത്തനവും ഗുണഭോക്തൃപട്ടിക അന്തിമമാക്കുന്നതും സംബന്ധിച്ച് തദ്ദേശസ്ഥാപന അധ്യക്ഷന്‍മാര്‍ക്കായി നടത്തിയ ഏകദിന ശില്‍പശാല ഉദ്ഘാടനം ചെയ്തുസംസാരിക്കുകയായിരുന്നു അദ്ദേഹം.

പത്രപ്രവര്‍ത്തക പെന്‍ഷന്‍ പദ്ധതിയില്‍ അംശദായക കുടിശിക വരുത്തിയവര്‍ക്ക് ആഗസ്റ്റ് 31 വരെ ഇന്‍ഫര്‍മേഷന്‍ പബ്ലിക് റിലേഷന്‍സ് വകുപ്പിന്റെ ജില്ല/മേഖലാ ഓഫീസുകളില്‍ 15 ശതമാനം പിഴയോടെ കുടിശിക തുക അടയ്ക്കാം. തുക ഒറ്റത്തവണയായി അടയ്ക്കണം. പത്ര സ്ഥാപനത്തില്‍ തുടരുന്നത് സംബന്ധിച്ച പേ സ്ലിപ് ഉള്‍പ്പെടെയുളള രേഖകള്‍ തുക അടയ്ക്കുന്ന വേളയില്‍ ഹാജരാക്കണമെന്ന് ഇന്‍ഫര്‍മേഷന്‍ പബ്ലിക് റിലേഷന്‍സ് ഡയറക്ടര്‍ അറിയിച്ചു.

പി.എന്‍.എക്‌സ്.3349/17

പട്ടിക ജാതി വികസന വകുപ്പിന്റെ തിരുവനന്തപുരം, കൊല്ലം, പത്തനംതിട്ട ജില്ലകളിലെ ഐ.റ്റി.ഐ കളിലേക്ക് ഇന്ന് (ആഗസ്റ്റ് രണ്ട്) ദക്ഷിണമേഖല ട്രെയിനിംഗ് ഇന്‍സ്‌പെക്ടര്‍ ഓഫീസില്‍ നടത്താനിരുന്ന ഗസ്റ്റ് ഇന്‍സ്ട്രക്ടര്‍ ഇന്റര്‍വ്യൂ ആഗസ്റ്റ് നാലിലേക്ക് മാറ്റി.

പി.എന്‍.എക്‌സ്.3348/17

ഏതാനും വര്‍ഷം കൊണ്ട് സാങ്കേതികാടിത്തറയില്‍ കയര്‍ മേഖലയെ പുനഃസംഘടിപ്പിച്ച് ആധുനിക വ്യവസായമായി മാറ്റുന്നതിനാണ് ലക്ഷ്യമിടുന്നതെന്ന് ധനകാര്യ-കയര്‍ വികസന മന്ത്രി ഡോ. ടി.എം. തോമസ് ഐസക് പറഞ്ഞു. പരമ്പരാഗതമായി കയര്‍ പിരിക്കുന്നവരുടെ ഉത്പന്നങ്ങള്‍ക്ക് പരമാവധി വിപണന അവസരം നല്‍കുന്നതിനൊപ്പം യന്ത്രവത്‌വകരണം പ്രോത്‌സാഹിപ്പിക്കുമെന്നും അദ്ദേഹം പറഞ്ഞു. സംസ്ഥാന കയര്‍ വികസന വകുപ്പ് സംഘടിപ്പിക്കുന്ന 'കയര്‍ കാര്‍ണിവല്‍ 2017'ന്റെ ഉദ്ഘാടനം പാളയത്തെ വിപണനകേന്ദ്രത്തില്‍ നിര്‍വഹിച്ചു സംസാരിക്കുകയായിരുന്നു അദ്ദേഹം.

കേരള സര്‍ക്കാറിന്റെ കീഴിലുള്ള സഹകരണ യൂണിയന്റെ കേരള ഇന്‍സ്റ്റിറ്റ്യൂട്ട് ഓഫ് കോ-ഓപ്പറേറ്റീവ് മാനേജ്‌മെന്റില്‍ (കിക്മ) എം.ബി.എ (ഫുള്‍ടൈം) കോഴ്‌സില്‍ ഒഴിവുള്ള സീറ്റിലേക്ക് പ്രവേശനത്തിന് ആഗസ്റ്റ് മൂന്ന്, നാല് തീയതികളില്‍ കിക്മ ക്യാമ്പസില്‍ രാവിലെ 10 മുതല്‍ നടത്തും. കൂടുതല്‍ വിവരങ്ങള്‍ 8547618290/9895021279 എന്നീ നമ്പരുകളിലും www.kicmakerala.in ലും ലഭ്യമാണ്.

പി.എന്‍.എക്‌സ്.3346/17

കേന്ദ്ര ന്യൂനപക്ഷ മന്ത്രാലയം കേരളത്തിലും മറ്റ് സംസ്ഥാനങ്ങളിലും പഠിക്കുന്ന ന്യൂനപക്ഷ വിഭാഗങ്ങളായ മുസ്ലിം, ക്രിസ്ത്യന്‍, ബുദ്ധ,ജൈന,സിഖ്,പാഴ്‌സി വിഭാഗങ്ങളില്‍പ്പെട്ടതും വിവിധ സാങ്കേതിക/പ്രൊഫഷണല്‍ ബിരുദ/ബിരുദാനന്തര കോഴ്‌സുകള്‍ക്ക് പഠിക്കുന്നതുമായ കേരളീയരായ വിദ്യാര്‍ത്ഥികള്‍ക്ക് നല്‍കുന്ന മെരിറ്റ്-കം-മീന്‍സ് സ്‌കോളര്‍ഷിപ്പ് പുതുക്കലിന് അപേക്ഷിക്കാനുള്ള തീയതി ആഗസ്റ്റ് 31 വരെ നീട്ടി. അപേക്ഷ സമര്‍പ്പിക്കുന്നതിനുള്ള വിശദവിവരങ്ങള്‍ www.detekerala.gov.in ല്‍ എം.സി.എം സ്‌കോളര്‍ഷിപ്പ് ലിങ്കില്‍ ലഭ്യമാണ്. കൂടുതല്‍ വിവരങ്ങള്‍ക്ക് 0471-2561214, 9497723630.

കേരളത്തിലെ വിവിധ സര്‍ക്കാര്‍ /എയ്ഡഡ്/സര്‍ക്കാര്‍ നിയന്ത്രിത സ്വാശ്രയ എന്‍ജിനീയറിങ് കോളേജുകളിലെ എം.ടെക് സീറ്റുകളില്‍ സ്‌പോട്ട് അഡ്മിഷന്‍ ഓഗസ്റ്റ് എട്ട്, ഒന്‍പത് തീയതികളില്‍ തിരുവനന്തപുരം കോളേജ് ഓഫ് എന്‍ജിനീയറിങ്ങില്‍ (സി.ഇ.റ്റി) നടക്കും. വിശദവിവരങ്ങള്‍ www.admissions.dtekerala.gov.in, www.dtekerala.gov.in, www.cet.ac.in എന്നിവയില്‍ ലഭിക്കും. .

പി.എന്‍.എക്‌സ്.3344/17

തിരുവനന്തപുരം ഗവ. ആര്‍ട്‌സ് കോളേജില്‍ അറബിക് വിഷയത്തില്‍ ഗസ്റ്റ് ലക്ചററുടെ ഒരു ഒഴിവിലേക്ക് യു.ജി.സി നിബന്ധന പ്രകാരമുളള യോഗ്യതയുളളവരെ പരിഗണിക്കും. യു.ജി.സി യോഗ്യതയുളള ഉദ്യോഗാര്‍ത്ഥികളുടെ അഭാവത്തില്‍ 55 ശതമാനത്തില്‍ കുറയാത്ത മാര്‍ക്കോടുകൂടി അറബിക് വിഷയത്തില്‍ ബിരുദാനന്തര ബിരുദം നേടിയവരെയും പരിഗണിക്കും. ഉദ്യോഗാര്‍ത്ഥികള്‍ കൊല്ലം ഡെപ്യൂട്ടി ഡയറക്ടറേറ്റില്‍ പേര് രജിസ്റ്റര്‍ ചെയ്തവരായിരിക്കണം. വിദ്യാഭ്യാസ യോഗ്യതകള്‍, ജനനതീയതി, മുന്‍പരിചയം എന്നിവ തെളിയിക്കുന്ന അസല്‍ രേഖകള്‍ സഹിതം ആഗസ്റ്റ് നാലിന് രാവിലെ 10ന് കോളേജ് പ്രിന്‍സിപ്പലിന്റെ ഓഫീസിലെത്തണം. ഫോണ്‍: 0471 2323040

രാജ്ഭവനില്‍ നിലവിലുളള ടെലിഫോണ്‍ ഓപ്പറേറ്റര്‍ തസ്തികയിലെ ഒഴിവ് ഡെപ്യൂട്ടേഷന്‍ വ്യവസ്ഥയില്‍ നികത്തുന്നതിനുളള പാനല്‍ തയ്യാറാക്കുന്നതിന് സര്‍ക്കാര്‍ വകുപ്പുകളിലെ സമാന തസ്തികയിലുളള ഉദ്യോഗസ്ഥരില്‍ നിന്നും അപേക്ഷകള്‍ ക്ഷണിച്ചു. താത്പര്യമുളളവര്‍ ആഗസ്റ്റ് അഞ്ചിനു മുമ്പ് അപേക്ഷകള്‍ പൊതുഭരണ (പൊളിറ്റിക്കല്‍) വകുപ്പില്‍ നല്‍കണം.

പി.എന്‍.എക്‌സ്.3342/17