കോവിഡ് കാലത്ത് 1000 കോടി രൂപയുടെ നിര്‍മ്മാണ പ്രവര്‍ത്തനങ്ങള്‍ നാടിന് സമര്‍പ്പിക്കുന്നതിനുള്ള നടപടികള്‍ സ്വീകരിച്ചിട്ടുണ്ടെന്ന് പൊതുമരാമത്ത്, രജിസ്‌ട്രേഷന്‍ വകുപ്പ് മന്ത്രി ജി.സുധാകരന്‍ പറഞ്ഞു. മല്ലപ്പള്ളി-ആനിക്കാട് പഞ്ചായത്തുകളെ ബന്ധിപ്പിച്ച് മണിമലയാറിനു കുറുകെ നിര്‍മിച്ച കാവനാല്‍കടവ് പാലത്തിന്റെ ഉദ്ഘാടനം മുരണി യുപി സ്‌കൂള്‍ കെട്ടിടത്തില്‍ ഓഡിയോ കോളിലൂടെ ഉദ്ഘാടനം ചെയ്ത് സംസാരിക്കുകയായിരുന്നു മന്ത്രി. 

കോവിഡ് 19 പ്രതിരോധ പ്രവര്‍ത്തനങ്ങള്‍ക്കായി ഒരു വാര്‍ഡിലെ മുഴുവന്‍ കുടുംബങ്ങള്‍ക്കും മാസ്‌ക്ക് നല്‍കി കിളിവയല്‍ വാര്‍ഡിലെ കുടുംബശ്രീ മാതൃകയായി. ഏറത്ത് പഞ്ചായത്ത് കിളിവയല്‍ ആറാം വാര്‍ഡില്‍ കോവിഡ് പ്രതിരോധ പ്രവര്‍ത്തനത്തിന്റെ ഭാഗമായി വാര്‍ഡിലെ കുടുംബശ്രീ എല്ലാ വീടുകളിലും കടുംബത്തിലെ എല്ലാ അംഗങ്ങള്‍ക്കും സൗജന്യമായി മാസ്‌ക്ക് നല്‍ക്കി. 

ഇതര സംസ്ഥാനങ്ങളില്‍നിന്ന് നിസാമുദീന്‍ - എറണാകുളം, മുംബൈ-തിരുവനന്തപുരം, നിസാമുദീന്‍ - എറണാകുളം സ്‌പെഷ്യല്‍ ട്രെയിനുകളിലായി ശനി (ജൂലൈ 4), ഞായര്‍ ( ജൂലൈ 5 ) ദിവസങ്ങളിലായി പത്തനംതിട്ട ജില്ലക്കാരായ നാലുപേര്‍കൂടി എത്തി. ഇവര്‍ നാലുപേരും വീടുകളില്‍ എത്തി നിരീക്ഷണത്തില്‍ പ്രവേശിച്ചു.

തിരുവനന്തപുരം, കൊച്ചി, കരിപ്പൂര്‍, കണ്ണൂര്‍ അന്താരാഷ്ട്ര വിമാനത്താവളങ്ങള്‍ വഴി ശനി (ജൂലൈ 4), ഞായര്‍ (ജൂലൈ 5) ദിവസങ്ങളിലായി 39 വിമാനങ്ങളില്‍ പത്തനംതിട്ട ജില്ലക്കാരായ 339 പ്രവാസികള്‍കൂടി എത്തി. ഇവരില്‍ 63 പേരെ വിവിധ കോവിഡ് കെയര്‍ സെന്ററുകളിലും മൂന്നു ഗര്‍ഭിണികള്‍ ഉള്‍പ്പെടെ 276 പേരെ വീടുകളിലും നിരീക്ഷണത്തിലാക്കി.

അടൂര്‍-തുമ്പമണ്‍-കോഴഞ്ചേരി കിഫ്ബി റോഡ് സര്‍വേ ആരംഭിച്ചു. സര്‍വേയുടെ ഉദ്ഘാടനം ചിറ്റയം ഗോപകുമാര്‍ എംഎല്‍എ നിര്‍വഹിച്ചു.  കിഫ്ബി പദ്ധതിയില്‍ ഉള്‍പ്പെടുത്തി 117 കോടി രൂപാ ചെലവില്‍ 12 മീറ്റര്‍ വീതിയില്‍ 23 കിലോ മീറ്റര്‍ നീളത്തിലാണു റോഡ് നിര്‍മിക്കുന്നത്.  റോഡിന്റെ വീതി കൂട്ടുന്നതിനായി പുറമ്പോക്ക് അളന്ന് തിട്ടപ്പെടുത്തേണ്ടതുണ്ട്. ഇതിനായി നിയോഗിച്ച സര്‍വേ ടീം അടൂരില്‍ നിന്ന് സര്‍വേ തുടങ്ങി. 

ജില്ലാഭരണകൂടം അക്ഷയ കേന്ദ്രങ്ങളുടെ സഹകരണത്തോടെ വീഡിയോ കോണ്‍ഫറന്‍സിലൂടെ  നടത്തിയ അടൂര്‍ താലൂക്ക്തല അദാലത്തില്‍ 15 പരാതികള്‍ പരിഹരിച്ചു. ആകെ 26 പരാതികളാണ് കളക്ടറേറ്റില്‍ നിന്നും ഓണ്‍ലൈനായി നടത്തിയ അദാലത്തില്‍ പരിഗണിച്ചത്. അടൂര്‍ താലൂക്കിലെ 12 അക്ഷയകേന്ദ്രങ്ങളിലൂടെ മുന്‍കൂട്ടി പരാതി രജിസ്ട്രര്‍ ചെയ്തവര്‍ ഹാജരായി പ്രശ്‌നങ്ങള്‍ക്ക് പരിഹാരം കണ്ടു.

മല്ലപ്പള്ളി - ആനിക്കാട് പഞ്ചായത്തുകളെ ബന്ധിപ്പിച്ച് മണിമലയാറിന് കുറുകെ നിര്‍മിച്ച കാവനാല്‍കടവ് പാലത്തിന്റെ ഉദ്ഘാടനം ഇന്ന് (ജൂലൈ 6)രാവിലെ 11.30ന് പൊതുമരാമത്ത് വകുപ്പ് മന്ത്രി ജി.സുധാകരന്‍ വീഡിയോ കോണ്‍ഫറന്‍സ് വഴി നിര്‍വഹിക്കും. മാത്യു.ടി തോമസ് എംഎല്‍എയുടെ അധ്യക്ഷതയില്‍ മുരണി യുപി സ്‌കൂള്‍ കെട്ടിടത്തില്‍ നടക്കുന്ന ചടങ്ങില്‍ ആന്റോ ആന്റണി എംപി മുഖ്യാതിഥിയാകും.
 

ദുരന്തനിവാരണവുമായി ബന്ധപ്പെട്ട് ഇന്‍സിഡന്റ് റെസ്‌പോണ്‍സ് സിസ്റ്റത്തിന്റെ (ഐ.ആര്‍.എസ്) ഭാഗമായി കോന്നി താലൂക്കിനു കീഴിലുള്ള ചിറ്റാറില്‍ ഇന്ന് (ജൂലൈ ആറിന് ) രാത്രി ഏഴിന് മോക്ക്ഡ്രില്‍ സംഘടിപ്പിക്കും.

കോന്നി സബ് റീജിയണല്‍ ട്രാന്‍സ്‌പോര്‍ട്ട് ഓഫീസ് ഉദ്ഘാടനത്തിനുള്ള ഒരുക്കങ്ങള്‍ പൂര്‍ത്തിയായതായി കെ.യു. ജനീഷ് കുമാര്‍ എംഎല്‍എ അറിയിച്ചു. അവസാനവട്ട ഒരുക്കങ്ങള്‍ പരിശോധിക്കാന്‍ എംഎല്‍എയും, പത്തനംതിട്ട ആര്‍ടിഒ ജിജി ജോര്‍ജും ഓഫീസ് സന്ദര്‍ശിച്ചു.