പുതിയ അദ്ധ്യയന വർഷത്തെ ജില്ലാതല സ്കൂൾ പ്രവേശനോത്സവത്തിന് മുന്നോടിയായി സംഘാടക സമിതി യോഗം ചേർന്നു. പെരിക്കല്ലൂർ ഹയർ സെക്കണ്ടറി സ്കൂളിൽ ചേർന്ന യോഗം ജില്ലാ പഞ്ചായത്ത് പ്രസിഡന്റ് ചന്ദ്രിക കൃഷ്ണൻ ഉദ്ഘാടനം ചെയ്തു. മുള്ളൻകൊല്ലി ഗ്രാമപഞ്ചായത്ത് പ്രസിഡന്റ് ലിസി സാബു അധ്യക്ഷയായ പരിപാടിയിൽ ജില്ലാ പഞ്ചായത്ത് ആരോഗ്യ വിദ്യാഭ്യാസ സ്റ്റാൻഡിങ് കമ്മിറ്റി ചെയർപേഴ്സൺ സൽമ മോയിൻ മുഖ്യപ്രഭാഷണം നടത്തി. ജില്ലാ വിദ്യാഭ്യാസ ഉപഡയറക്ടർ വി.എ ശശീന്ദ്രവ്യാസ്  പ്രവേശനോത്സവത്തിന്റെ ഒരുക്കങ്ങൾ വിശദീകരിച്ചു. 

കൽപറ്റ എൻ.എം.എസ്.എം ഗവ.കോളേജിൽ മാസ് കമ്മ്യൂണിക്കേഷൻ വിഭാഗത്തിൽ 2026-27 അധ്യയന വർഷത്തേക്ക് ഗസ്റ്റ് അധ്യാപക നിയമനം നടത്തുന്നു. കോളേജ് വിദ്യാഭ്യാസ ഉപഡയറക്ടറേറ്റിൽ രജിസ്റ്റർ ചെയ്തിട്ടുള്ള മാസ് കമ്മ്യൂണിക്കേഷൻ വിഷയത്തിൽ ബിരുദാനന്തര ബിരുദവും നെറ്റ്/ പി എച്ച് ഡി യോഗ്യതയുമുള്ള ഉദ്യോഗാർത്ഥികൾ ബയോഡാറ്റയും യോഗ്യതാ സർട്ടിഫിക്കറ്റുകളുടെ അസലും പകർപ്പുകളും സഹിതം മെയ് 29 ന് രാവിലെ 10.30-ന് ഓഫീസിൽ അഭിമുഖത്തിന് എത്തണം.

സുൽത്താൻ ബത്തേരി പട്ടികവർഗ വികസന ഓഫീസിന് കീഴിലുള്ള പ്രീമെട്രിക് ഹോസ്റ്റലുകളിലും നൂൽപ്പുഴ എം.ആർ.എസിലും കുക്ക് തസ്തികയിലേക്ക് ദിവസ വേതനാടിസ്ഥാനത്തിൽ നിയമനം നടത്തുന്നു. സുൽത്താൻ ബത്തേരി താലൂക്കിൽ സ്ഥിരതാമസക്കാരായ പട്ടികവർഗ വിഭാഗത്തിൽപ്പെട്ടവർക്കാണ് അവസരം. എസ്.എസ്.എൽ.സിയാണ് അടിസ്ഥാന യോഗ്യത. താത്പര്യമുള്ളവർ ജാതി, വിദ്യാഭ്യാസ യോഗ്യത, പ്രവൃത്തിപരിചയം എന്നിവ തെളിയിക്കുന്ന സർട്ടിഫിക്കറ്റുകളുടെ അസലും പകർപ്പും വെള്ളക്കടലാസിൽ തയ്യാറാക്കിയ അപേക്ഷയുമായി മെയ് 26 രാവിലെ 9.30ന് സുൽത്താൻ ബത്തേരി മിനി സിവിൽ സ്റ്റേഷനിലുള്ള പട്ടികവർഗ വികസന ഓഫീസിൽ അഭിമുഖത്തിന് എത്തണം. ഫോൺ: 04936 221074.

പട്ടികവർഗ വികസന വകുപ്പിന് കീഴിൽ വിവിധ ഉന്നതികളിലെ കുടിവെള്ള വിതരണ പദ്ധതികളുടെ നിർവഹണത്തിനായി അംഗീകൃത ഏജൻസികളിൽ നിന്ന് താത്പര്യപത്രം ക്ഷണിച്ചു. പൂതാടി ഗ്രാമപഞ്ചായത്തിലെ വരച്ചാങ്കുന്ന് ഉന്നതി, കൂടൽക്കടവ് ഉന്നതി, അമ്പലവയൽ ഗ്രാമപഞ്ചായത്തിലെ അത്തിമറ്റം കരിങ്ങലൂട്ട് ഉന്നതി, സുൽത്താൻ ബത്തേരി നഗരസഭയിലെ ഓടമൂല ഉന്നതി എന്നിവിടങ്ങളിലെ കുടിവെള്ള പദ്ധതികൾക്കാണ് പി.എം.സി സേവനം ആവശ്യമുള്ളത്. താൽപര്യമുള്ള അംഗീകൃത ഏജൻസികൾ  ക്വട്ടേഷനുകൾ മേയ് 29 വൈകുന്നേരം മൂന്നിനകം സുൽത്താൻ ബത്തേരി ട്രൈബൽ ഡെവലപ്മെന്റ് ഓഫീസിൽ നൽകണം. ഫോൺ: 04936 221074.

നല്ലൂർനാട് അംബേദ്കർ മെമ്മോറിയൽ മോഡൽ റെസിഡൻഷ്യൽ ഗവ. ഹയർ സെക്കൻഡറി സ്കൂളിൽ അഞ്ചാം ക്ലാസിലെ ഏതാനും സീറ്റുകളിൽ പ്രവേശനത്തിന് അപേക്ഷ ക്ഷണിച്ചു. പട്ടിക വർഗ/പട്ടിക ജാതി വിഭാഗത്തിൽപ്പെട്ട ആൺകുട്ടികൾക്കാണ് അവസരം. അപേക്ഷകരുടെ കുടുംബ വാർഷിക വരുമാനം രണ്ട് ലക്ഷം രൂപ കവിയരുത്. താത്പര്യമുള്ള രക്ഷിതാക്കൾ കുട്ടികളോടൊപ്പം മെയ് 26 രാവിലെ 11ന്  സ്കൂളിൽ നടക്കുന്ന എഴുത്തുപരീക്ഷയ്ക്ക് എത്തണം. ഫോൺ: 04935 293868

കൽപറ്റ ബ്ലോക്ക് പട്ടികജാതി വികസന ഓഫീസിന് കീഴിൽ പ്രവർത്തിക്കുന്ന വൈത്തിരി പ്രീമെട്രിക് ഹോസ്റ്റലിൽ ഒഴിവുള്ള സീറ്റുകളിലേക്ക് അപേക്ഷിക്കാനുള്ള തീയ്യതി  മെയ് 30 വരെ ദീർഘിപ്പിച്ചു.  നിലവിൽ അഞ്ച് മുതൽ 10 വരെ ക്ലാസുകളിൽ പഠിക്കുന്ന പട്ടികജാതി വിഭാഗത്തിൽപ്പെട്ട ആൺകുട്ടികൾക്ക് അപേക്ഷിക്കാം. പട്ടികജാതി വിഭാഗത്തിൽപ്പെട്ടവരുടെ അഭാവത്തിൽ പട്ടികവർഗ വിഭാഗത്തിൽപ്പെട്ട വിദ്യാർത്ഥികളെ പരിഗണിക്കും. തെരഞ്ഞടുക്കപ്പെടുന്നവർക്ക് സൗജന്യ താമസം, ഭക്ഷണം, പോക്കറ്റ് മണി എന്നിവ ലഭിക്കും.

മാനന്തവാടി ട്രൈബൽ ഡവലപ്മെന്റ് ഓഫീസിന്റെ നിയന്ത്രണത്തിൽ പ്രവർത്തിക്കുന്ന എട്ട് പ്രീ സ്കൂളുകളിലേക്ക് ദിവസ വേതനാടിസ്ഥാനത്തിൽ നഴ്സറി സ്കൂൾ ടീച്ചർ, ആയ നിയമനം നടത്തുന്നു. മാനന്തവാടി താലൂക്കിൽ സ്ഥിരതാമസക്കാരായ പട്ടികവർഗ്ഗ വിഭാഗത്തിൽപെട്ട യുവതീയുവാക്കൾക്കാണ് അവസരം. പി.പി.ടി.ടി.സിയും നഴ്സറി ടീച്ചേർസ് എഡ്യൂക്കേഷൻ കോഴ്സുമാണ് നഴ്സറി സ്കൂൾ ടീച്ചർ തസ്തികയിലേക്കുള്ള യോഗ്യത. ഉദ്യോഗാർത്ഥികൾ അപേക്ഷയുമായി മെയ് 29 രാവിലെ 10ന് മാനന്തവാടി ട്രൈബൽ ഡവലപ്മെന്റ് ഓഫീസിൽ നടക്കുന്ന വാക് ഇൻ ഇന്റർവ്യൂവിൽ പങ്കെടുക്കണം. ഫോൺ: 04935 -240210 

പനമരം സാമൂഹികാരോഗ്യ കേന്ദ്രത്തിലെ ഡയാലിസിസ് യൂണിറ്റിലേക്ക് താത്കാലികാടിസ്ഥാനത്തിൽ ഡയാലിസിസ് ടെക്‌നിഷ്യൻ നിയമനം നടത്തുന്നു. ഡയാലിസിസ് ടെക്‌നിഷ്യൻ ഡിപ്ലോമയും പാരാമെഡിക്കൽ കൗൺസിലിൽ രജിസ്ട്രേഷനുമാണ് യോഗ്യത. ഉദ്യോഗാർത്ഥികൾ യോഗ്യത സർട്ടിഫിക്കറ്റ്, പ്രവർത്തിപരിചയ സാക്ഷ്യപത്രം എന്നിവ സഹിതം മെയ് 26  രാവിലെ 10.30ന് പനമരം സാമൂഹികാരോഗ്യ കേന്ദ്രത്തിൽ നടക്കുന്ന അഭിമുഖത്തിൽ പങ്കെടുക്കണം. ഫോൺ: 04935 221189  

ഡബ്ല്യു.എം.ഒ.ഐ.ജി ആർട്സ് ആന്റ് സയൻസ് കോളേജിലെ സൈക്കോളജി, ഫുഡ് ടെക്നോളജി, കമ്പ്യൂട്ടർ സയൻസ്, ഹിന്ദി, മാത്തമാറ്റിക്സ്, ഇംഗ്ലീഷ് വകുപ്പുകളിൽ അസിസ്റ്റന്റ് പ്രൊഫസർ തസ്തികകളിലേക്ക് മെയ് 26 രാവിലെ 11.30ന് കോളേജിൽ വെച്ച് അഭിമുഖം നടത്തുന്നു. യു.ജി.സി. മാനദണ്ഡപ്രകാരം നെറ്റ്/പി.എച്ച്.ഡി യോഗ്യതയുള്ളവർക്ക് പങ്കെടുക്കാം. അഭിമുഖത്തിന് മുമ്പ് gascoffice@gmail.com എന്ന  മെയിലിലേക്ക് സി.വി അയക്കണം. ഫോൺ: 9188663304.