അപ്ഗ്രേഡേഷൻ ഒന്നാം ഘട്ട നിർമ്മാണോദ്ഘാടനം മന്ത്രി സജി ചെറിയാൻ നിർവഹിച്ചു

മത്സ്യത്തൊഴിലാളികളുടെ മക്കൾക്ക് മികച്ച വിദ്യാഭ്യാസം സൗജന്യമായി നൽകുന്നതിനായി നിർമ്മിച്ച ചാവക്കാട് പുത്തൻകടപ്പുറത്തെ ഗവൺമെന്റ് റീജിയണൽ ഫിഷറീസ് ടെക്നിക്കൽ ഹൈസ്‌കൂൾ ഇനി ഹൈടെക്ക് ആകും. 2.6 കോടി രൂപ വകയിരുത്തി നിർമ്മിക്കുന്ന സ്‌കൂളിന്റെ അപ്ഗ്രേഡേഷൻ ഒന്നാം ഘട്ടത്തിന്റെ നിർമ്മാണോദ്ഘാടനം മത്സ്യബന്ധനം, സാംസ്‌കാരികം, യുവജനകാര്യ വകുപ്പ് മന്ത്രി സജി ചെറിയാൻ നിർവഹിച്ചു. ജി.ആർ.എഫ്.ടി.എച്ച്.എസിൽ നടന്ന ചടങ്ങിൽ എൻ.കെ. അക്ബർ എം.എൽ.എ അദ്ധ്യക്ഷത വഹിച്ചു.

ജലസേചന വിഭാഗം വാഴാനി ഇറിഗേഷന്‍ സെക്ഷന്റെ പരിധിയിലുള്ള വാഴാനി കണ്‍വെന്‍ഷന്‍ സെന്റര്‍ നിര്‍മ്മിക്കുന്ന സ്ഥലത്തെ 64 മരങ്ങള്‍ ജലസേചന വകുപ്പിന്റെ നിലവിലുള്ള വ്യവസ്ഥകള്‍ക്ക് വിധേയമായി മാര്‍ച്ച് 18 ന് രാവിലെ 11 ന് വടക്കാഞ്ചേരി ഇറിഗേഷന്‍ സബ് ഡിവിഷന്‍ തലപ്പിള്ളി കാര്യാലയത്തില്‍ പരസ്യമായി ലേലം ചെയ്യും. നിരതദ്രവ്യം 19,200 രൂപ. താത്പര്യമുള്ളവര്‍ തലപ്പിള്ളി ഇറിഗേഷന്‍ സബ് ഡിവിഷന്‍ അസിസ്റ്റന്റ് എക്‌സിക്യൂട്ടീവ് എഞ്ചിനീയറുടെ കാര്യാലയവുമായി ബന്ധപ്പെടുക.

ജില്ലയില്‍ വയോജനങ്ങളെ വീടുകളില്‍ പരിചരിക്കുന്ന ബന്ധുക്കളായ 10 കെയര്‍ഗീവര്‍മാര്‍ക്ക് ജെറിയാട്രിക് പരിശീലനം നല്‍കുന്നതിലേയ്ക്ക് അപേക്ഷ ക്ഷണിച്ചു.  അപേക്ഷകള്‍ വെള്ളപേപ്പറില്‍ തയ്യാറാക്കി  ജില്ലാ സാമൂഹ്യനീതി  ഓഫീസ്, മിനി സിവില്‍ സ്റ്റേഷന്‍, തൊടുപുഴ പി ഒ, ഇടുക്കി-685584 എന്ന വിലാസത്തിലോ dsjoidukki@gmail.com എന്ന ഇമെയില്‍ ഐഡിയിലേക്കോ മാര്‍ച്ച് 16 ന് വൈകിട്ട് 5 മണിക്ക് മുന്‍പായി സമര്‍പ്പിക്കണം. കൂടുതല്‍ വിവരങ്ങള്‍ക്ക് തൊടുപുഴ മിനി സിവില്‍ സ്റ്റേഷനില്‍ പ്രവര്‍ത്തിക്കുന്ന ഇടുക്കി ജില്ല സാമൂഹ്യനീതി ഓഫീസില്‍ ബന്ധപ്പെടണം. ഫോണ്‍: 04862 228160, 9496456464

കെല്‍ട്രോണിന്റെ എറണാകുളം കലൂര്‍ നോളജ് സെന്ററില്‍ ആര്‍ട്ടിഫിഷ്യല്‍ ഇന്റലിജന്‍സ്, ഓഗ്മെന്റഡ് റിയാലിറ്റി, വെര്‍ച്വല്‍ റിയാലിറ്റി, മിക്സഡ് റിയാലിറ്റി എന്നീ മേഖലകളിലെ കോഴ്സുകളിലേക്ക് അപേക്ഷ ക്ഷണിച്ചു. ഡിപ്ലോമ, പോസ്റ്റ് ഡിപ്ലോമ, പോസ്റ്റ് ഗ്രാജുവേറ്റ് ഡിപ്ലോമ എന്നീ കോഴ്‌സുകളിലേക്കാണ് അഡ്മിഷന്‍ ആരംഭിച്ചിരിക്കുന്നത്. കൂടുതല്‍ വിവരങ്ങള്‍ക്ക് കെല്‍ട്രോണ്‍ നോളജ് സെന്റര്‍, എം.ഇ.എസ് കള്‍ച്ചറല്‍ കോംപ്ലക്സ്, കലൂര്‍ എന്ന വിലാസത്തില്‍ ബന്ധപ്പെടുക. ഫോണ്‍: 8075246674, 0484 2971400.
 

ഇടുക്കി ജില്ലാ നിര്‍മ്മിതി കേന്ദ്രം മുഖേന കാഞ്ചിയാര്‍ ഗ്രാമപഞ്ചായത്തിലെ കോടാലിപ്പാറ ഉന്നതിയില്‍ നടപ്പിലാക്കുന്ന വിവിധ വികസന പ്രവര്‍ത്തികളുടെ ഉദ്ഘാടനം ഇന്ന് (12) 11 മണിക്ക് ഉന്നതി കമ്മ്യൂണിറ്റി ഹാളില്‍ ജലവിഭവ വകുപ്പ് മന്ത്രി റോഷി അഗസ്റ്റിന്‍ നിര്‍വഹിക്കും.

പട്ടികവര്‍ഗ വികസന വകുപ്പിന്റെ കോര്‍പ്പസ് ഫണ്ട് ഉപയോഗിച്ച് കാഞ്ചിയാര്‍ ഗ്രാമപഞ്ചായത്ത് മുഖേന അഞ്ചുരുളി ഉന്നതിയില്‍ നിര്‍മ്മിക്കുന്ന അഞ്ചുരുളി-കക്കാട്ടുകട റോഡിന്റെ നിര്‍മ്മാണ ഉദ്ഘാടനം ഇന്ന് (12) 12 മണിക്ക് ജലവിഭവ വകുപ്പ് മന്ത്രി റോഷി അഗസ്റ്റിന്‍ നിര്‍വഹിക്കും. കോവില്‍മല രാജാവ് രാമന്‍ രാജമന്നാന്‍ മുഖ്യാതിഥിയാകും.

റോഡ് വികസനത്തിന് 1.47 കോടി രൂപയുടെ  ഭരണാനുമതി ലഭ്യമായിട്ടുള്ള പദ്ധതിയില്‍ വനം വകുപ്പിന്റെ എന്‍ ഒ സി ലഭ്യമായിട്ടുള്ള 2.140 കിലോമീറ്ററില്‍ 3 മീറ്റര്‍ വീതിയില്‍ കോണ്‍ക്രീറ്റ് പ്രവര്‍ത്തികള്‍ നടപ്പാക്കുന്നതിനായിട്ടുള്ള ടെണ്ടര്‍ നടപടികളും പൂര്‍ത്തീകരിച്ചതാണ്.

ഫിഷറീസ് വകുപ്പിന്റെ ആഭിമുഖ്യത്തില്‍ നിര്‍മ്മിച്ച ചെങ്കുളം മള്‍ട്ടി സ്പീഷ്യസ് മത്സ്യവിത്ത് ഫാമിന്റെ ഉദ്ഘാടനം ചെങ്കുളം ഡാം സൈറ്റില്‍ ഇന്ന് (12) 3.30 ന്  ഫിഷറീസ്- സാംസ്‌കാരിക- യുവജനകാര്യ വകുപ്പ് മന്ത്രി സജി ചെറിയാന്‍ നിര്‍വഹിക്കും. വെള്ളത്തൂവല്‍ പഞ്ചായത്തില്‍ ചെങ്കുളം ഡാം സൈറ്റില്‍ 1.62 ഹെക്ടര്‍ ഭൂമിയില്‍ 654.95 ലക്ഷം രൂപ വിനിയോഗിച്ചാണ് പദ്ധതി നടപ്പാക്കിയിരിക്കുന്നത്.

പണിക്കൻകുടി: കൊന്നത്തടി - വാത്തിക്കുടി പഞ്ചായത്തുകളെ തമ്മിൽ ബന്ധിപ്പിക്കുന്ന പണിക്കൻകുടി-കുരിശിങ്കൽ, അഞ്ചുമുക്ക് - ചെമ്പകപ്പാറ റോഡിന്റെ ടാറിംഗ് ജോലികളുടെ ഉദ്ഘാടനം ജലവിഭവ വകുപ്പ് മന്ത്രി റോഷി അഗസ്റ്റിൻ നിർവ്വഹിച്ചു. പണിക്കൻകുടി സ്കൂൾ ജംഗ്ഷനിൽ നടന്ന ചടങ്ങിൽ നൂറുകണക്കിന് ആളുകൾ പങ്കെടുത്തു.

നിയമസഭാ ഇലക്ഷന്റെ ഭാഗമായി ഇന്ന് ( മാര്‍ച്ച് 12) ജില്ലയിലെ സ്‌ക്വാഡുകളില്‍ ഉള്‍പ്പെട്ട അംഗങ്ങള്‍ക്ക് പാലക്കാട് ജില്ലാ പഞ്ചായത്ത് ഹാളില്‍ പരിശീലനം നല്‍കും. ഫ്‌ളയിങ് സ്‌ക്വാഡ് ടീമംഗങ്ങള്‍ക്ക് രാവിലെ 10.30 നും, സ്റ്റാറ്റിക് സര്‍വയലന്‍സ് ടീം അംഗങ്ങള്‍ക്ക്  ഉച്ചയ്ക്ക് രണ്ടിനും, സ്റ്റാറ്റിക് ചെക്ക്‌പോസ്റ്റ് ടീം അംഗങ്ങള്‍ക്ക് വൈകീട്ട് 3.30 നുമാണ് പരിശീലനം. ടീമുകളിലേക്ക് നിയോഗിച്ച എല്ലാ ജീവനക്കാരും പരിശീലനക്ലാസില്‍ നിര്‍ബന്ധമായും പങ്കെടുക്കണമെന്ന് ചെലവ് നിരീക്ഷണ നോഡല്‍ ഓഫീസര്‍ ആയ ജില്ലാ ഫിനാന്‍സ് ഓഫീസര്‍ അറിയിച്ചു.