ജില്ലയില്‍ തീര്‍ഥാടന കാലത്ത് ബാലവേല, ബാലഭിക്ഷാടനം, ബാലചൂഷണം എന്നിവ തടയുന്നതിനായി സാമൂഹ്യനീതി വകുപ്പ്- ജില്ലാ ചൈല്‍ഡ് പ്രൊട്ടക്ഷന്‍ യൂണിറ്റിന്‍റെ ആഭിമുഖ്യത്തില്‍ ജില്ലാഭരണകൂടത്തിന്‍റെ സഹകരണത്തോടെ നടപ്പിലാക്കുന്ന ഓപ്പറേഷന്‍ ശരണബാല്യം പദ്ധതിയുടെ ഉദ്ഘാടനം  ഇന്ന് (16ന്)  വൈകിട്ട് 4ന്  ആരോഗ്യ- സാമൂഹ്യനീതി വകുപ്പ് മന്ത്രി ശ്രീമതി കെ.കെ. ശൈലജ ടീച്ചര്‍ പമ്പയില്‍ നിര്‍വഹിക്കും. രാജു എബ്രഹാം എംഎല്‍എ  അദ്ധ്യക്ഷത വഹിക്കുന്ന ചടങ്ങില്‍ ജില്ലാ പൊലീസ് മേധാവി ഡോ.സതീഷ് ബിനോ,  എ.ഡി.എം. അനു എസ്. നായര്‍ തുടങ്ങിയവര്‍ പങ്കെടുക്കും. 

    ഭിന്നശേഷിദിനം വിപുലമായി ആചരിക്കുന്നതിന് അഡീഷണല്‍ ജില്ലാ മജിസ്ട്രേറ്റ് അനു എസ്.നായരുടെ അധ്യക്ഷതയില്‍ കളക്ടറേറ്റില്‍ ചേര്‍ന്ന ആലോചനായോഗത്തില്‍ തീരുമാനമായി. ദിനാചരണ പരിപാടികള്‍ ഡിസംബര്‍ അഞ്ചിന് പത്തനംതിട്ട സെന്‍റ് സ്റ്റീഫന്‍സ് ഓഡിറ്റോറിയത്തില്‍ നടക്കും. ജില്ലയിലെ വിവിധ സ്പെഷ്യല്‍ സ്കൂളുകളില്‍ നിന്നുള്ള വിദ്യാര്‍ഥികളുടെ കലാകായിക പരിപാടികള്‍ നടക്കും. ദേശീയ തലത്തില്‍ സമ്മാനം നേടിയ സ്ഷ്യെല്‍ സ്കൂളുകളിലെ ഭിന്നശേഷിക്കാരായ കുട്ടികളെ ആദരിക്കും. പരിപാടികള്‍ ആസൂത്രണം ചെയ്യുന്നതിന് വിവിധ ഉപസമിതികളെയും തെരഞ്ഞെടുത്തു.

വള്ളിക്കോട് ഗ്രാമപഞ്ചായത്തിന്‍റേയും ജില്ലാ ലീഗല്‍ സര്‍വീസ് അതോറിറ്റിയുടെയും ആഭിമുഖ്യത്തില്‍ ഈ മാസം 18ന് ഉച്ചയ്ക്ക് ശേഷം മൂന്നിന് ഗ്രാമപഞ്ചായത്ത് ഓഡിറ്റോറിയത്തില്‍ നിയമബോധവത്ക്കരണ ക്ലാസ് നടക്കുമെന്ന് പഞ്ചായത്ത് സെക്രട്ടറി അറിയിച്ചു. 

(പിഎന്‍പി 3058/17)

    ശബരിമല തീര്‍ഥാടനകാലത്ത് പമ്പയും അനുബന്ധ സ്ഥലങ്ങളും മാലിന്യമുക്തമായി സൂക്ഷിക്കുന്നതിന് ഹയര്‍ സെക്കന്‍ഡറി വിദ്യാര്‍ഥികളുടെ ആഭിമുഖ്യത്തിലു ള്ള ബോധവത്ക്ക ര ണ പരിപാടികള്‍ ഇന്ന് (16) തുടങ്ങും.  ജില്ലയിലെ സൗഹൃദ ക്ലബ്ബിന്‍റെ നേതൃത്വത്തില്‍ ഹയര്‍ സെക്കന്‍ഡറി തലത്തിലുള്ള 50 കുട്ടികള്‍ വീതം തീര്‍ഥാടന കാലത്ത് എല്ലാദിവസവും പമ്പയിലും അനുബന്ധ സ്ഥലങ്ങളിലും എത്തി ശബരിമലയില്‍ പ്ലാസ്റ്റിക്കിന്‍റെ ഉപയോഗത്തിനെതിരെയും പമ്പയില്‍ വസ്ത്രങ്ങള്‍ ഉപേക്ഷിക്കുന്നതിനെതിരെയും തീര്‍ഥാടകരെ ബോധവത്ക്കരിക്കും. 

ലൈഫ് പദ്ധതിയുടെ ഗുണഭോക്തൃലിസ്റ്റ് അംഗീകരിക്കുന്നതിനുള്ള ചെന്നീര്‍ക്കര ഗ്രാമപഞ്ചായത്തിലെ ഗ്രാമസഭകള്‍ ഈ മാസം 16 മുതല്‍ 19 വരെ നടക്കും.

തീര്‍ഥാടകരുടെ സൗകര്യങ്ങള്‍ക്ക് മുന്‍തൂക്കം നല്‍കുന്ന തരത്തില്‍ പെട്രോള്‍ പമ്പുകളുടെ പ്രവര്‍ത്തനം ക്രമീകരിക്കണമെന്ന് ജില്ലാ കലക്ടര്‍ ആര്‍ ഗിരിജ പറഞ്ഞു. കളക്ടറേറ്റ് കോണ്‍ഫറന്‍സ് ഹാളില്‍ ചേര്‍ന്ന ശബരിമല പാതയിലെ പെട്രോള്‍ പമ്പുടമകളുടെ  യോഗത്തില്‍ സംസാരിക്കുകയായിരുന്നു കളക്ടര്‍. തീര്‍ഥാടനം പ്രമാണിച്ച് എല്ലാ പമ്പുകളിലും ആവശ്യത്തിന് കുടിവെള്ളം, വൃത്തിയും വെടിപ്പുമുള്ള ശൗചാലയങ്ങള്‍ എന്നിവ ഉണ്ടെന്ന് എല്ലാ പമ്പുടമകളും  ഉറപ്പുവരുത്തണം. തീര്‍ഥാടകര്‍ വഴി ചോദിക്കാന്‍ ഏറെ ആശ്രയിക്കുന്ന പെട്രോള്‍ പമ്പുകളില്‍ ജീവനക്കാര്‍ക്ക് ഇതിനുള്ള പരിശീലനം നല്‍കണമെന്നും കലക്ടര്‍ പറഞ്ഞു.

റാന്നി താലൂക്ക് ആശുപത്രിയുടെ പുതിയ കെട്ടിടത്തിന്‍റെ ഉദ്ഘാടനം ഇന്ന് (16ന്) ഉച്ചയ്ക്ക് ശേഷം മൂന്നിന് ആരോഗ്യ വകുപ്പ് മന്ത്രി കെ.കെ.ഷൈലജ ടീച്ചര്‍ നിര്‍വഹിക്കും. രാജു എബ്രഹാം എംഎല്‍എ അധ്യക്ഷത വഹിക്കുന്ന ചടങ്ങില്‍ ആന്‍റോ ആന്‍റണി എംപി മുഖ്യപ്രഭാഷണം നടത്തും.

ശബരിമല തീര്‍ഥാടകര്‍ക്ക് മെച്ചപ്പെട്ട ആരോഗ്യ ചികിത്സാ സേവനങ്ങള്‍ ലഭ്യമാക്കുന്നതിന് സന്നിധാനത്ത് ദേശീയ ആരോഗ്യ ദൗത്യം ഫണ്ടില്‍ നിന്നും തുക ചെലവഴിച്ച് നിര്‍മിച്ചിട്ടുള്ള ആശുപത്രി കെട്ടിടത്തിന്‍റെ പ്രവര്‍ത്തനോദ്ഘാടനം ഇന്ന് (16ന്) രാവിലെ 10ന് ആരോഗ്യ സാമൂഹ്യനീതി വകുപ്പ് മന്ത്രി കെ.കെ.ഷൈലജ ടീച്ചര്‍ സന്നിധാനത്ത് നിര്‍വഹിക്കും.

ദേവസ്വം വകുപ്പ് മന്ത്രി കടകംപള്ളി സുരേന്ദ്രന്‍ അധ്യക്ഷത വഹിക്കുന്ന ചടങ്ങില്‍ രാജുഎബ്രഹാം എംഎല്‍എ സ്വാഗതം ആശംസിക്കും . ദേശീയ ആരോഗ്യ ദൗത്യം സ്റ്റേറ്റ് മിഷന്‍ ഡയറക്ടര്‍ കേശവേന്ദ്രകുമാര്‍ റിപ്പോര്‍ട്ട് അവതരിപ്പിക്കും. ആന്‍റോ ആന്‍റണി എംപി മുഖ്യപ്രഭാഷണം നടത്തും. 

ജില്ലയിലെ തദ്ദേശ സ്വയംഭരണ സ്ഥാപനങ്ങളുടെ 2017-18 വാര്‍ഷിക പദ്ധതി പുരോഗതി വിലയിരുത്തുന്നതിനുള്ള യോഗം തദ്ദേശ സ്വയംഭരണ വകുപ്പ് മന്ത്രി ഡോ.കെ.റ്റി.   ജലീലിന്‍റെ നേതൃത്വത്തില്‍ 24ന് രാവിലെ 10ന് പത്തനംതിട്ട കിഴക്കേടത്ത് മറിയം ഓഡിറ്റോറിയത്തില്‍ നടക്കും.                                      

(പിഎന്‍പി 3053/17)

കാക്കനാട്: നഗര-ഗ്രാമാസൂത്രണ വകുപ്പിന്റെ എറണാകുളം മേഖല നഗരാസൂത്രണ കാര്യാലയത്തില്‍ ചീഫ് ടൗണ്‍ പ്ലാനറുടെ നേതൃത്വത്തില്‍ ഡിസംബര്‍ 13 ന് രാവിലെ 10 മുതല്‍ വൈകിട്ട് നാലുവരെ ഫയല്‍ അദാലത്ത് നടക്കും.