പീച്ചി ആക്ഷൻ പ്ലാൻ 2020- 21 പദ്ധതിയിലുൾപ്പെടുത്തി പീച്ചി ഹാച്ചറിയുടെ പദ്ധതി പ്രവർത്തനങ്ങൾക്കായി ഫീഡ്, അഡിറ്റീവ്സ്, ലൈവ് ഫീഡ് എന്നിവ വിതരണം ചെയ്യുന്നതിന് അംഗീകൃത സ്ഥാപനങ്ങൾ ഏജൻസികൾ ഡീലർമാർ എന്നിവരിൽ നിന്നും ടെൻഡർ ക്ഷണിച്ചു. ടെണ്ടർ സ്വീകരിക്കുന്ന അവസാന തീയതി ജൂലൈ 29 ഉച്ച രണ്ട് മണി. കൂടുതൽ വിവരങ്ങൾക്ക് തൃശൂർ ഫിഷറീസ് ഡെപ്യൂട്ടി ഡയറക്ടറുടെ കാര്യാലയവുമായി ബന്ധപ്പെടാം. നമ്പർ: 0487-2441132. ഇ-മെയിൽ: ddftsr@gmail.com

തൃശൂർ താലൂക്കിന്റെ ഇ-പരാതി പരിഹാര അദാലത്ത് ജൂലൈ 18ന് നടക്കുമെന്ന് ജില്ലാ കളക്ടർ എസ്. ഷാനവാസ് അറിയിച്ചു. കോവിഡ് 19 പശ്ചാത്തലത്തിൽ വീഡിയോ കോൺഫറൻസിംഗ് മുഖേന ഉച്ച രണ്ടിന് അദാലത്ത് നടത്തും. പരാതിക്കാർ അക്ഷയ കേന്ദ്രം വഴി അദാലത്തിൽ പങ്കെടുക്കണം. അപേക്ഷകൾ ജൂലൈ ഒമ്പത് മുതൽ 13 വരെ പൊതുജനങ്ങൾക്ക് നേരിട്ട് അക്ഷയകേന്ദ്രം വഴി സമർപ്പിക്കാം.
മുഖ്യമന്ത്രിയുടെ ദുരിതാശ്വാസനിധി, എൽ.ആർ.എം കേസ്, റേഷൻ കാർഡ് സംബന്ധിച്ച പരാതികൾ, നിയമപരമായി ലഭിക്കേണ്ട പരിഹാരം, 2018, 2019 പ്രളയുമായി ബന്ധപ്പെട്ട പരാതികൾ, കോടതിയുടെ പരിഗണന്നയിലിരിക്കുന്ന വിഷയങ്ങൾ എന്നിവ അദാലത്തിൽ സ്വീകരിക്കില്ലെന്ന് കളക്ടർ അറിയിച്ചു.

കോവിഡ് 19 രോഗവ്യാപന സാധ്യത കുറഞ്ഞതിനെ തുടർന്ന് ചാലക്കുടി നഗരസഭയിലെ എല്ലാ ഡിവിഷനുകളേയും ശ്രീനാരായണപുരം ഗ്രാമപഞ്ചായത്തിലെ ഏഴ്, എട്ട് വാർഡുകളേയും കണ്ടെയ്ൻമെൻറ് സോൺ നിയന്ത്രണത്തിൽനിന്ന് ഒഴിവാക്കി ജില്ലാ കളക്ടർ ഉത്തരവിട്ടു. അതേസമയം, കുന്നംകുളം നഗരസഭയിലെ ഏഴ്, 10, 11, 15, 17, 19, 25, 26 എന്നീ എട്ട് ഡിവിഷനുകളിലും തൃശൂർ കോർപറേഷനിലെ 35, 49, 51 ഡിവിഷനുകളിലും ശ്രീനാരായണപുരം ഗ്രാമപഞ്ചായത്തിലെ 11, 12 വാർഡുകളിലും കണ്ടെയ്ൻമെൻറ് സോൺ നിയന്ത്രണം തുടരും.

ചാലക്കുടി സോഷ്യൽ ഫോറസ്ട്രി റേഞ്ചിൽ നക്ഷത്രവനത്തിൽപ്പെട്ട 27 ഇനം വൃക്ഷതൈകൾ അടങ്ങിയ 50 സെറ്റ് തൈകൾ വിൽപ്പനക്ക് തയ്യാറായി. ചാലക്കുടി റേഞ്ചിന് കീഴിൽ മൂഞ്ഞേലി നേഴ്സറിയിലാണ് ഒരു വർഷം പ്രായമായ തൈകൾ സജ്ജമാക്കിയിട്ടുള്ളത്. തൈ ഒന്നിന് 60 രൂപ നിരക്കിൽ ഒരു സെറ്റിന് 1620 രൂപക്ക് തൈകൾ ലഭിക്കും. ആവശ്യമുള്ളവർ തൃശൂർ സോഷ്യൽ ഫോറസ്ട്രി ഡിവിഷൻ ഓഫീസിലോ ചാലക്കുടി സോഷ്യൽ ഫോറസ്ട്രി റേഞ്ച് ഓഫീസിലോ ബന്ധപ്പെടുക. ഫോൺ : 0487 2320609, 85476037 81, 8547603777, 8547603776.

ഉറവിടം അറിയാത്ത കോവിഡ് ബാധ 2 പേർക്ക് സ്ഥിരീകരിച്ചതിനെ തുടർന്ന് കണ്ടെയ്ൻമെന്റ് സോണാക്കിയ കുന്നംകുളം നഗരസഭയിലെ 8 വാർഡുകളിൽ കടുത്ത നിയന്ത്രണം. രോഗവ്യാപന സാധ്യത തടയുന്നതിനായി ജനങ്ങൾക്ക് ജാഗ്രതാ നിർദ്ദേശം നൽകി. ഇതിന്റെ ഭാഗമായി ചില സോണുകളിൽ കൂട്ടം കൂടി നിന്നവരെ പോലീസ് പിരിച്ച് വിട്ടു. അവശ്യ സർവീസുകൾ പോലീസ് നിയന്ത്രണത്തിലാണ് നടന്നത്.

തൃശൂർ മുളങ്കുന്നത്തുകാവിലെ കിലയെ ഫസ്റ്റ് ലൈൻ ട്രീറ്റ്മെൻറ് സെൻററാക്കി (സി.എഫ്.എൽ.ടി.സി) ജില്ലാ ദുരന്തനിവാരണ അതോറിറ്റി ചെയർമാനായ ജില്ലാ കളക്ടർ ഉത്തരവിട്ടു. ഇവിടെ ആവശ്യമായ ക്രമീകരണങ്ങൾ ഏർപ്പെടുത്താൻ തൃശൂർ ഗവ. മെഡിക്കൽ കോളജ് പ്രിൻസിപ്പലിനെ ചുമതലപ്പെടുത്തി. പൂമല പി.എച്ച്.സിയിലെ ഡോ. എം.ആർ. ബാലകൃഷ്ണനെ സെൻററിന്റെ അഡ്മിനിസ്ട്രേറ്റീവ് ചാർജ് ഓഫീസറാക്കി. അവണൂർ പി.എച്ച്.സി മെഡിക്കൽ ഓഫീസർ ഡോ. മിഥുൻ റോഡ് ആയിരിക്കും സെൻററിന്റെ നോഡൽ ഓഫീസർ.
സെൻറിലെ മാലിന്യങ്ങൾ ഇമേജ് വഴി നിർമാർജനം ചെയ്യും. ആവശ്യമായ ആംബുലൻസ് സൗകര്യം സി.എഫ്.എൽ.ടി.സിയിൽ ഏർപ്പെടുത്താനും നിർദേശം നൽകി.