'ഇനി വരുന്നൊരു തലമുറയ്ക്കായി' ന്യൂട്രിഷൻ & പേരന്റിങ് ക്ലിനിക്കുകൾ

 എറണാകുളം :  കുട്ടികളിലെ ആരോഗ്യ പോഷണ പ്രശ്നങ്ങൾ പരിഹരിക്കുന്നതിനായി  ഐ സി ഡി എസ് പ്രോജക്ട് തലത്തിൽ  ന്യൂട്രിഷൻ & പേരന്റിങ് ക്ലിനിക്കുകൾ ആരംഭിച്ചു . നവജാതശിശുക്കൾ  മുതൽ 6 വയസ് വരെയുള്ള കുട്ടികൾ , ഗർഭിണികൾ , പാലൂട്ടുന്ന അമ്മമാർ , കൗമാര പ്രായത്തിലുള്ള പെൺകുട്ടികൾ  എന്നിവരിലെ പോഷണ പ്രശ്നങ്ങൾ നിർണയിച്ചു കൊണ്ട്  പോഷണ ന്യൂനതകൾ  പരിഹരിക്കുന്നതിന് ആവശ്യമായ ഭക്ഷണ ക്രമം നിശ്ചയിച്ചു നൽകുന്നതിന് വിദഗ്ധരായ ന്യൂട്രിഷണിസ്റ്റുകളുടെ സേവനം ഓരോ ഐ സി ഡി എസ്  പ്രോജക്ടുകളിലും ആഴ്ചയിൽ 2 ദിവസം വീതം ലഭ്യമാണ് . കൂടാതെ പോഷണ വൈകല്യങ്ങൾ മറികടക്കുന്നതിന്  ഗുണഭോക്താക്കളെ പ്രാപ്തരാക്കുന്നതിന് ന്യൂട്രിഷൻ കൗൺസലിങ്ങ്  സേവനവും ആരംഭിച്ചിട്ടുണ്ട്.

എറണാകുളം ജില്ലയിൽ 6 ശിശുവികസന പദ്ധതി ഓഫീസർമാരുടെയും   15 ഐ സി ഡി എസ്  സൂപ്പർവൈസർമാരുടെയും  സേവനം ഇതിനായി ഉപയോഗിക്കുന്നു. സമ്പുഷ്ട കേരളം പദ്ധതിയുടെ ഭാഗമായാണ് ഈ ക്ലിനിക്കുകൾ ആരംഭിച്ചിട്ടുള്ളത്. ജില്ലയിലെ ഓരോ ബ്ലോക്കിലും കോർപ്പറേഷനിലും ഒരു ന്യൂട്രിഷണിസ്റ്റിന്റെ സേവനം ഉണ്ടായിരിക്കും.

കുഞ്ഞുങ്ങളുടെ  ഭാരം , നീളം/ ഉയരം , കയ്യുടെ മുകൾ ഭാഗത്തിന്റെ മദ്ധ്യത്തിലെ ചുറ്റളവ് എന്നിവ അളന്ന് നിർണ്ണയിക്കുന്ന പോഷണ നിലവാരത്തിന്റെ അടിസ്‌ഥാനത്തിൽ തുടർ നടപടികൾ സ്വീകരിക്കുന്നതാണ്.  ഗർഭിണികളിൽ പൊതുവെ കാണപ്പെടുന്ന അനീമിയ പരിഹരിക്കുന്നതിനും മുലപ്പാൽ  ഉണ്ടാകുന്നതിനും ആവശ്യമായ ഭക്ഷണ ക്രമം നിർദ്ദേശിക്കുക ,  ഗുരുതരമായ പോഷണ പ്രശ്നങ്ങൾ ഉള്ളവർക്ക് റെഗുലർ ആയ കൺസൽട്ടേഷൻ നൽകുക എന്നതും ക്ലിനിക്കിൻറെ  ലക്ഷ്യങ്ങളിൽ  ഉൾപ്പെടുന്നു.