കോവിഡ് നിർണയ കേന്ദ്രത്തിന്റെ കാര്യക്ഷമത ഉറപ്പാക്കി കെ എൻ ഉണ്ണിക്കൃഷ്ണൻ എംഎൽഎ 

എറണാകുളം : വൈപ്പിൻ മണ്ഡലത്തിലെ കോവിഡ് പ്രതിരോധ പ്രവർത്തനങ്ങളുടെ ഭാഗമായി കെ എൻ ഉണ്ണിക്കൃഷ്ണൻ എംഎൽഎ എടവനക്കാട് ഗവൺമെന്റ് യു പി സ്‌കൂളിൽ സജ്ജമാക്കിയ രോഗനിർണയ കേന്ദ്രത്തിലെത്തി ക്രമീകരണങ്ങൾ വിലയിരുത്തി. ആർടി - പിസിആർ പരിശോധന സുഗമമായി നടക്കുന്നതിന് ആരോഗ്യവകുപ്പും മറ്റ് അധികൃതരും ഒരുക്കിയ സജ്ജീകരണങ്ങൾ ശ്‌ളാഘനീയമാണെന്ന് എംഎൽഎ പറഞ്ഞു. വൈകാതെ എടവനക്കാട് പഞ്ചായത്തിലെ എല്ലാവരുടെയും കോവിഡ് പരിശോധന പൂർത്തിയാകാനാകുമെന്നും എംഎൽഎ പറഞ്ഞു .

വൈപ്പിൻ മണ്ഡലത്തിലെ കോവിഡ് പ്രതിരോധ പ്രവർത്തനങ്ങൾ വേഗത്തിലും സുസജ്ജവുമാക്കാൻ  എംഎൽഎ മുൻകയ്യെടുത്ത് ആവിഷ്‌കരിച്ച സൗജന്യ മൊബൈൽ ആർടി - പിസിആർ ടെസ്റ്റ് ടീം എടവനക്കാട് വിവിധ ദിവസങ്ങളിലായി നിരവധിപേരെ പരിശോധനയ്ക്ക് വിധേയനാക്കിയിരുന്നു. എംഎൽഎയുടെ നേതൃത്വത്തിൽ  മുത്തൂറ്റ് ജോർജ് എം ഗ്രൂപ്പിന്റെ സഹകരണത്തോടെ സജ്ജമാക്കിയ  ഔട്ട്റീച്ച്  ടെസ്റ്റ്‌ സപ്പോർട്ട് മൊബൈൽ ടീമും മണ്ഡലത്തിൽ പരിശോധനാപര്യടനം തുടരുകയാണ്.