ലോട്ടറിയുടെ ലാഭം മുഴുവൻ സംസ്ഥാനത്തെ ആരോഗ്യമേഖലയ്ക്ക്-മന്ത്രി തോമസ് ഐസക്

സംസ്ഥാന ലോട്ടറിയുടെ വരുമാനം മുഴുവൻ സംസ്ഥാനത്തെ ആരോഗ്യ മേഖലയ്ക്കായി വിനിയോഗിക്കുമെന്ന്  ധനകാര്യവകുപ്പ് മന്ത്രി ഡോ. ടി എം തോമസ് ഐസക് പറഞ്ഞു. ഇപ്പോഴുള്ള 30,000 രൂപയുടെ ആരോഗ്യ ഇൻഷുറൻസ് രണ്ട് ലക്ഷം രൂപയാക്കി ഉയർത്തുന്ന കാര്യം പരിഗണിച്ചുവരുകയാണ്.  സംസ്ഥാന ഭാഗ്യക്കുറി ക്ഷേമനിധി ബോർഡിൻറെ ആഭിമുഖ്യത്തിൽ ഭിന്നശേഷിക്കാരായ ലോട്ടറി തൊഴിലാളികൾക്കുള്ള  മുച്ചക്ര സ്‌കൂട്ടർ വിതരണം സംസ്ഥാനതല ഉദ്ഘാടനം ആലപ്പുഴയിൽ നിർവ്വഹിച്ച് സംസാരിക്കുകയായിരുന്നു മന്ത്രി. 

 ലോട്ടറി മാഫിയയെ കേരളത്തിൽ  പ്രവർത്തിക്കാൻ അനുവദിക്കില്ലെന്ന് മന്ത്രി പറഞ്ഞു. സാൻഡിയാഗോ മാർട്ടിൻമാരോട്  'കേരളത്തിൽ വേണ്ട' എന്ന നിലപാടാണ് സംസ്ഥാന സർക്കാർ സ്വീകരിക്കുന്നത്. ജൂലൈ മുതൽ സംസ്ഥാന ലോട്ടറിയുടെ സമ്മാനഘടന പരിഷ്‌കരിക്കുകയാണ.് 5000 രൂപയുടെ സമ്മാനങ്ങൾ വർദ്ധിപ്പിക്കും. ലോട്ടറി വരുമാനം വർധിച്ചുകൊണ്ടിരിക്കുകയാണ്.  16-17 വർഷം 7 3 9 5 കോടി രൂപയുടെ വിറ്റുവരവ് നേടിയപ്പോൾ 17-18 ൽ 9 8 7 5 കോടി രൂപയായി. ഈ സാമ്പത്തിക വർഷം 12000 കോടി രൂപയാണ് ലോട്ടറിയിൽ നിന്ന് പ്രതീക്ഷിക്കുന്നത്. സംസ്ഥാന ലോട്ടറിയെ തകർക്കാൻ ശ്രമിക്കുന്നവരെ സർക്കാർ കൈകാര്യം ചെയ്യും.  വരുമാനത്തിൽ പകുതി സമ്മാനമായി സർക്കാർ നൽകുന്നുണ്ട്. ഈ സർക്കാർ വന്നതിനു ശേഷം 42 ശതമാനത്തിൽ നിന്ന് 52 ശതമാനത്തിലേക്ക്  സമ്മാനത്തുക വർധിപ്പിച്ചു.  സാന്റിയാഗോ മാർട്ടിൻ തനിക്കെതിരെ മാനഹാനി വരുത്തിയെന്ന് നോട്ടീസ് നൽകിയിട്ടുണ്ട്. അതിന് അന്യസംസ്ഥാന ലോട്ടറി മാഫിയകൾ നടത്തിവരുന്ന നിയമലംഘനങ്ങൾ വ്യക്തമാക്കിയുള്ള കൃത്യമായ മറുപടി നൽകാനാണ്  സംസ്ഥാന സർക്കാർ തീരുമാനിച്ചിട്ടുള്ളതെന്നും  മന്ത്രി പറഞ്ഞു. ഭാഗ്യക്കുറി ക്ഷേമനിധി ബോർഡിൻറെ ആഭിമുഖ്യത്തിൽ 178 പേർക്കാണ് സംസ്ഥാനത്തൊട്ടാകെ മുച്ചക്രവാഹനം നൽകുന്നത്. ആലപ്പുഴയിൽ 50 പേർക്കുള്ള മുച്ചക്ര വാഹന വിതരണം മന്ത്രി നിർവഹിച്ചു. ആലപ്പുഴ, പത്തനംതിട്ട, കോട്ടയം, എറണാകുളം ജില്ലയിൽ നിന്നുള്ളവരായിരുന്നു ഗുണഭോക്താക്കൾ. ലോട്ടറി തൊഴിലാളികൾക്ക് വാഹനത്തോടൊപ്പം ലോട്ടറി വയ്ക്കുന്നതിനുള്ള ബോർഡ,് ഹെൽമെറ്റ്, കുട എന്നിവയും നൽകി. കഴിഞ്ഞ സാമ്പത്തിക വർഷത്തിൽ ബോണസ് ഇനത്തിൽ മാത്രം ബോർഡ് 37 693 പേർക്ക് 5500 രൂപ വീതവും 2 0 4 7 പെൻഷൻകാർക്ക് 1500 രൂപ വീതവും ആകെ 21.0 3 8 കോടി രൂപയാണ് വിതരണം ചെയ്തതെന്ന് മന്ത്രി പറഞ്ഞു. കഴിഞ്ഞ നീറ്റ് പരീക്ഷയിൽ ദേശീയ തലത്തിൽ എസ്.സി.കാററഗറിയിൽ 77ാം റാങ്ക് നേടിയ ലോട്ടറി തൊഴിലാളിയുടെ മകളായ കെ.പി.മഞ്ജുഷയ്ക്ക് ബോർഡ് അനുവദിച്ച ഒരുലക്ഷം രൂപയുടെ പാരിതോഷികം ധനമന്ത്രി ചടങ്ങിൽ സമ്മാനിച്ചു. 

 പാതിരപ്പള്ളി എയിഞ്ചൽ ഓഡിറ്റോറിയത്തിൽ നടന്ന പരിപാടിയിൽ ഭാഗ്യക്കുറി ക്ഷേമനിധി ബോർഡ് ചെയർമാൻ പി. ആർ. ജയപ്രകാശ് അധ്യക്ഷത വഹിച്ചു.മാരാരിക്കുളം തെക്ക് പഞ്ചായത്ത് പ്രസിഡന്റ് ഇന്ദിര തിലകൻ, സംസ്ഥാന ഭാഗ്യക്കുറി വകുപ്പ് ഡയറക്ടർ എസ്.ഷാനവാസ്,  ആര്യാട് ബ്ലോക്ക് പഞ്ചായത്ത് വൈസ് പ്രസിഡന്റ് എൻ.പി.സ്‌നേഹജൻ, ജില്ലാ പഞ്ചായത്ത് അംഗം ജുമൈലത്ത്, വികലാംഗക്ഷേമ കോർപറേഷൻ മാനേജിങ് ഡയറക്ടർ കെ.മൊയ്തീൻ കുട്ടി, ക്ഷേമനിധി ബോർഡ് അംഗങ്ങളായ വി.എസ്.മണി, ഫിലിപ്പ് ജോസഫ്, സംസ്ഥാന ഭാഗ്യക്കുറി ക്ഷേമനിധി ഓഫീസർ എം.രാജ് കപൂർ,ദർശന അക്കാദമി ഡയറക്ടർ ഫാ.തോമസ് പുതുശ്ശേരി, സിസ്റ്റർ സ്മിത  വിവിധ സംഘടനാ പ്രതിനിധികൾ എന്നിവർ പ്രസംഗിച്ചു.

(പി.എൻ.എ. 1250/2018)

ഭാഗ്യക്കുറി കുടുംബത്തിൽനിന്ന് നീറ്റ് പരീക്ഷാവിജയം

ക്ഷേമനിധി ബോർഡിന്റെ ഒരു ലക്ഷം മജ്ഞുഷയ്ക്ക്

സാമ്പത്തിക പരാധീനതകൾക്ക് നടുവിൽ ഭാഗ്യക്കുറി കുടുംബത്തിൽനിന്ന് നീറ്റ് പരീക്ഷ എഴുതി എസ്. സി. കാറ്റഗറിയിൽ എഴുപത്തിയേഴാം റാങ്ക് കരസ്ഥമാക്കിയ മിടുക്കിക്ക് കൈത്താങ്ങായി സംസ്ഥാന സർക്കാരിൻറെ ഭാഗ്യക്കുറി ക്ഷേമനിധി ബോർഡ്. ആലപ്പുഴ തത്തംപള്ളി ജില്ലാകോടതി വാർഡിൽ തെക്കേ വെളിയിൽ കെ.പി. മഞ്ജുഷയ്ക്കാണ് ക്ഷേമനിധി ബോർഡ് ഒരു ലക്ഷം രൂപയുടെ ഉപഹാരം നൽകിയത്. ഭാഗ്യക്കുറി ക്ഷേമനിധി ബോർഡിൻറെ ആഭിമുഖ്യത്തിൽ ആലപ്പുഴയിൽ നടന്ന ഭിന്നശേഷിക്കാരായ ലോട്ടറി തൊഴിലാളികൾക്കുള്ള  മുച്ചക്ര സ്‌കൂട്ടർ വിതരണം സംസ്ഥാനതല ഉദ്ഘാടന വേദിയിൽ വച്ച് മഞ്ജുഷയ്ക്ക് ധനമന്ത്രി തോമസ് ഐസക്ക് സമ്മാനം കൈമാറി.

മഞ്ജുഷ യുടെ അച്ഛൻ പുരുഷോത്തമൻ ലോട്ടറി വിൽപനക്കാരൻ ആയിരുന്നു. ഏഴാം ക്ലാസ്സിൽ പഠിക്കുമ്പോൾ അച്ഛൻ മരിച്ചു.  തുടർന്ന് അമ്മ ചെല്ലമ്മ ലോട്ടറി വിൽപന നടത്തി വരുമാനം കണ്ടെത്തിയെങ്കിലും നാലുവർഷം മുമ്പ് അപകടത്തിൽപ്പെട്ട് തൊഴിൽചെയ്യാൻ വയ്യാതായി. സാമ്പത്തികമായി ഒന്നുമില്ലായ്മയിൽ നിന്ന്  പഠിച്ചാണ് മഞ്ജുഷ കഴിഞ്ഞ നീറ്റ് പരീക്ഷയിൽ ഉന്നത വിജയം കരസ്ഥമാക്കിയത്. ചെന്നിത്തല നവോദയ വിദ്യാലയത്തിലാണ് മഞ്ജുഷ പ്ലസ്ടു പഠിച്ചത്. പഠിക്കാൻ മിടുക്കിയായ മഞ്ജുഷയ്ക്ക് സഹപാഠികൾ സഹായിച്ച് നിർമ്മിച്ച സ്‌നേഹാലയം വീട്ടിലാണ് മഞ്ജുഷയുടെ താമസം. ചെന്നിത്തല നവോദയ വിദ്യാലയത്തിലെ  പി.ടി.എയുടെ അഭ്യർത്ഥനപ്രകാരം കോട്ടയം ആസ്ഥാനമായുള്ള ദർശന അക്കാദമിയാണ്  മഞ്ജുഷയുടെ ഒരു വർഷത്തെ പരീക്ഷാ പരിശീലനം ഏറ്റെടുത്ത് നൽകിയത്.  മഞ്ജു ഷയ്ക്ക് ജിപ്‌മെർ പരീക്ഷയിൽ  മുപ്പത്തിയെട്ടാം റാങ്കുണ്ട.് ആൾ ഇന്ത്യാ മെഡിക്കൽ ഇൻസ്റ്റിറ്റ്യൂട്ടിന്റെ പ്രവേശന പരീക്ഷയുടെ റാങ്ക് പ്രതീക്ഷിച്ചിരിക്കുകയാണ്  മഞ്ജുഷ ഇപ്പോൾ. ഡൽഹിയിലെ എയിംസിൽ  പഠിക്കണമെന്നാണ് ആഗ്രഹം. ദർശന അക്കാദമി ഡയറക്ടർ തോമസ് പുതുശേരി, സഹോദരി എന്നിവർക്കൊപ്പമാണ്  ധനസഹായം വാങ്ങുന്നതിനായി മഞ്ജുഷ വേദിയിലെത്തിയത്.

(പി.എൻ.എ. 1252/2018)