ഐ.ടി.ഐ അപേക്ഷ അക്ഷയയിലൂടെ നല്‍കാം     

ഈ വര്‍ഷത്തെ ഐ.ടി.ഐ പ്രവേശനത്തിനായി ഓണ്‍ലൈന്‍ അപേക്ഷ അക്ഷയ കേന്ദ്രം മുഖേന നല്‍കാം. ഇതു സംബന്ധിച്ച് ജില്ലയിലെ എല്ലാ അക്ഷയ കേന്ദ്രം സംരംഭകര്‍ക്കും വിദഗ്ധ പരിശീലനം നല്‍കി.  91 ഗവ. ഐ.ടി.ഐകളിലായി 76 ട്രേഡുകളില്‍ പ്രവേശനം നേടുന്നതിനാണ് അവസരം. കേന്ദ്രസര്‍ക്കാര്‍ അംഗീകാരമുളള എന്‍.സി.വി.ടി മെട്രിക്, എന്‍.സി.വി.ടി നോണ്‍ മെട്രിക്, സി.ഒ.ഇ സ്ട്രീമുകളിലും കേരള സര്‍ക്കാര്‍ അംഗീകാരമുളള എസ്.സി.വി.ടി നോണ്‍ മെട്രിക്, പ്ലസ്ടു യോഗ്യതാ ട്രേഡുകള്‍ എന്നീ സ്ട്രീമുകളിലും യോഗ്യത അനുസരിച്ച് പ്രവേശനത്തിനായി അപേക്ഷിക്കാം.
    ഓണ്‍ലൈനായി സമര്‍പ്പിച്ച അപേക്ഷയുടെ പ്രിന്റൗട്ട്, അനുബന്ധ സര്‍ട്ടിഫിക്കറ്റുകളുടെ (എസ്.എസ്.എല്‍.സി ബുക്ക്, അപേക്ഷിക്കുന്ന ട്രേഡുകള്‍ക്ക്  വേണ്ട അടിസ്ഥാന യോഗ്യത നേടിയ സര്‍ട്ടിഫിക്കറ്റ്, മാര്‍ക്ക് ലിസ്റ്റ്, ഗ്രേസ് മാര്‍ക്ക്് ലഭിക്കേണ്ട യോഗ്യത നേടിയ സര്‍ട്ടിഫിക്കറ്റ്, മറ്റ് മുന്‍ഗണന ലഭിക്കണമെങ്കില്‍ ഇതുമായി ബന്ധപ്പെട്ട സര്‍ട്ടിഫിക്കറ്റ് തുടങ്ങിയവ) സ്വയം സാക്ഷ്യപ്പെടുത്തിയ പകര്‍പ്പ്  സഹിതം സംസ്ഥാനത്തെ ഏതെങ്കിലും ഒരു ഗവ. ഐ.ടി.ഐയില്‍ നിശ്ചിത സമയപരിധിക്ക് മുമ്പ് പരിശോധനയ്ക്കായി സമര്‍പ്പിച്ച് ഫീസ് ഒടുക്കി രസീത് വാങ്ങണം. ഐ.ടിഐകളില്‍ നേരിട്ടോ, ട്രഷറി ചെലാന്‍ മുഖേന '0230-00-L&E-800-other receipts-88-other items' എന്ന ശീര്‍ഷകത്തിലോ ഫീസ് ഒടുക്കാം.  നിശ്ചിത സമയ പരിധിക്ക് മുമ്പായി ഏതെങ്കിലും ഒരു ഗവ. ഐ.ടി.ഐയില്‍ സമര്‍പ്പിച്ച് ഫീസ് ഒടുക്കി രസീത് വാങ്ങാത്ത അപേക്ഷകള്‍ അസാധുവാകും.
    അപേക്ഷ സമര്‍പ്പിക്കുമ്പോള്‍ എസ്.എം.എസ് ആയി ലഭിക്കുന്ന യൂസര്‍ ഐ.ഡി പാസ്‌വേര്‍ഡ് എന്നിവ ഉപയോഗിച്ച് അപേക്ഷയില്‍ തിരുത്തല്‍ വരുത്താം. ഓണ്‍ലൈന്‍ അപേക്ഷ സമര്‍പ്പിക്കുന്നതിനുളള അന്തിമ സമയപരിധി വരെ അതിനുളള അവസരം ലഭിക്കും. ജില്ലയിലെ എല്ലാ അക്ഷയ കേന്ദ്രങ്ങളിലും അപേക്ഷ നല്‍കുന്നതിന് വേണ്ട ക്രമീകരണങ്ങള്‍  ഏര്‍പ്പെടുത്തിയിട്ടുണ്ട്. 
    അക്ഷയ സംരംഭകര്‍ക്കുള്ള പരിശീലനത്തിന് ഐടി മിഷന്‍ ജില്ലാ പ്രൊജക്ട് മാനേജര്‍ മിഥുന്‍കൃഷ്ണ സി.എം, വ്യാവസായിക പരിശീലന വകുപ്പിലെ ഗണേശന്‍. ഒ, അബ്ദുള്‍ റഫീഖ് എന്നിവര്‍ നേതൃത്വം നല്‍കി.