സംരംഭകത്വ വർഷം:അവലോകനയോഗവും ശില്പശാലയും, ആലുവ മണ്ഡലത്തിൽ ആരംഭിച്ചത് 413 സംരംഭങ്ങൾ

വ്യവസായ രംഗത്ത് കൂടുതൽ തൊഴിലവസരങ്ങൾ സൃഷ്ടിക്കുക എന്ന ലക്ഷ്യത്തോടെ വ്യവസായ വകുപ്പ്  നടപ്പാക്കുന്ന സംരംഭകത്വ വർഷത്തിന്റെ ഭാഗമായി ആലുവ നിയോജകമണ്ഡല തല അവലോകനയോഗം ശിൽപശാലയും നടന്നു. അൻവർ സാദത്ത് എംഎൽഎ അവലോകന യോഗത്തിന്റെയും, സംരംഭകത്വ ശില്പശാലയുടെയും ഉദ്ഘാടനം നിർവഹിച്ചു.

2022-23 സാമ്പത്തിക വർഷം സംരംഭകത്വ വർഷമായി ആചരിക്കുമ്പോൾ ആലുവ മണ്ഡലത്തിൽ 413 സംരംഭങ്ങളാണ് ആരംഭിച്ചിരിക്കുന്നത്. മണ്ഡലത്തിലെ  പഞ്ചായത്തുകളിലും ആലുവ നഗരസഭയിലുമായി 
1098 സംരംഭങ്ങൾ ആരംഭിക്കാനാണ് ലക്ഷ്യമിടുന്നത്. 37%  സംരംഭങ്ങൾ ആരംഭിച്ചു കഴിഞ്ഞു. ആലുവ നഗരസഭയിലും എല്ലാ പഞ്ചായത്തുകളിലും ജനറൽ ഓറിയന്റേഷൻ പ്രോഗ്രാമുകളും ലോൺ മേളകളും പൂർത്തിയായി. സംരംഭങ്ങൾ ആരംഭിക്കുന്നതിന് സഹായത്തിനായി എല്ലാ പഞ്ചായത്തുകളിലും ഹെൽപ്പ് ഡസ്ക്കുകൾ ആരംഭിക്കുകയും ഇന്റേൺണുകളെ നിയമിക്കുകയും ചെയ്തിട്ടുണ്ട്.

 ആലുവ നഗരസഭയിൽ 67, ചെങ്ങമനാട് ഗ്രാമപഞ്ചായത്ത് 44, ചൂർണിക്കര ഗ്രാമപഞ്ചായത്ത് 52,എടത്തല ഗ്രാമപഞ്ചായത്ത് 72 , കാഞ്ഞൂർ ഗ്രാമപഞ്ചായത്ത് 37, കീഴ്മാട് ഗ്രാമപഞ്ചായത്ത് 46,നെടുമ്പാശ്ശേരി ഗ്രാമപഞ്ചായത്ത് 60, ശ്രീമൂലനഗരം ഗ്രാമപഞ്ചായത്ത് 35 വീതം സംരംഭങ്ങൾ ആരംഭിച്ചിട്ടുണ്ട്.

 ആലുവ  നഗരസഭ ചെയർമാൻ  എം. ഒ. ജോൺ അധ്യക്ഷത വഹിച്ചു. ജില്ലാ വ്യവസായ കേന്ദ്രം മാനേജർ ഷീബ. എസ്  മുഖ്യപ്രഭാഷണം നടത്തി. പാറക്കടവ് ബ്ലോക്ക് പഞ്ചായത്ത് പ്രസിഡന്റ് ടി.വി പ്രദീഷ്,അങ്കമാലി ബ്ലോക്ക് പഞ്ചായത്ത് പ്രസിഡന്റ്‌ മേരി ദേവസികുട്ടി, ചെങ്ങമനാട് ഗ്രാമപഞ്ചായത്ത് പ്രസിഡന്റ് സെബാ മുഹമ്മദ്,കാഞ്ഞൂർ ഗ്രാമപഞ്ചായത്ത് പ്രസിഡന്റ് കെ. സി മാർട്ടിൻ ,ആലുവ ഉപകേന്ദ്രം വ്യവസായ ഓഫീസർ ഹേമ ജോസഫ്, നഗരസഭ അംഗങ്ങൾ , ബ്ലോക്ക് പഞ്ചായത്ത് അംഗങ്ങൾ, ഗ്രാമ പഞ്ചായത്ത് പ്രസിഡന്റുമാർ,സ്റ്റാന്റിങ് കമ്മിറ്റി അധ്യക്ഷൻമാർ, ബാങ്ക് പ്രതിനിധികൾ വിവിധ വകുപ്പ് ഉദ്യോഗസ്ഥർ തുടങ്ങിയവർ പങ്കെടുത്തു.