അടിയന്തര ധനസഹായം ഇതുവരെ 91927 കുടുംബങ്ങള്‍ക്ക്

    കൊച്ചി: പ്രളയ ദുരിത ബാധിതര്‍ക്ക് സര്‍ക്കാര്‍ പ്രഖ്യാപിച്ച അടിയന്തര ധനസഹായമായ പതിനായിരം രൂപ ജില്ലയില്‍ ഇന്നലെ (സെപ്തംബര്‍ 6) വൈകിട്ട് ആറു മണി വരെ 91927 കുടുംബങ്ങളുടെ ബാങ്ക് അക്കൗണ്ടുകളിലേക്ക് കൈമാറാനുളള നടപടികള്‍ പൂര്‍ത്തിയായി. ജില്ലയില്‍ ആകെ 1,68,298 കുടുംബങ്ങള്‍ക്കാണ് തുക കൈമാറേണ്ടത്. കണയന്നൂര്‍ താലൂക്ക്- 12573, കൊച്ചി --1416, ആലുവ - 25513, പറവൂര്‍- 31988, കുന്നത്തുനാട് - 9716, മൂവാറ്റുപുഴ - 7885, കോതമംഗലം - 2036 എന്നിങ്ങനെയാണ് ഓരോ താലൂക്കിലും ധനസഹായം ലഭിച്ച കുടുംബങ്ങളുടെ എണ്ണം. 
    പ്രളയകാലത്ത് ആരംഭിച്ച 969 ക്യാമ്പുകളില്‍ 11 ക്യാമ്പുകള്‍ മാത്രമാണ് ഇപ്പോഴുള്ളത്. 146 കുടുംബങ്ങളില്‍ നിന്നായി 425 അംഗങ്ങളാണ് ക്യാമ്പുകളില്‍ താമസിക്കുന്നത്. ആലുവയില്‍ രണ്ട് ക്യാമ്പുകളിലായി 41 കുടുംബങ്ങളിലെ 105 പേരും പറവൂരില്‍ ആറ് ക്യാമ്പുകളിലായി 80 കുടുംബങ്ങളിലെ 260 പേരും കണയന്നൂര്‍ താലൂക്കില്‍ മൂന്ന് ക്യാമ്പുകളിലായി 25 കുടുംബങ്ങളിലെ 60 പേരും താമസിക്കുന്നു. 4,10,301 പേരാണ് പ്രളയം രൂക്ഷമായിരുന്ന ഘട്ടത്തില്‍ 969 ക്യാമ്പുകളിലായി ഉണ്ടായിരുന്നത്.