കെ.എസ്.എഫ്.ഡി.സിയുടെ സഖി ഡോർമറ്ററി കൈരളി കോംപ്ലക്സിൽ

        കെ.എസ്.എഫ്.ഡി.സിയുടെ നേതൃത്വത്തിൽ തമ്പാനൂർ കൈരളി, ശ്രീ, നിള തിയറ്റർ കോംപ്ലക്സിൽ ഒരുക്കിയ സഖി ഡോർമറ്ററിയുടെ ഉദ്ഘാടനം സാംസ്കാരിക മന്ത്രി സജി ചെറിയാൻ സെപ്റ്റംബർ 11ന് രാവിലെ 11ന് നിർവഹിക്കും.

        ആന്റണി രാജു എം.എൽ.എ അധ്യക്ഷത വഹിക്കും.  ആരോഗ്യ വനിതാ ശിശു വികസന മന്ത്രി വീണ ജോർജ്ജ് ഡോർമറ്ററിയുടെ ആദ്യ ഓൺലൈൻ ബുക്കിംഗ് നടത്തും. 24 മണിക്കൂർ ചെക്കൗട്ട് വ്യവസ്ഥയിൽ ‘സഖി’ യിൽ 500 രൂപയും ജി.എസ്.ടിയും നിരക്കിൽ താമസ സൗകര്യം ലഭിക്കും. എയർ കണ്ടീഷൻഡ് ആയ ഡോർമറ്ററിയിൽ 12 ബെഡുകളാണ് സജ്ജീകരിച്ചിരിക്കുന്നത്. ഫ്രീ വൈഫൈ, ലാന്റ് ഫോൺ ഫെസിലിറ്റി, അറ്റാച്ച്ഡ് വാഷ് റൂമുകൾ, ബെഡ് ഷീറ്റ്, ടൗവൽ, സോപ്പ്, കുടിവെള്ളം, കോമൺ ഡ്രസ്സിംഗ് റൂം, നാപ്കിൻ വെൻഡിംഗ് മെഷീൻ, ഇൻസിനേറ്റർ എന്നീ സൗകര്യങ്ങളുമുണ്ട്. ടൂ വീലർ, ഫോർ വീലർ പാർക്കിംഗ് സൗകര്യം, സെക്യൂരിറ്റി, ലോക്കർ ഫെസിലിറ്റി എന്നിവ സഖിയുടെ മറ്റ് സവിശേഷതകളാണ്.

        കേരള സംസ്ഥാന വനിതാ വികസന കോർപ്പറേഷന്റെ സേഫ് സ്റ്റേ മൊബൈൽ ആപ്പ് വഴി ഡോർമിറ്ററി ബുക്ക് ചെയ്യാം. കെ.എസ്.എഫ്.ഡി.സി ചെയർമാൻ ഷാജി എൻ കരുൺ, എം.ഡി ആഷിക് ഷെയ്ഖ്, വനിതാ വികസന കോർപ്പറേഷൻ ചെയർപേഴ്സൺ കെ.സി റോസക്കുട്ടി, എം.ഡി ബിന്ദു വി.സി, വാർഡ് കൗൺസിലർ ഹരികുമാർ, ജിത്തു കോളയാട് എന്നിവർ പങ്കെടുക്കും.

പി.എൻ.എക്‌സ്. 4015/2024