വയോജനങ്ങളെ ചേർത്തുപിടിച്ച് 'ഫസ്റ്റ് ലൗ'

ജീവിതത്തിൽ പലകാരണങ്ങൾ കൊണ്ട് ഒറ്റപ്പെട്ടുപോയവരെ ചേർത്തുപിടിച്ചുകൊണ്ട് തലശ്ശേരി എൻജിനീയറിങ് കോളേജ്യൂനിയൻ, എൻ.എസ്.എസ് യൂനിറ്റ് മെയിന്റനൻസ് ട്രൈബ്യൂണലിന്റെ കീഴിലുള്ള ആർദ്രദീപം എന്നിവ സംഘടിപ്പിച്ച 'ഫസ്റ്റ് ലൗ' പരിപാടി തലശ്ശേരി സബ് കളക്ടർ കാർത്തിക് പാണിഗ്രഹി ഉദ്ഘാടനം ചെയ്തു.
വയോജനങ്ങൾക്ക് ബോധവത്കരണവും, മാനസികവും ആരോഗ്യപരവുമായ സഹായം ആവശ്യമാണെന്നും, വാലന്റൈൻസ് ഡേ ആഘോഷിക്കാൻ ഏറ്റവും അനുയോജ്യമായവർ മാതാപിതാക്കൾ തന്നെയാണെന്നും സബ് കലക്ടർ പറഞ്ഞു. വയോജനങ്ങളോടൊപ്പം സമയം ചെലവഴിക്കാനുംമാനസികമായി ചേർത്ത് പിടിക്കുവാനും സാധിക്കണമെന്നും അദ്ദേഹം പറഞ്ഞു.
തലശ്ശേരി നഗരസഭ ചെയർപേഴ്‌സൺ കെ എം ജമുനറാണി മുഖ്യാതിഥിയായി. വയോജനങ്ങളെ യുവതലമുറ ചേർത്തുപിടിക്കുന്നത് മനസ്സു നിറയ്ക്കുന്ന കാഴ്ചയാണെന്നും അപൂർവ്വ സംഗമത്തിൽ പങ്കെടുത്തതിൽ സന്തോഷമുണ്ടെന്നും അവർ പറഞ്ഞു. അനാഥർക്കും അഗതികൾക്കും വിധവകൾക്കും കിടപ്പിലായവർക്കും അഭയം നൽകുന്ന തറവാട് ഹാപ്പി ഹോമിലെ 18 പേരാണ് പരിപാടിയിൽ പങ്കുചേർന്നത്.
തുടർന്ന് വിദ്യാർത്ഥികളുടെയും വയോജനങ്ങളുടേയും കലാപരിപാടികളും അരങ്ങേറി.
എൻജിനീയറിങ് കോളേജ് ഓഡിറ്റോറിയത്തിൽ നടന്ന പരിപാടിയിൽ കോളേജ് പ്രിൻസിപ്പാൾ ഡോ. രാജീവ് പിഅധ്യക്ഷനായി. ജില്ലാ സാമൂഹ്യ നീതി ഓഫീസർ പി ബിജു, സബ് കലക്ടർ ഓഫീസ് സീനിയർ സൂപ്രണ്ട് കെ.നിസാർ, തറവാട് ഗ്രൂപ്പ് ഓഫ് ഇൻസ്റ്റിറ്റിയൂഷൻ പ്രസിഡൻറ് വി. പി അബ്ദുൽ ഖാദർ, സെക്രട്ടറി അബ്ദുൽ മജീദ് പി, മാനേജിങ് പാർട്ട്ണർ, പെപ്പർ പാലസ് ഖാലിദ് എം, എൻഎസ്എസ് പ്രോഗ്രാം ഓഫീസർ പി ഷബിൻ എന്നിവർ പങ്കെടുത്തു.