താളുംകണ്ടം - പൊങ്ങിൻ ചുവട് നിവാസികളുടെ പതിറ്റാണ്ടുകളുടെ കാത്തിരിപ്പിന് വിരാമം

.എസ്.ആർ.ടി.സി ബസ് സർവീസ് ആരംഭിച്ചു

താളുംകണ്ടം - പൊങ്ങിൻ ചുവട് നിവാസികളുടെ പതിറ്റാണ്ടുകളുടെ കാത്തിരിപ്പിന് വിരാമമായി. കുട്ടമ്പുഴ പഞ്ചായത്തിലെ താളുംകണ്ടം ആദിവാസി നഗറിനേയും വേങ്ങൂർ പഞ്ചായത്തിലെ പൊങ്ങിൻ ചുവട് ആദിവാസി നഗറിനെയും ബന്ധപ്പെടുത്തി കെ.എസ്.ആർ.ടി.സി ബസ് സർവീസ് ആരംഭിച്ചു . 

രണ്ടു പ്രദേശങ്ങളിലെയും ജനങ്ങങ്ങളുടെ വർഷങ്ങളായിട്ടുള്ള ആവശ്യമായിരുന്നു ഈ മേഖലകളിലേക്ക് കെ.എസ്.ആർ.ടി.സി സർവീസ് വേണമെന്നുള്ളത്. ടൂറിസം മേഖലയ്ക്ക് ഒരുപാട് സാധ്യത കൂടി നൽകുന്ന സർവീസാണിത്.

സർവീസിന്റെ ഔദ്യോഗിക ഉദ്ഘാടനം ആന്റണി ജോൺ എം.എൽ.എയും എൽദോസ് കുന്നപ്പിള്ളിൽ എം.എൽ.എയും സംയുക്തമായി കോതമംഗലം കെ.എസ്.ആർ.ടി.സി ഡിപ്പോയിൽ നിർവഹിച്ചു.

 പൊങ്ങിൻ ചുവട്ടിൽ നിന്ന് രാവിലെ 6 ന് പുറപ്പെട്ട് കോതമംഗലം - പെരുമ്പാവൂർ - ചെമ്പറക്കി - പുക്കാട്ടുപടി - കാക്കനാട് വഴി എറണാകുളത്തേയ്ക്കും 10.50 ന് തിരിച്ച് ആലുവ - പെരുമ്പാവൂർ വഴി കോതമംഗലത്തേയ്ക്കും, കോതമംഗലത്ത് നിന്ന് വൈകിട്ട് 5.10 ന് ചക്കിമേട് - വടാട്ടുപാറ - ഇടമലയാർ - താളും കണ്ടം -പൊങ്ങിൻ ചുവട്ടിലേക്കുമാണ് സർവീസ് നടത്തുന്നത്.

ചടങ്ങിൽ കോതമംഗലം നഗരസഭാ ചെയർമാൻ കെ.കെ ടോമി അധ്യക്ഷത വഹിച്ചു. കൂവപ്പടി ബ്ലോക്ക് പഞ്ചായത്ത് പ്രസിഡന്റ് എൻ.എം സലിം, കുട്ടമ്പുഴ ഗ്രാമപഞ്ചായത്ത് പ്രസിഡന്റ് കാന്തി വെള്ളക്കയ്യൻ, വേങ്ങൂർ ഗ്രാമപഞ്ചായത്ത് പ്രസിഡന്റ് ശില്പ സുധീഷ്, ജില്ലാ പഞ്ചായത്ത് അംഗം കെ.കെ ദാനി, നഗരസഭാ സ്റ്റാൻഡിങ് കമ്മിറ്റി ചെയർമാൻമാരായ കെ.എ നൗഷാദ്, കെ.വി തോമസ്, വാർഡ് കൗൺസിലർ അഡ്വ.ഷിബു കുര്യാക്കോസ്, കൂവപ്പടി ബ്ലോക്ക് പഞ്ചായത്ത് മെമ്പർ പി.ആർ നാരായണൻ നായർ, വേങ്ങൂർ ഗ്രാമപഞ്ചായത്ത് അംഗം ശോഭന വിജയകുമാർ, മുൻ വേങ്ങൂർ പഞ്ചായത്ത് പ്രസിഡൻ്റ് എം.എ ഷാജി,

കെ.എസ്.ആർ.ടി.സി എ.ടി.ഒ ഷാജു വർഗീസ്, കൺട്രോളിംഗ് ഇൻസ്‌പെക്ടർ അനസ് ഇബ്രാഹിം, ബി.റ്റി.സി ജില്ലാ കോ ഓഡിനേറ്റർ എൻ.ആർ രാജീവ്‌, തൊഴിലാളി സംഘടന പ്രതിനിധികളായ സി.എ സിദ്ധിഖ്, അനസ് മുഹമ്മദ്‌, എം.എം സുബൈർ, കെ.ആർ ബിജു, ബി.ടി.സി കോ ഓഡിനേറ്റർ ജെയ്സൺ ജോസഫ്, വിവിധ രാഷ്ട്രീയ കക്ഷി പ്രതിനിധികളായ പി.പി സജീവ്, ബേബി പൗലോസ്, എ.ഡി ജോൺസൺ, പൊങ്ങിൻച്ചുവട് ഊര് പാട്ടി ചെല്ലമ്മ എന്നിവർ പങ്കെടുത്തു.