കുട്ടികളെ ശരിയായ ദിശയിലേക്ക് നയിക്കാന്‍ സാധിക്കണം : സ്പീക്കര്‍ എ.എന്‍ ഷംസീര്‍ കുഴല്‍മന്ദം ഗവ. ഹൈ സ്‌കൂള്‍ പുതിയ കെട്ടിടം ഉദ്ഘാടനം ചെയ്തു
മയക്കുമരുന്ന് എന്ന ദുരന്തത്തില്‍ നിന്നും കുട്ടികളെ ശരിയായ ദിശയിലേക്ക് നയിക്കാന്‍ സാധിക്കണമെന്ന് നിയമസഭാ സ്പീക്കര്‍ എ.എന്‍ ഷംസീര്‍. കിഫ്ബി ഫണ്ടില്‍ നിന്നും 7.5 കോടി രൂപ ചെലവില്‍ നിര്‍മ്മാണം പൂര്‍ത്തീകരിച്ച കുഴല്‍മന്ദം ഗവ. ഹൈ സ്‌കൂളിന്റെ പുതിയ കെട്ടിടത്തിന്റെ ഉദ്ഘാടനം നിര്‍വഹിച്ച് സംസാരിക്കുകയായിരുന്നു സ്പീക്കര്‍. കുട്ടികളുടെ സ്‌ക്രീന്‍ ടൈമിന് രക്ഷിതാക്കള്‍ കൃത്യമായ നിയന്ത്രണം ഏര്‍പ്പെടുത്തണമെന്നും, സ്‌ക്രീനില്‍ സമയം ചെലവഴിക്കുന്നതിന് പകരം കുട്ടികളോട് ഗ്രൗണ്ടില്‍ പോയി കളിക്കാന്‍ പറയണമെന്നും സ്പീക്കര്‍ പറഞ്ഞു. കുട്ടികള്‍ കളിച്ചും പഠിച്ചും വളരുന്നതിനുള്ള സാഹചര്യം മാതാപിതാക്കള്‍ ഉണ്ടാക്കണം. ശാരീരിക- മാനസികാരോഗ്യം ഇപ്പോള്‍ കുട്ടികള്‍ക്ക് ഇല്ല. ഏകാന്തത അനുഭവിക്കുന്ന കുട്ടികളെ ശരിയായ ദിശയിലേക്ക് നയിക്കാന്‍ സാധിക്കണം. കുട്ടികള്‍ക്ക് നല്ല സുഹൃത്ത് ബന്ധങ്ങള്‍ ഉണ്ടാവുന്നതിനായി മാതാപിതാക്കളും അധ്യാപകരും ഒരുപോലെശ്രദ്ധിക്കണം. അധ്യാപകര്‍ രണ്ടാമത്തെ രക്ഷിതാവ് എന്ന ബോധ്യത്തോടെ അധ്യാപകര്‍ കുട്ടികളോട് നേരിട്ട് ഇടപെടുന്ന സാഹചര്യം ഉണ്ടാവണമെന്നും സ്പീക്കര്‍ പറഞ്ഞു. വ്യക്തി ശുചിത്വം പോലെ തന്നെ പരിസര ശുചിത്വം അനിവാര്യമാണ്. കേരളത്തെ മാലിന്യമുക്തമാക്കാനുള്ള ശ്രമങ്ങളില്‍ കുട്ടികളും പങ്കുചേരണം. പരിസര ശുചിത്വത്തെ കുറിച്ചും വ്യക്തി ശുചിത്വത്തെ കുറിച്ചും കുട്ടികളെ പഠിപ്പിക്കാന്‍ സാധിക്കണം. അതും വളരെ പ്രധാനപ്പെട്ടതാണ്. അതില്‍ അധ്യാപകര്‍ക്കുള്ള പങ്ക് വലുതാണെന്നും സ്പീക്കര്‍ പറഞ്ഞു.
സ്‌കൂള്‍ കെട്ടിടം നിര്‍മ്മിക്കുന്നതിനായി രണ്ടര ഏക്കര്‍ സ്ഥലം സൗജന്യമായി നല്‍കിയ രുക്മണിയമ്മയേയും കുടുംബത്തെയും സ്പീക്കര്‍ പരിപാടിയില്‍ അഭിനന്ദിച്ചു. ഒരു നാടിന്റെ നവീകരണത്തിനായി ആ കുടുംബം മാതൃകയായി മുന്നോട്ട് വന്നുവെന്നും സ്പീക്കര്‍ പറഞ്ഞു. വികസനത്തിനായി ജനങ്ങളും അണി ചേരുമ്പോഴാണ് വികസനം സമ്പൂര്‍ണ്ണമാകുക. വികസനത്തില്‍ ജനങ്ങളും കണ്ണികളാവണം. സ്‌കൂളിന്റെ അഭിവൃദ്ധിയ്ക്ക് വേണ്ടി സ്‌കൂള്‍ പി.ടി.എയും നാട്ടുകാരും ഇടപെടണം. കുഴല്‍മന്ദം ഹൈസ്‌കൂള്‍ ഇനിയും വളരുന്നതിന് എം.എല്‍.എ നടത്തുന്ന പ്രവര്‍ത്തനങ്ങളോടൊപ്പം ജനങ്ങള്‍ മുന്നില്‍ നില്‍ക്കണമെന്നും സ്പീക്കര്‍ പറഞ്ഞു.
കെ.ഡി. പ്രസേനന്‍ എം.എല്‍.എ അധ്യക്ഷനായ പരിപാടിയില്‍ കെ. രാധാകൃഷ്ണന്‍ എം.പി, ജില്ലാ പഞ്ചായത്ത് പ്രസിഡന്റ് കെ. ബിനുമോള്‍, വൈസ് പ്രസിഡന്റ് സി.കെ ചാമുണ്ണി, ജില്ലാ പഞ്ചായത്ത് ആരോഗ്യ വിദ്യാഭ്യാസ സ്റ്റാന്‍ഡിംഗ് കമ്മിറ്റി അധ്യക്ഷ ഷാബിറ ടീച്ചര്‍, ജില്ലാ പഞ്ചായത്ത് അംഗം അഭിലാഷ് തച്ചങ്കാട്, കുഴല്‍മന്ദം ബ്ലോക്ക് പഞ്ചായത്ത് പ്രസിഡന്റ് ടി.കെ ദേവദാസ്, കുഴല്‍മന്ദം ഗ്രാമപഞ്ചായത്ത് പ്രസിഡന്റ് മിനി നാരായണന്‍, വൈസ് പ്രസിഡന്റ് ജയപ്രകാശ്, ബ്ലോക്ക്- ഗ്രാമപഞ്ചായത്ത് പ്രതിനിധികള്‍, ജില്ലാ വിദ്യാഭ്യാസ ഓഫീസര്‍ ആസിഫ് അലിയാര്‍, വിദ്യാഭ്യാസ ഉപഡയറക്ടര്‍ സുനിജ, സ്‌കൂള്‍ ഹെഡ്മിസ്ട്രസ് ശാന്തകുമാരി, മറ്റ് വകുപ്പ് ഉദ്യോഗസ്ഥര്‍ തുടങ്ങിയവര്‍ പരിപാടിയില്‍ പങ്കെടുത്തു. പരിപാടിയില്‍ സ്‌കൂളിലെ പൂര്‍വ്വ വിദ്യാര്‍ത്ഥിനിയായ സ്‌നേഹയെ ജില്ലാ പഞ്ചായത്ത് പ്രസിഡന്റ് കെ. ബിനുമോള്‍ ആദരിച്ചു. സ്‌നേഹ എഴുതിയ കവിതയോടെയാണ് 2021 സംസ്ഥാന ബജറ്റ് അന്നത്തെ ധനകാര്യമന്ത്രിയായ തോമസ് ഐസക് നിയമസഭയില്‍ അവതരിപ്പിച്ചത്.
- Log in to post comments